Том 9 (Конец XIV - первая половина XVI века, подъем общественного значения литературы)

Якоже повелеваетъ сам той священный Златаустъ, глаголя сице: «Понеже о хулении намъ слово бысть, иже на единороднаго Сына Божия, ныне же единаго от вас хощу просити дара, да хулящая вся иже во граде накажете. Аще услышиши некоего на распутии или на торгу среди народа, Владыку Христа хуляща, приступив, воспрети. Аще и язвы ему наложити подобает, не отмещися, зауши, сокруши его уста, освяти си руку язвою. Аще и поемлют нецыи, и аще судъ влекутъ, въследуй. Аще и на суде воспросят, сиреч судии истяжет, глаголи с дерзновениемъ, якоже царя аггельскаго похулилъ есть: аще бо хулящаго земнаго царя мучити подобаетъ, велми паче, иже хулящихъ небеснаго царя. Объщий есть грехъ, всех есть бесправдие. Подобаетъ же комуждо от хотящихъ оглаголавати, да уведятъ н жидове и поругании еретицы, яко спасители суть граду християне, и строители, и заступъници, и учители. Да уведятъ се не утомлении и развращении жидове и еретицы, яко божиих рабъ боятися темъ подобаетъ, да, аще изволятъ когда извещати нечто таково, друг на друга взирают всюду, и стеней трепещут, страхующеся, егда где християн услышатъ. Не слышали, что Иоан сотвори? Мучителя виде человека, брачныя законы отметающа, з дерзновениемъ посреди торъжища рече: “Неподобно ти есть имети жену Филипа брата своего”. Аз же не о человецехъ приведох слово, ни о судии, ни о брацех безаконнующих, но о Владычьней досаде. Аще убо и умрети подобаетъ, наказовати брата своего не обленися: мучительство убо и то есть за Христа. Понежь Иоан мученикъ есть, аще и пожрети не повеленъ бысть, ни поклонитись идоломъ, но егда виде божественныя законы попираеми, и того ради душу свою положи».[272]

И паки той же глаголетъ: «Возлюбленнии, многажды вам глаголаху о безбожных еретицехъ, и ныне молю, не совокуплятися с ними ни въ ядении, ни в питии, ни въ дружбе, ни в любъви: творя бо сия, чюжа себе творят Христовы Церкви. Аще кто и бесплотных житие поживетъ, еретиком же приобъщаяся в дружбе или въ любви, таковый чюж есть владыки Христа. Якоже убо сытости не имамы владыку Христа любити, такоже не имамы сытости враги его ненавидети. Глаголетъ бо самъ: “Иже несть со мною, на мя есть”».[273] Сия убо глаголетъ и повелеваетъ священный Златаустъ, от святыхъ апостолъ вину прием.

Тако бо и святии апостоли творяху. Пишет бо ся в «Деаниих святыхъ апостолъ», яко, егда прииде в Самарию святый апостолъ Петръ, Иоан, тогда Симон волхвъ[274] принесе имъ сребро, глаголя: «Дадите ми власть сию, да, на негоже аще положю руце, приимет Духъ святъ»; тогда убо святии апостоли не осудиша его на смерть. Но егда прииде в конечное нечестие, еже развратити благочестивыя и прельстити верующая, тогда смертию осужается.

Тако же и святый Иоан Богословъ сотвори. Егда убо Кунопъ[275] в своем месте живяше и никогоже от верныхъ не прелщаше, не осужен бысть. Егда же прииде во град, иский развратити верующая, тогда осуженъ бысть на смерть.

Тако же и святый апостолъ Филипъ:[276] не прииде ко аръхиерею, ниже осуди его; но егда виде архиереа, пришедша не иного чего ради, но токмо благочестивыя развратити, тогда смерътию осужен бысть.

Подобно же тому святый апостолъ Павел сотвори: не поискавъ Еллима волхва[277] и не осуди, и ниже уничижи. Но егда виде его ищуща развратити анъфипата от веры, тогда осуди его, иже слепу быти и не видети солнца.

Подобно жь тому святии и преподобнии и богоноснии отцы наши, священноначалницы и пастырие творяху.

Святый убо Иоан Златоустый, егда виде арианы,[278] живуща в Костянтинеграде и никомуже от православных пакости не творяше, тогда Иоан ничтоже зла сотвори имъ. Егда же виде ихъ, творящих прелыцения, и некоторая пения же и песни створиша, яко да единосущныя смутятъ, тогда умоли царя, яко да ижденетъ их изъ града.

Тако же и святый Поръфирие, епископъ газский,[279] виде в Газе еретики же живуща, манихейская мудръствующе и никогоже от православных прельщающе, тогда и он не осуди ихъ. Егда же виде их сего ради пришедша к нему, яко да крестияны прельстят, тогда и онъ осужаетъ ихъ преже онемлениемъ, потом же смертию.

Тако же святый Лев, епископъ катаньский, Лиодора еретика преже не осуди на смерть.[280] Но егда виде его пришедша къ церкви, некоторыя мечтания творяше, яко да благочествующая прельститъ, онъ же изыде изъ церъкви и сотвори Лиодора огънемъ сожжена быти, и паки вниде въ церковь и соверши божественную служьбу.

Тако же и святый Феодоръ, едесскый епископъ,[281] егда виде множество еретик во Едесе, православнымъ не творяща многа зла, тогда и онъ не сотвори имъ ничтоже зла. Егда же виде ихъ на толико зло пришедших, яко да православныя прельстят и церковная имения разграбят, тогда и въ Вавилонь отиде, и царя умоли, яко да еретики погребит.

И многа суть такова въ божественном писании, яко егда еретицы суще в себе ереси имущая, православнымъ пакости не твориша, тогда и святии преподобнии отцы наши сих не осужаху. Егда узрятъ неверъныя жь и еретики, хотящихъ прельстити православныя, тогда осужаху ихъ. Тако убо подобаетъ и намъ творити. И сиа убо о сихъ.