Том 9 (Конец XIV - первая половина XVI века, подъем общественного значения литературы)

Прочее же речемъ и о семь, еже той же великий церковный учитель святый Иоан Златаустый глаголетъ, еже не достоит убивати еретики: «Аще быхомъ убивали еретики, рать несмирна была бы во вселенней». Сия глаголетъ о епископех, и о священницех, и о иноцех, и о всех церковныхъ причетницехъ, а не о царехъ, ниже о князех, ниже о судиехъ земных. Аще бы глаголалъ о царехъ, и о князех, и о судияхъ, реклъ бы, яко не подобаетъ царемъ, и княземъ, и судиямъ убивати еретики. Ныне же глаголетъ: «Аще быхом убивали еретики», се явъствено показуетъ, яко о епископех, и о священницех, и о иноцехъ, и о причетницех церковъныхъ глаголетъ; самъ бо той бяше преже причетникъ церковный и инок, потомже священникъ, таже и епископъ. Того ради, всех сих лице на себе восприимъ, глаголетъ: «Аще быхомъ убивали еретики мы, рать несмирна бы была», а не о царех, ни о князех, ни о судиях земъских сиа глаголеть.

О царехъ убо и о князех, и о судиях и святии апостоли глаголютъ, яко они власть прияше от Господа Бога во отмщение злодеемъ, в похвалу же добротворящихъ. Глаголеть убо верховный апостолъ Петръ:[282] «Повинитеся убо всякому человеческому зданию Господа ради, сиречь человеческой власти; аще царю, яко преобладающу; аще князем, яко посылаемом от него, во отмщение убо злодеем, в похвалу же добротворящимъ. Тако бо есть воля Божия, благотворящимъ обуздовати безумных человекъ неразумие». Подобно же тому и Павел глаголет:[283] «Князи бо не суть боязнь благимъ делом, но злым. Хощеши же ли не боятися власти? Благое твори, и имаши похвалу от нея: Божий бо слуга есть ти в благое. Аще ли же злое твориши, бойся, не бо без ума меч носитъ. Божий бо служитель есть, отмститель въ гневе злое творящему».

Подобно же тому и святии отцы глаголютъ. Священный убо Златаустъ сице рече: «На ползу убо людемъ земное начальство поставися от Бога, а не от диявола, якоже нецыи неподобънии глаголютъ, да боящеся, человецы не поглащают другъ друга, якоже рыбы». Того бо ради глаголетъ святый апостолъ Петръ, яко: «Тако есть воля Божия, благотворящимъ обуздовати безумныхъ человекъ неразумие». Тако же глаголетъ святый Григорие, акраганский епископъ,[284] во своих правилных завещаниих: «Велие убо есть в человецех дарование Божие свыше дано человеколюбне, священничество же и царство: ово убо божественным служа, ово же человечьскими обладая пекийся. Подобаше приемъшему от вышняго повелениа правление человечьсъкаго рода, не токмо о своих пещися, ни своего жития правити, но и все обладаемое от треволнения спасати, и многогреховнаго смятения потопляющимъ отвсюду лукавымъ духомъ, и тело смирения нашего смущающимъ».

Аще же кто речет, яко святии апостоли и преподобнии отцы повелеша царемъ и княземъ и властелемъ во отмщение быти зло делающим, еже есть убийцамъ и прелюбодеемъ, татбу же и разбойничество и иная злая дела творящимъ, а не о еретицех, ниже отступницех, и аще убо о убийцах и о прелюбодеях, и иже иная злая дела творящих, повелено бысть сице, множае паче о еретицех и отступницехъ подобает тако же быти, якоже свидетельствуетъ божественное писание. Глаголеть бо ся въ божественных правилех, еже от градцких закон, о неверных и о еретицех[285] сице: «Иже сподобившеися святаго крещения, и отступльше православныя веры и еретицы бывше, или творяше еллинъския жерътвы, конечие повинни суть муце. Аще жидовин деръзнетъ развратити христианскую веру, главней повиненъ есть казни. Манихеи же, или инии еретицы християне бывше, и потомъ начнут еретическая творити или мудръствовати, мечемъ да посекается; иже таковы сведающе, и не предающе сих княземъ, конечьней муце повинни суть. Аще ли же кто воевода или воин, или сонмища началникъ, долъжни суть о семь пещися, егда кто еретическая творя или мудръствуя, и аще уведавше не предадятъ его, аще и правовернии сами суть, конечную муку подоимутъ».

Где суть глаголющеи, яко не подобаетъ осужати ни еретика, ниже отступъника? Се убо явъствено есть, яко не точию осужати подобаетъ, но и казнем лютымъ предавати, и не точию еретики и отступъники, но аще и правоверни будутъ сами, и уведавше же еретики или отступъники, и не предадятъ судиямъ, конечную муку подъимутъ.

Аще ли жь кто речетъ яко: «Се есть градстии закони, а не апостольская, ниже отеческая писания», таково си да слышить преподобнаго отца нашего Никона в своих богодухновенных писаниих сице глаголюща о градцкихъ законех: «Сего ради святый и покланяемый Духъ вдохну въ божественныя отца на святыхъ соборехъ, и учиниша божественная правила, яже от Святаго Духа, изложиша божественныя законы и словеса святыхъ отець и богоносныхъ, и от устъ же самого Господа святыя его заповеди глаголаны быша, и обаче и от древънихъ божественная правила со градскими размешена быша законы же и завещанми». Сице «Номоканонъ» книга[286] сотворена бысть, сиречь закону правила. Множае паче Божиимъ промысломъ божественая правила, съ заповедми Господьними, и реченными святыхъ отець, и самеми паки градскими законы размешена бывше, предреченная книга сотворися.