Том 9 (Конец XIV - первая половина XVI века, подъем общественного значения литературы)

Потом, тоя же зиме, по мале времени, поехал изо Пскова князь псковской Иван Михайлович Репня Оболенъских князей государю великому князю жаловатися на псковичь, что-де его псковичи бесчествовали. А тот Репня не пошлиною во Псков приехал да сел на княжении, а не по крестному целованию учал во Пскове жити, а не учал добра хотеть Святей Троицы,[353] ни мужем псковичем. Да тот Репня много зла чинил детем боярским и посадничим; и тыя дети боярские да и посадничи, здумав себе, что тотъ Репня князь псковской много зла им чинил, да поехали к великому князю жаловатися на князя Ивана Михайловича на Репню.

Потом того же времени посадники псковскиа здумав со псковичи такову думу, а не на пользю себе думаша, учаша грамоты писати по пригородом да и по волостем, а ркучи так: «Аще который человекъ, каков ни буди, а жаловался на князя, и вы бы ехали къ государю великому князю в Великий Новгород, противу его бити челом».

На той же недели поехал Левонтей посадникъ бити челом на посадника на Юрья на Копыла. И поехал Юрьи в Новгород противу его отвечивать и тамо тягалися. И Юрьи посадникъ прислал грамоту свою из Великого Новагорода ко Пскову, а у грамоте написано так: аще не поедут посадники изо Пскова говорити противу князя Ивана Репни, ино будетъ вся земля виновата. И у ту пору псковичем сердце уныло. А на четвертый день по той грамоте поехали к Новугороду 9 посадников да и купецкии старосты всех рядов. А князь великий управы им никакой не дасть, а говорит так: «Копитеся вы, жалобныя люди, на Крещение Господе, и яз вам всем управы подаю». А управы никаковы нетъ.

Того же времени, месяца генваря въ 6 день, на Крещение Господне, князь великий велел нашим посадником всем копитися да и бояром, и купцем, и купецким старостам велел ити на реку на водокрестие. А сам князь великий вышол со всеми бояре своими на реку на Волхов, а священники и дьяконы выидоша со скресты, в той день приспел бо празникъ Крещениа Господня. А владыка в то время не бысть на Новегороде, а крестил воду владыка смоленьской да священники; и, воду окрестив, да пошли ко святей Софеи.

И князь великий велел своим бояром по своей думе, как себе здумали. Да нашим посадником да и людем тем учали говорити: «Посадники псковские, и бояре, и жалобныя люди, государь велел всем вам копитися на государьской двор исполна; а кой не поидет, ино боялся бы государевы казни, занеже государь хочет всем управу дати».

И посадники псковьскиа и бояре с одного пошли с воды на владычень двор. И бояре посадников спросили: «Уже ли есте сполна скопилися?» И посадников, и бояр, и купцов увели в полату, а молодшиа люди на дворе стояли. И влезли в полату, и бояре рекоша посадником, и бояром, и купцом псковским: «Поимани де естя Богом и великим князем Васильем Ивановичем всеа Русии». И туто посадники седеша и до своих жон, а молодших людей переписав и подаваша наугородцом по улицам беречи и кормити до управы.

И переняше псковичи полоняную свою весть от Филипа от Поповича от купчины от псковитина: а он ехал к Новугороду и стал у Веряжи,[354] и услышав злу весть, и оставя товар, и погонил ко Пскову, и сказал псковичам, что князь великий посадников наших, и бояр, и жалобных людей переимал. И нападе на них страх и трепет, и таковыя смяги пришли на их уста, и многажды приходили немцы ко Пскову, а таковыя беды и сухоты не бывало.

И вечь поставя, начаша думати, ставит ли щитъ против государя, запиратися ли во граде? Ино помянуша крестное целование, что не мощно рука воздвигнути против государя, а посадники и бояре и лутчие люди вси у него. И послаша псковичи к великому князю гонца своего Еустафья соцкого бити челом великому князю со слезами, от мала и до велика, чтобы — «Ты, государь нашь князь великий Василей Ивановичь, жаловал свою отчину старинную». И у великого князя своя мысль, чего ради поехал с Москвы в Великий Новгород, что ему превратити Псков на свои пошлины.

И посла князь великий своего дьяка Третьяка Долматова,[355] и псковичи обрадовалися от государя жалованья старины. Яже Третьяк имъ на вече и первую новую пошлину, поклон от великого князя: «Чтобы, деи, отчина моя, посадники псковские и псковичи, тольке хотите еще въ старины прожить, и вы бы есте две воли мои изволили: ино бы у вас вечья не было да и колокол бы есте сняли долой вечной, а здеся бы быти двем наместником, а по пригородам намеснику же быти, и вы ещо проживете въ старине. А только тех дву воль государю не изволите и не сотворите, ино как государю Богъ по сердцу положить, ино у него много силы готовой, ино тое кровопролитие на тех будет, хто государевы воли не сотворить. Да государь нашь князь великий хочеть побывати на поклон къ Святей Троицы во Псков». Да тое отговорив, да сел на степени.