Том 9 (Конец XIV - первая половина XVI века, подъем общественного значения литературы)

ПОВЕСТЬ О ПЕТРЕ, ЦАРЕВИЧЕ ОРДЫНСКОМ

Подготовка текста и комментарии Р. П. Дмитриевой, перевод Л. А. Дмитриева

ОРИГИНАЛ

МЕСЯЦА ИЮНЯ, В 29 ДЕНЬ. ЖИТИЕ БЛАЖЕННАГО ПЕТРА, БРАТАНИЧА ЦАРЯ БЕРКИ,[96] КАКО ПРИИДЕ ВЪ СТРАХ БОЖИЙ И УМИЛИСЯ ДУШЕЮ, И, ПРИШЕД ИЗЪ ОРЬДЫ В РОСТОВЪ[97] В ЛЪТО 6761 И КРЕСТИСЯ, И КАКО ВИДЕНИЕ ВИДЕ СВЯТЫХ АПОСТОЛЪ ПЕТРА И ПАВЛА НА ПОЛИ, ИДЕЖЕ НЫНЕ ЦЕРКОВЬ СТОИТ СВЯТЫХЪ АПОСТОЛЪ ПЕТРА И ПАВЛА И МОНАСТЫРЬ СОТВОРЕН

Благослови, отче!

Святому епископу ростовьскому Кирилу[98] ходящу в татары с честию къ царю Берьке за дом святыа Богородица.[99] Царь же слышавъ от него о святем Леонтии,[100] еже от Гречьскиа земля родомъ, како крести град Ростовъ, како увери люди, како благословением патриарха прииде, и како честь приа от русскых князий и от гречьскаго царя и патриарха и от всего вселеньскаго събора, и како по преставлении его сдеваются чюдеса от ракы мощий его и до сего дни. И ина многа поучениа от евангельских святых указаний.

И, слышавъ царь Берка от епископа, възрадовася и почти и его и вдасть ему, егоже требует, и отпусти и его. Да смею рещи, царь Берка повеле по его бо животе князи ярославьстии годовнии оброкы носят над гробъ его.

В то же лето разболеся сынъ его, единъ бо бе у него. Царь же от врачевъ не обрете никоеа ползы, но умысли сице: пославъ в Ростовъ по святаго владыку и обеща ему дары многы, да исцелит сына его. Владыка же повелевъ пети мльбены в Ростове по всему граду, освятивъ воду и, пришед в татары, исцели сына царева. Царь же възрадовася съ всем домомъ и съ всею Ордою своею и повеле давати владыце оброкы годовнии в домъ святыа Богородица.

Некто же отрокъ, брата царева сынъ, юнъ сый, предстоя пред царемъ всегда, слыша поучениа святаго владыкы, умилися душею и прослезися. Выходя на поле уединяяся и размышляа: «Како си веруют цари наши солнцу сему и месяцу, и звездамъ и огневи? И кто сей есть истинный Богъ?» Размышляа, акы древний Аврамъ.[101] От благаго корене и леторасль блага, а съй отрокъ — от злаго корене леторасль блага. И умысли сице — ити съ святымъ владыкою и злаго корене леторасль блага. И умысли сице — ити съ святымъ владыкою и видети божницу Русскиа земля и чюдеса, бываема от святых, и глаглолаше: «В наших странах от солнца сего, и от месяца, и от звездъ, и от огня чюдеса не бывают».

Бе бо тъгда отцю его, брату цареву, умръшу, а матери его дръжащи многа имениа ему. Он же вся та ни во чтоже мняше душею своею, разве единоа веры. Мати же его, слезящи о размысле отрока, и показа ему имениа многа отца его. Онъ же вся та разда нищим татарьскым требующимъ и многа имениа владыце вдавъ.

И утаився всех, акы древний Мелхиседекъ,[102] сынъ царевъ, избежа, велию себе благодать прежде крещениа приобрете, иерей саномъ почтеся, тако и съй отрокъ приа прежде крещениа сице в разумъ. О таковых Богъ в Еуангелии рече: «Мнози будут прьвии последнии, а последнии — прьвии». И прииде съ владыкою в Ростовъ, виде церковь, украшену златомъ и жемчюгомъ и драгым камениемъ, акы невесту украшену. В ней пениа доброгласная, якоже аггельска: бе бо тогда въ церкви святыа Богородица левый клиросъ греческы пояху, а правый русскый.

Слышав же сиа отрокъ, сый в неверии, и огнь възгореся въ сердци его, взыде луна въ уме его, възсиа солнце въ души его, припаде к ногама святаго владыкы и рече: «Господи, святче Божий, азъ размышлях о бозех царевых и о родительскых, и о солнци, и о луне, и о огни — яко тварь суть, а ваша вера права и добра, вашь Богъ истинный. Молю тя, да бых и азъ приялъ святое крещение». Владыка же почти и его и повеле ждати, бе бо размышляа о искании отрока.

И по мале времени царю Берке умръшу. Орде мятущися и искания отроку не бе, крести сего отрока святый владыка[103] и нарече имя ему Петръ. И бе Петръ в учении Господни по вся дни въ святилище у владыки. И преставися святый владыка Кирилъ, и погребоша его честно с песньми; вечная ему память! И приа престолъ святый владыка Игнатий;[104] и нача крыти оловомъ и дно мостити мраморомъ храмъ святыа Богородица ростовскиа, въ Орду ходя, емля оброкы царьскиа. Петръ же, яко навыче у владыкы, молитвы плачевныа дневныа и нощныа приносити къ Богу и непристаннаго поста не оставаяся.

И царьские своеа не преставая утехы: бе выездя при езере Ростовстем птицами ловя. И единою же, ему при езере ловящу, по обычней молитве усну. И вечеру глубоку сущу, и приидоста к нему два мужа светла, сущу акы солнце, и възбудиста и, глаголюще: «Друже Петре, услышана бысть молитва твоа и милостыня твоя взыдоша пред Богом».