Сим божественнымъ пророческимъ и апостольскимъ писаниемъ же и преданиемъ последующе, благочестивийши и православънии царие и святителие еретики же и отступники в заточение посылаху и казнемъ лютымъ предаваху.[306]
Первый великий царь равноапостольный Костянътинъ заповедъ предложи во всемъ своемъ царстве, еже неверующих во Святую и Животворящую Троицу злым зле умърети и домъ его в разграбление быти. Святии же отцы Перваго собора не возбраниша сему быти. И святый Александръ, патриархъ Костянътина града, молитвою своею сотвори Арию разсестися. И великий чюдотворецъ Епифаний Кипръский Аетиа еретика словомъ нема сотвори й въ седмый день смерти предастъ. Благочестивый же царь Маркиянъ Диоскора-еретика, патриарха александрейскаго, на смерть осуди и не уби сего мечемъ, но отосла во Асъ остров, в немже никтоже лето цело поживе, но, емлеми от смертотворных ветровъ, зле умираху. Тамо же и Диоскоръ со всеми, иже таяже мудрствующими, зле душа своя извергоша. Святии же убо отцы Четвертаго собора не возбраниша сему быти. Благочестивый же царь Устинъ и Тивирие епарху Адъдусу и воеводе Елеуферию, поборником ереси, главы отсекоша, великий же чюдотворецъ Евътихие, патриархъ Цариграда, не возбрани имъ. Великий же царь Ираклий не хотящих креститись июдей повеле убивати, и мнози же бяху тогда патриарси жь и святителие и преподобнии не возбраниша сего творити. И святый Перфирие, епископъ газский, иже и манихейскую прелесть держащих молитвою немы и безгласны сотвори, потом же и смерти предастъ. И святый Феодоръ, едеский епископъ, жидовина, хулу глаголавшаго на Господа нашего Исуса Христа, словом нема сотвори и по семь умоли царя вавилоньскаго, он же посла въ Едес, повеле еретиковъ всехъ из града изгнати и богатество их взяти, овем же языки изрезывати. Святый же Феодоръ не возбрани сему быти. Тако же и святая Феодора царица и сынъ ея Михаилъ Анния еретика, патриарха Цариграда, в заточение отосла и тамо повеле, растягше его, бити ремениемъ. Блаженный же патриархъ Мефодие и мнози преподобнии отцы наши и исповедницы не возбраниша сему быти. И святый Левъ, епископъ катаньский, Илиодора еретика огнемъ сотвори сожжена быти.Зри, яко святии пророцы и праведницы в Ветхомъ Законе отступивших от Господа Бога овех молитвою и благодатию, данную имъ от Бога, смерти предаваху, овех же оружиемъ убиваху и казнем лютымъ предаваху. В Новемъ же Законе святии апостоли и божествении святителие и преподобнии и богоноснии отцы не убиваху еретики и отступники оружиемъ, но молитвами своими и силою, данъною имъ от всесилнаго и животворящаго Духа, сихъ смерти и казънемъ лютымъ предаваху.
Аще ли же кто речеть, яко