Том 9 (Конец XIV - первая половина XVI века, подъем общественного значения литературы)

Того же правило 61: «Иже волъхвом себе предающе или глаголемым сотником, или иным неким таковым, да от тех навыкнут, аще что им открыти хотят, по преже уставленым о них от святых отець, да повинуется епитемии[687] на шесть лет». Тацем же запрещением покорити подобает и водящих медведи или иныя некиа таковыя животныя на играние и вред простейшим, и случай, и получение, и рожение по звездословию и таковых некых глаголъ смущение по прелестным бледением глашающих, и глаголемых облакопрогонников, и чаровников, и наузников,[688] и волшебниковъ. Пребывающих же въ тех, и не пременяемых, и пе отбегающих от погубныхъ тех еллинских обычаевъ весма отметати от церкви повелеваем, якоже и священнии канони повелевають. Кое общение свету со тмою, якоже рече апостолъ, или кое сложение церкви Божии с кумиры, или кая часть верному с неверным, или кое съгласие Христови съ диаволом?!

Того же правило 62: «Такоже глаголемыя каланды, или глаголемыя вота и нареченныя врумахия, и въ перьвый день марта месяца совершаемое торжество[689] отнудь от верных граженствъ отъяти хотящим. Такоже и женская пред людми плясания, яко нечестивыа и мног вред и пагубу творити могуща, такоже и именем от еллин ложноименных боговъ или от мужей или от жен бывающая плясаниа и празднования по некакому древнему обычею и чюжему христианского житиа отметаем, заповедающе и никоемуже мужеви в женскую одежю облачитися, ни жене в мужския достойно, но ни же въ обличия игрецев и ликовствеников или козлогласования ходити, ни сквернаго Диониса имени, грозны топчюще в точилех, призывати,[690] ни же вина льюще в делви, смех подвизати, невежествия образом или суетою бесовския льсти деющихъ. Отселе убо начинающих что преже реченных творити, в разуме тех бывших, аще ли клирици суть, отврещи повелеваемъ, аще ли простци — отлучатися».

Того же Шестаго собора правило 24: «Да не леть будет кому, во священническом причатаемых чину или мниху, на уристание конное ходити или бесовских игрищь наслажатися. Но аще кто клирик на бракы званъ будет, егда прелестныа и́ введутся, да востанет и абие да отходит. Сице отческому и учительскому нам повелевающу. Аще же кто в сем обличен будет, да или престанет, или да извержется».

Или въ Лаодикии собора правило 53: «Яко не подобает христианом, позваном бывшемъ на брак, плескати или плясати, но честно съ говением вечеряти или обедати, якоже лепо есть христианом». Того же собора правило 54, яко «не подобает священником или клириком неких видений позоровати на брацех и на вечерях, но преже входа игрецов въстати им и отходити».

Иже въ Карфагени собора[691] от иже на конци правила пятагонадесять: яко «чадом священническим позорищь мирьскых не творити, ни же позорствовати. Сие же и всем християном всегда проповедано есть, да от таковых удаляются: и идеже хулениа суть, не преступати».

Сия убо тако глаголют священная правила. Подобно же сим и святый Ефрем глаголеть,[692] яко не подобает играти и глумитися, якоже и священная правила глаголют, яко ходяй на игрище со идолослужители имат часть. Якоже и великий апостолъ глаголеть: «Весте ли, братия моя любимая, како возвращаетеся въспять и пакы печетеся творити языческая? Всяк бо пекийся плотскыми, глумяся, не Христа ли совлекся есть, яко не чая слова воздати въ день судный. Якоже глаголеть Господь божествеными своими усты, яко и о праздне словеси слово въздадят человецы въ день он.[693] Да аще о словесех сицева суть неослабна, то о делех убо како сия будут?» И паки той же рече: «Христу зовущу пророки, и апостолы, и евангелисты, и от многих людий мало приходят. Егда же диавол позовет гусльми, и плясци, и песньми неприазнеными, тогда мнози събираются на то. Человеколюбец же Богъ призывет нас и глаголеть: “Приидете ко мне вси”,[694] то несть никтоже грядый, никтоже подвизаяся и тщася. А ненавидяй человековъ диавол аще наречетъ соборъ каковъ, то мнози стекутся. Егда же заповесться постъ или бдение, то вси ужаснуться и отпадутъ, и вси яко мертви будуть. И аще нарекутся пирове, или вечеря, или гусли, или свирели, или песни неприазненныя, то вси готови будут, и убудятся и потекут, друг друга зовый, и стекутся на злый той путь, и борются на злем том собрании, не якоже християном подобает, но якоже погынм». И паки рече: «Проповедало ти ся есть, брате, от апостола вся въ славу Божию творити».[695] Да въ плясании ли есть слава Божиа, яже ты поганскими делы диаволу угажаеши, а человеколюбца Бога не чтеши? Заповедало ти ся есть безпрестани Бога молити, а ты безпрестани смеешися и играеши. Аще ли хощеши разумети, яко бесовскаа есть служба игра, послушай апостола, глаголюща: «Не будите бесом служители, писано бо есть, яко седоша людие ясти и пити, и въсташа играти, и прогневаша Бога, и погибе их в том гресе две тме и три тысящи. Блюдися и ты, не люби игры, да не обрящешися тамо с бесовскыми слугами. Кождо бо свое бремя понесет и пожнет, еже всеял. Блюдися убо, и еда зде несееши трьние смехом и глумлением, а тамо жнеши слезы и рыдание».