Том 9 (Конец XIV - первая половина XVI века, подъем общественного значения литературы)

По преставлении же ею хотеста людие, яко да положен будет блаженный князь Петръ внутрь града, у соборныя церкви пречистыя Богородицы, Феврония же вне града в женстем манастыри, у церкви Воздвижения честнаго и животворящаго креста, ркуще, яко во мнишестем образе неугодно есть положити святых вь едином гробе. И учредиша им гроби особны и вложиша телеса их в ня: святаго Петра, нареченнаго Давида, тело вложиша во особный гроб и поставиша внутрь града в церкви святыя Богородицы до утриа, святыя же Февронии, нареченныя Еуфросинии, тело вложиша во особный гроб и поставиша вне града в церкви Воздвижения честнаго и животворящаго креста. Общий же гроб, егоже сами повелеша истесати себе вь едином камени, оста тощ в том же храме Пречистыя соборныя церкви, иже внутрь града. На утрии же, вставше, людие обретоша гроби их особныя тщи, в няже их вложиста. Святая же телеса их обретоста внутрь града в соборней церкви пречистыя Богородицы вь едином гробе, егоже сами себе повелеша сотворити. Людие же неразумнии, якоже в животе о них мятущеся, тако и по честнем ею преставлении: паки преложиша я во особныя гробы и паки разнесоша. И паки же на утрии обретошася святии вь едином гробе. И ктому не смеяху прикоснутися святем их телесем и положиша я во едином гробе, в немже сами повелеста, у соборныя церкви Рождества пресвятыя Богородица внутрь града, еже есть дал Богъ на просвещение и на спасение граду тому: иже бо с верою пририщуще к раце мощей ихъ, неоскудно исцеление приемлют.

Мы же по силе нашей да приложим хваление има.

Радуйся, Петре, яко дана ти бысть от Бога власть убити летящаго свирепаго змия! Радуйся, Февроние, яко в женстей главе святых муж мудрость имела еси! Радуйся, Петре, яко струпы и язвы на теле своем нося, доблествене скорби претерпел еси! Радуйся, Февроние, яко от Бога имела еси даръ в девьственней юности недуги целити! Радуйся, славный Петре, яко заповеди ради Божия самодержьства волею отступи, еже не остати супруги своея! Радуйся, дивная Февроние: яко твоим благословением во едину нощь малое древие велико возрасте и изнесоша ветви и листие! Радуйтася, честная главо, яко во одержании ваю в смирении, и молитвах, и в милостыни без гордости пожиста; темже и Христосъ дасть вам благодать, яко и по смерти телеса ваю неразлучно во гробе лежаще, духом же предстоита владыце Христу! Радуйтася, преподобная и преблаженная, яко и по смерти исцеление с верою к вам приходящим невидимо подаете!

Но молим вы, о преблаженная супруга, да помолитеся о нас, творящих верою память вашу!

Да помянете же и мене прегрешнаго, списавшаго сие, елико слышах, неведыи, аще инии суть написали, ведуще выше мене. Аще убо грешен есмь и груб, но на Божию благодать и на щедроты его уповая и на ваше моление ко Христу надеяся, трудихся мыслми. Хотя вы на земли хвалами почтити, и не у хвалы коснухся. Хотех вама ради вашего смиреннаго самодержьства и преподобьства по преставлении вашем венца плести, и не уплетения коснухся. Прославлени бо есте и венчани на небесех истинными нетленными венцы ото общаго всехъ владыки Христа, емуже подобает со безначалным его Отцем купно и с пресвятымъ, благим и животворящим Духом всяка слава, честь и поклонение ныне и присно и въ веки векомъ. Аминь.

ПОВЕСТЬ О РЯЗАНСКОМ ЕПИСКОПЕ ВАСИЛИИ

О ГРАДЕ МУРАМЕ И О ЕПИСКОПЬИ ЕГО, КАКО ПРЕИДЕ НА РЯЗАНЬ

Слышах убо некиа глаголющих древняя сказаниа о граде Мураме, яко в прежняя лета бысть создан не на том месте, идеже ныне есть, но беяше негде в той же области, отстояние же имея немало от нынешняго града. Сказание же о нем, яко преславен град бяше в Росийстей земли во дни древняя. Многим же летом прешедшим, разорися некако и запусте, и потом по многих летех пренесен бысть на ино место вскраи тояже области и ту поставлен бысть, идеже и ныне есть.

Егда же бысть в Киеве и во всей Русии держава превеликаго князя и святаго равна апостолом Владимира,[806] и внегда ему дети своя разделити во одержание градов, предасть сынови своему, рку же святому Борису, в Росийстей земли град Росьтов, и сынови же своему, рку же святому Глебу град Мурам. Ис тех градов бысть по Христе и страдание ею,[807] и якоже святыня ею познана бысть от верных и прославися во святых церквах. И беяху в тех градех одержания их епископи, и нарицахуся тии епископи домовнии святых страстотерпец Бориса и Глеба. Потом же два князи от тогова же сродства святого превеликаго князя Владимира, присная суще себе братиа, начаша державствовати: вящешии во граде Мураме, мнии же в Рязани.

Не в колика же времена бысть во граде Мураме епископъ праведенъ, именем Василие.[808] Сего же добляго жития не терпя враг, иже древний душам разбойник, нача на нь спону творити, яко да прилична его блудному делу сотворити. И воображаяся в девицу, и показуя себе из храмины епископа овогда во оконце его, иногда же преход творя из храмины его. Видевши же се, мног народ соблазнися, такоже и велможа. И приидоша кь епископу в домъ, да сея ради вины изгонят и сь епископии.