Том 9 (Конец XIV - первая половина XVI века, подъем общественного значения литературы)

Кая убо нам спасениа надежда будеть, егда на земли живуще Божией, небрежениа мудръствуем? Кая нам полза срамно и зазорно житие имети? Тем же, паче всего внимание имеемъ о себе. И паче же освященнымъ Богови отвсюду подобаеть стяжати опасное внимание и брежение, и въ одеждахъ, и въ обущах, и въ образе, и въ зрении, и в хожении, и на пути, и на торжищи, и в дому, и вещающу, и молчащу, и обедающю, и въ всехъ просто благостройное и полезное. Богъ бо, рече, на сердце зрить, человек же — на лице; и сердечная убо умышления знаема суть Богу, человеци же от сущих вне знаменують внутренняа и не явленая: аще убо узрят кого не во благообразии суща, или в делех, или въ словесехъ зазрять, и тако отвне сущаго безчиннаго шатания судят и яже внутрь. И соблазнъ и предкновение бывает многым.

Сего ради глаголеть великий апостолъ Павелъ: «Непредкновенни бывайте июдеемь, и еллином, и церкви Божией».[679] Но и въ Священных правилех[680] написаша святии апостоли и о епископех, и о причетницех, и о простых человецех, еже яко не смехотворное и не безчинное житие имети нам. Такоже по святых апостолех пастыри, и учители, и преподобнии и богоноснии отци наши укрепиша, и уставиша, и въ священныа правила положиша на память и на утвержение последнему роду. Велико бо прочитающим священная правила и прочаа божественаа писания приобретение и полза бывает. И кто разумевая сих, той утружаяся, и подвизаяся, и поты проливая, искый уразумети любомудрие сих и волю Божию, и отбегая, яко от змия, от срамасловия, и суесловия, и собраниа бесед душавредящих, точию приемля заповеди Господня и предания и учениа святых апостолъ и преподобных и богоносных отець наших, и в сицевых играет и утешается, и радуеться душа их. Неже скомрахи, и плясци, и шахматы и тавлееми, ихже отрекоша святии апостоли и святии отцы.

Ныне же суть неции от священных, яже суть сии пресвитери, и диякони, и подъдиакони, и чтецы, и певци, глумятся и играют в гусли, въ домры, въ смыки, к сему жь и зернию, и шахматы, и тавлееми, и в песнех бесовьских, и в безмерном и премногом пианстве, и въсякое плотское мудрование и наслажение паче духовных любяще, и тако себе и иным велик вред бывающе.

И мы отныне наказуемь и святыми писанми воспоминаемь, еже не быти таковому безчинному обычаю, всякого студа, и срама, и зазрения исполненому. И наипаче же — во священнем сем дому пречистые Богородици, великиа и святейшиа митрополии всеа Руси, не глумитися, ни играти, ни презвитером, ни диаконом, ни поддиакономъ, ни чтецем, ни певцем, ни свещеносцем, ни пономарем, ни сторожемь и всем прочим простым человекомъ въ святемь сем месте пречистыя Богородици и великих чюдотворцевь Петра и Алексея.[681] Подбает бо живущим во священнем семь дому образ благь быти всем человеком.

Святии же апостоли и богоноснии отци заповедаша житие незазорно, и добродетелно, и благочестно имети всем человеком: и епископом, и пресвитером, и прочему священному причту, такоже и мирскым человеком. Якоже глаголеть святых апостолъ правило[682] 42: «Епископъ, или презвитеръ, или диаконъ, в зернехъ упражьняяся или въ пианстве, или да престанет, или да извержется». Тех же правило 43: «Иподиякон, или певець, или чтець, таковая же творя, или да престанет, или да отлучится. Такоже и простый человекъ». Толкование Ивана Занораса:[683] «Епископом и клирикомъ всем утешение всех къ добродетели быти подобает и прьвообразное и раздражение къ благодеанию. Понеже и от сих есть неким уклонятися от добраго, или шахматы и зернию играти, или упиватися, повелевает правило престати таковым, или убо епископом, и презвитером, и диаконом или изверзатися, и иподияконом же, и чтецем, и певцем, аще ли же не престанут, отлучатися. Такоже и мирьскым человеком, шахматы и пианьствы упражняющемся. «Не пити бо вина въ пианьстве», — рече Писание.[684] И паки: «Не упивайтеся вином, в немже есть блуд».[685]

Но ни же корчемническому предстати деланию клирикъ попущенъ есть, по девятому правилу иже въ Труле събора. Правило 9 шестаго собора иже въ Труле:[686] «Не достоит причетником корчемнаго храма имети. Аще бо возбранено есть причетником въ корчемницу входити, множае паче, еже иным въ корчемнице служити, и яже нелепо есть ему действовати. Аще же таковое что соделаеть, или престанет, или да извержется». Того же собора правило 50: «Ни единому от всех, или от клирикъ, или от простых человековъ, играти зернью. Отселе аще кто явится таковаа содевая, аще клирик, да отверженъ будет, аще ли простый человекъ, да отлучится».

Того же правило 51: «Отнуду отметает святый сей соборъ вселенскый глаголемыа глумотворци и позорища их. Такоже и ловления, и позорования, и плясания ни в домех, ни на торжищах не творти. Аще ли кто сия презрит и к некоему от заповеданых сих себе вдасть, аще ли клирикъ, да отверженъ будет, аще ли простый человекъ, да отлучится».