Том 9 (Конец XIV - первая половина XVI века, подъем общественного значения литературы)

Аще убо святии отцы, иже на вселенъскихъ и на поместных соборех бывшеи и от святаго и животворящаго Духа наставляеми, и учиниша божественная правила и законы и словеса святыхъ отець, и яже от устъ самого Господа святыя его заповеди, со всеми же сими и градстии законы сочеташа святии отцы древънии. И хто убо деръзнеть сихъ отложити или похулити, яже от Святаго Духа и святыхъ отець прията быша, и сочетана со всемъ божественым Писаниемъ?

Подобно же тому и велики Афанасей глаголетъ, яко сии суть еретичестии отроцы, иже глаголют, иже яко не подобает судити творящих смертныя грехи. И аще бы тако было, якоже они утверждаютъ, не бы праведный Ное судилъ Хама ругателя[287] раба быти братиямъ своимъ. И Моисей же поклонившихся тельцу три тысущи повеле мечемъ исъсещи[288] и собравшаго дрова в суботу повеле камениемъ побити его. Исус Наввинъ Ахара крадбы ради со всемъ домомъ потъреби.[289] Финеес же блуда ради Замврия погуби,[290] и Самоилъ Агага царя предъ Господемъ уби,[291] Илия же ложныя пророки, якоже свиния, в потоце искла,[292] Елисей же осуди Гиезию[293] приятия ради имения, прокаженна показа. Данилъ же, осудя блудъныя старца[294] закономъ Моисеовымъ, погуби. И святый апостолъ Петръ, приемъ ключа царства небеснаго, Ананию со женою его, утаившая от своего стяжания, осудивъ,[295] абие сотвори их издохнувша. И Павел Алексанъдра-ковача, Именея же и Филита предастъ сатане,[296] да накажются не хулити. Се убо вси праведънии судивше, не осуждени бывше, паче же избрани бывше, въ духовную служьбу избрашася.

Сиа глаголетъ и учитъ великий Афанасие о творящихъ смерътныя грехи: «Тяжчайши же и страшнейши всехъ смерътных греховъ грехъ, еже въ ересь впасти и Христа отврещися». Тако бо сказуетъ той же божественный Афонасие. И великий Иоан Златаустый в своих писаниихъ: «Царьскими же суди и градскими законы обуздовается безумных человекъ воля, иже смерътныя грехи творящих и душу с телом губящихъ». Тако бо глаголютъ и священная правила святых отець: «Слышите, цари и князи, разумейте, яко от Бога дана бысть держава вамъ, яко слуги Божии есте. Сего ради поставил есть вас пастыря и стража людем своимъ, да соблюдете стадо его от волъковъ невредимо. Вас бо Богъ в себе место избралъ на земли, и на свой престол вознеслъ посади, милость и животъ положи у вас, и меч вышняя Божия десница вручи вамъ. Вы же убо да не здеръжите истинну в неправде, и убойтесь серпа небеснаго, и не давайте воля зло творящимъ человекомъ, и не напущайте на правоверныя человеки, якоже псы бесныя. Или якоже аще кто меч дастъ человеку неистовящуся, и он не точию телеся, но и душа губитъ». Зри, что глаголетъ, иже не токмо телеса губит? Се глаголетъ не о убийцах, ниже разбойничества и обиды творящихъ, иже точию тело губятъ, а иже глаголетъ: «Не точию тело губят, но и душу губятъ», се глаголетъ о еретицехъ и о отступницехъ: сии бо с теломъ душу губят, еретическими учении прельщающе православныя.

И что убо, аще они сотворят зло, на попустившаго душу приходит грех, еже есть на царя или на князя и на судия земския. Аще власть дадут злочестивымъ человекомъ, о семь истязани будутъ от Господа Бога въ страшный день втораго пришествия Христова. И сего ради царемъ и властелемъ о семь попечение имети, яко да будутъ отмстители Христу на еретики. Подобно же тому наказуетъ и учитъ священный Златаустъ, сице глаголя: «Еже убо по воли Божии бываемо, аще и озлобити мнится, всехъ есть добрейши. А еже чрез волю Божию и не угодное оному, аще и изрядно быти мнимо, всех есть злейши и законопреступнейши. Аще убиетъ кто по воли Божией, человеколюбиа всякого есть лучши убийство оно. Аще и пощадитъ кто, человеколюбъствуя чрез угодное оному, убийства всякого непреподобнейши будетъ то пощадение. Не естество бо вещемъ, но Божии судове добра и зла сия быти творятъ».

Да навыкнеши, яко се истинно есть, послушай реченныхъ. Пощаде некогда чрез Божественную волю Агага царя[297] амаликова Саулъ царь Израилевъ и за се пощадение прия от Бога осужение, и не точию самъ, но и все семя его. Тако же царя асирийска Адера емъ, Ахав[298] паче угоднаго Богови снабде и со многою отпусти его честию, и пророка некоего посла Богь ко Ахаву, глаголя: «Тако глаголетъ Господь: яко отпустил есть ты мужа губителя от руки твоея, душа твоя вместо душа его, и людие твои вместо людий его».

Подобно же сему пророкъ некий,[299] пришед, рече ко искренему своему: «Словом Господнимъ бий мя». И не восхоте человекъ он бити его, и рече к нему: «Занеже не послуша гласа Господня, се ты отидеши от мене, и поразит тя левъ». И отиде от него, и обретъ его левъ и порази его. И обретает человека иного и рече: «Бий мя». И бий его человекъ той и сокруши лице его. Что убо будетъ сего преславнейши, — бивый пророка спасеся, а пощадевый мученъ бываше? Да навыкънеши, яко, Богу повелевающю, не достоитъ испытовати естество бываемыхь, но повиноватися точию.