Том 9 (Конец XIV - первая половина XVI века, подъем общественного значения литературы)

Тако же и вси святии преподобънии и богоноснии отцы наши, пастырие же и учителие, моляху благочестивыя царя же и князя, яко да еретики потребятъ, якоже свидетельствуютъ святии отцы святаго вселенъскаго Шестаго собора, глаголюще сице благочестивому царю Иустияну:[300] «Ты же, о царю, потщися о сем, яко, аще некакъ останокъ еллинский июдейский еретическия злобы во зрелую пшеницу вместился будетъ, искоренити яко плевелы. Да исторгнутся, и чиста явится церковная нива, теплотою к Богу любве, царей же и властелей ревнителя Финееса преспевших, и грехъ прободшихъ копиемъ». Глаголют же святии отцы, иже во Иерусалиме собравшеися, тысяща и четыриста, иже многосложный свитокъ написаша к Феофилу, греческому царю:[301] «Ты же, о царю, призри к молитве смиренных, ущедри Церковь свою, устави церковныя разъдоры, угаси перьвие зловерныхъ отметьникъ силою праведнаго своего царьства, мышцею благочестия своего».

Якоже первый начатокъ християном православнымъ, иже въ царехъ апостолъ великий Костянътинъ праведный[302] темнаго оного и богопротивнаго втораго Июду Ария, гневу тезоименита, со проклятыми его учении до конца низложи и в заточение осуди, такоже и всехъ, иже тая же мудръствующихъ. По семь же пресветлая звезда, царьский прииматель, Феодосие Великий, иже повелениемъ его божественъный соборъ Вторый святыхъ отець собра на Македония духоборца, и на Евномая, и на арияны, и сихъ проклятъ и в заточение с бесчестиемъ осуди. И сему суще преиматель умомъ и именемъ, Феодосие Малый, въ Ефесе святый соборъ собравъ и Нестория низложи. Великий же въ благочестии Маркиянъ Четвертый соборъ собра, Евтихия и Диоскора-суесловца прокляти повеле и в заточение осужаетъ. Великий же царь Устиниянъ пяты соборъ собра на Дидима и Евагрия, иже оригеонская мудръствующихъ, и сих по проклятии заточениемъ осужаетъ. По семь Костянътинъ, внукъ Ираклиевъ, на Маркияна и Стефана и Сергия и Пира и Павла и прочих зломудреныхъ Шестый собор собра святыхъ отець, от нихже еретицы зелне разбиени быша, достойно зловерию своему приимше осужение. Посем же паки благочестивая царица Ирина и сынъ ея благоверный царь Констянътин Седмый соборъ собраша на злочестивыя иконоборцы, все ихъ еретичество низложиша и до конца искорениша. Тако же вси благовернии царие, иже градными оружии неверныхъ еретикъ крепость вконецъ низложиша, вселенъскими же святыми соборы многоглавныя змиемъ главы яко во ужасе осекше, честную же и правоверную веру яко столпъ непоколебимъ и утвержение благовериа церкви утвердиша. И сия убо слышаще, благочестивии царие, и святых отець молению и наказанию повинующеся, еретики и отступники повелеваху проклинати и в заточение посылати, и казнемъ лютымъ предавати, еще же и навыкше, ежь от божественных Писаний Ветъхих же и Новых.

Тако бо творяху пророцы же и праведницы, и благочестивии царие в Ветхомъ Законе: егда видяху кого, отступивших от Господа Бога Вседержителя, овехъ убо мечемъ убивающе, овех же молитвою низлагающе. Великии убо Моисей отступивших от Бога Вседержителя и тельцу златому поклонившихся повеле мечемъ изъсещи. Великий въ пророцехъ Илия два пятьдесятника огнемъ небесным сожженымъ быти сотвори,[303] отступивших от Господа Бога, и четыреста своею рукою мечемъ изсече. Июда Маккавей, яко виде люди отступившая от Господа Бога и идолом поклонившихся, повеле вся мечемъ изсещи.[304] И благочестивый царь Иосея[305] толико возревнова о благочестии, яко не токмо живыя уби, прельщающих люди отступити от Господа Бога, но и умеръших кости воскопа и огнемъ сожже, и пепелъ на ветре развея.

В Новем же Законе святый апостолъ Петръ Симона волхъва, началника ересемь, молитвою смерти предастъ. Подобно же тому святый Иоан Богословъ Кунопа-волъхва молитвою в мори потопи. Тако же и святый апостолъ Филипъ архиерея, глаголавшаго хулы на Господа нашего Исуса Христа, повеле земъли поглотити. И святый апостолъ Павелъ Еллиму-волхва словомъ олсепи, Именея же и Филита, и Александра-ковача сатане предастъ.

И паки той же святый апостолъ Павелъ глаголеть: «Аще убо кто отверъжется закона Моисеова при устехъ двою или триех свидетелей, без милости умираетъ. Колицей, мнится, горшей муце сподобится, иже Сына Божия поправ». Се являетъ, яко ныне паче подобаетъ казнемъ лютымъ предаяти, иже Сына Божия похуливъшаго. И святый апостолъ Июда, брат Ияковль, глаголетъ: «Овехъ убо милуйте, разсуждающе, овех же страхомъ спасайте».