Том 9 (Конец XIV - первая половина XVI века, подъем общественного значения литературы)

Князь же всед на конь и, глумяся, рече Петру: «Владыка тебе церковь устроит, а язъ места не дамъ! Что сътвориши?» Петръ же рече: «Повелениемъ, княже, святых апостолъ азъ куплю у тебя, елико отлучить благодать твоя, от земля сиа». Князь же, яко виде мешца Петровы въ епископии, помолча, помысли: «У тебе колико отлучит от ужасти владыкы от святых апостолъ». И рече к себе: «Аще мощно сему быти, яко при Ильи бысть: “Горьсть мукы не оскудееть, водоносъ воды не погибнеть, чванець масла не умалится”?»[109] И рече, играя, Петру: «Петре, въпрошу тя: якоже вдалъ еси на иконах, такоже по моей земли кладеши ли 9 литръ сребра, а 10 злата? Сътвориши ли тако?» Петръ же рече: «Святии апостоли рекоша ми, якоже владыка ми повелит сътворити, сътворю. Да въпрашаю, господи». И въпроси владыкы. Владыка же, вземъ крестъ, благослови Петра и рече: «Чадо Петре, Господь рече своими усты: “Всякому просящему у тебе, дай”, — и ты убо, чадо, не пощади имениа родитель, пишет бо ся: “Чванець масла не умалится, горсть мукы не оскудееть”. Молитвою, чадо, святых апостолъ род твой благословенъ будеть, дай же князю волю, якоже хощеть». Петръ же поклонися владыце до земли и, верова глаголомъ его, пришед къ князю и рече ему: «Да будеть, княже, воля святых апостолъ и твоя повелениа, княже».

И повеле князь изврещи вервь от воды до ворот и от ворот до угла, от угла возле езеро — се место великое. Петръ же рече: «Да повелиши, князь, ровъ копати, якоже в Орде бываеть, да не будет погибениа месту тому». И бысть тако: и гражане, иже провожааху иконы, в той час ископаша ровъ, иже есть доныне. Петръ же нача от воды класти, емля из мешець по единому, 9 литръ сребра, а 10-й злата. Наполниша възила Петровых кунъ, и ты колесници, на нихже клеть възили, едва можаху како двизатися им.

Видев же князь и владыка множество злата и сребра, еже бы 10 выход дати, а мешца целы, и реша к себе: «Что се есть, Господи? Не по нашимъ грехомъ сеа сътвори! Велию бо благодать человекъ си обрете пред Богом, дивимся милости твоей и силе святых апостолъ». И поставиша стражы у двора Петрова обешанныа люди, иже на молебне, и повелеша Петру ити на конь. И бысть радость велика въ граде, почтиша Петра великою честью и многими дары, и на многи дни поюще молбны, прославляху Бога и святых и апостолъ о чудеси, бывшим в наша дни, и многу даянию бывшу милостыня и кръмление нищим.

Не ведяше же Петръ, что ся се сътворися о чюдеси семъ и бе молча, уединяася. И видев же владыка и князь Петра умлъкающи и реша к себе: «Аще сей мужь, царево племя, идеть в Орду, и будет спона граду нашему». Бе бо Петръ възрастом великъ, а лицемъ красенъ. И реша ему: «Петре, хощеши ли, поимем за тя невесту?» Петръ же, прослезися, отвеща князю и владыце: «Аз, господи, възлюбих вашу веру и оставих родительскую веру, приидох к вам. Воля Господня да ваша буди». Княз же поя ему от великих велможъ невесту, беша бо тогда в Ростове ординьстии велможа. Владыка же венча Петра и устрои церковь ему и святи ю по заповеди святыхъ апостолъ.

Князь же поимаше Петра на царьскую утеху, около озера съ ястребы тешаше его, дабы ся в нашей вере удръжалъ. И рече ему князь: «Велию бо ты благодать обрете пред Богомъ и граду нашему. Писано бо есть, что “Въздамъ Господеви от всех, яже въздасть нам”. Приими, Петре, малое се земли нашея вътчины противу дома святых апостолъ от езера сего. Азъ тебе грамоты испишу». Отвещав же Петръ: «Аз, княже, от отца и от матери не знаю землею владети, и грамоты сиа чему суть?» Князь же рече: «Азъ тебе все уряжу, Петре. А грамоты суть на се: да не отъимают тех земель мои дети и мои внуци у твоих детей и внуковъ по нас». Петръ же рече: «Да буди, княже, воля Господня». И повеле князь пред владыкою писати грамоты множество земель от езера, воды и лесы, яже суть и доныне; и урядиша Петру домы по его землямъ. Орда же тогда тиха бе и на многа лета.

Бяху бо Петрови сладци ответи и добрыа обычая въ всемъ. И толми любляше князь Петра, яко и хлеба без него не ясть, яко владыце братати Петра въ церкви съ княземъ. И прозвася Петръ братъ князю. И родишася Петру сынове в него место.

И по малых летех святый епископъ Игнатей преставися и приат Царство Небесное. И вечнаа ему память!

Старый же князь по владыце не по мнозех днех преставися. И сего князя дети зваху Петра дядею и до старости. И мирна лета много живша, преставися Петр же въ глубоце старости, въ мнишьском чину къ Господу отъиде, егоже възлюби. И положиша у святаго Петра и Павла, у его спалища. И от того дне уставися монастырь сей.[110]

Внуци же стараго князя забыша Петра и добродетель его и начаша отъимати лузи и украины земли у Петровых детей. Сынъ же Петровъ шед въ Орду, сказася брата царева внукъ. Възрадовашася дяди, и почтиша его, и многы дары даша ему, и посолъ у царя исправиша ему. Пришед же посолъ царевъ в Ростов и, възревъ грамоты Петровы и стараго князя, и суди их. И положи рубежы землям по грамотамъ стараго князя и оправи Петрова сына и давъ ему грамоту съ златою печатию, еже у младых князей — внукъ стараго князя, по цареву слову. И оттоиде.