Требник гражданским шрифтом

И пою́т: Святы́й Бо́же: Проки́мен, гла́с 6:

Блаже́н пу́ть, во́ньже по́йдеши душе́:

Сти́х: Обрати́ся душе́ моя́ в поко́й тво́й.

Апо́стол к кори́нфяном, зача́ло 162.

Бра́тие, не вся́ка пло́ть, та́же пло́ть: но и́на у́бо пло́ть челове́ком, и́на же пло́ть ското́м, и́на же ры́бам, и́на же пти́цам. И телеса́ небе́сная, и телеса́ земна́я: но и́на у́бо небе́сным сла́ва и и́на земны́м. И́на сла́ва со́лнцу, и и́на сла́ва луне́, и и́на сла́ва звезда́м: звезда́ бо от звезды́ ра́знствует во сла́ве. Та́кожде и воскресе́ние ме́ртвых: се́ется в тле́ние, востае́т в нетле́нии. Се́ется не в че́сть, востае́т в сла́ве: се́ется в не́мощи, востае́т в си́ле. Се́ется те́ло душе́вное, востае́т те́ло духо́вное: е́сть те́ло душе́вное, и е́сть те́ло духо́вное. Та́ко и пи́сано е́сть: бы́сть пе́рвый челове́к Ада́м в ду́шу жи́ву, после́дний Ада́м в ду́х животворя́щ.

Сти́х: Блаже́н, его́же избра́л и прия́л еси́ Го́споди.

Сти́х: Душа́ его́ во благи́х водвори́тся.

Ева́нглие от Иоа́нна, зача́ло 21.

Рече́ Госпо́дь ко прише́дшым к нему́ иуде́ем: а́з е́смь хле́б живо́тный, гряды́й ко мне́, не и́мать взалка́тися: и ве́руяй в мя́, не и́мать вжажда́тися никогда́же. Но ре́х ва́м: я́ко и ви́десте мя́, и не ве́руете. Все́ е́же да́ст мне́ оте́ц, ко мне́ прии́дет: и гряду́щаго ко мне́ не изжену́ во́н. я́ко снидо́х с небесе́, не да творю́ во́лю мою́, но во́лю посла́вшаго мя́ отца́. Се́ же е́сть во́ля посла́вшаго мя́ отца́, да все́, е́же да́ст ми́, не погублю́ от него́, но воскре́сшу е́ в после́дний де́нь.

И а́бие быва́ет после́днее целова́ние, певце́м пою́щым стихи́ры сия́. Гла́с 8.

Подо́бен: О пресла́внаго чудесе́!

О кто́ не воспла́чет, ча́до мое́, е́же от жития́ сего́ плаче́вное твое́ преставле́ние! я́ко младе́нец незре́лый от ма́терних объя́тий, ны́не я́коже птене́ц ско́ро отлете́л еси́, и к созда́телю все́х избе́гл еси́. о ча́до, кто́ не воспла́чет, зря́ твое́ я́сное лице́ увяда́емо, е́же пре́жде я́ко кри́н кра́сный? о кто́ не возстене́т, ча́до мое́, и с пла́чем не возопие́т. мно́гаго твоего́ благоле́пия и красоты́ жи́тельства твоего́? я́коже бо кора́бль сле́да не имы́й, си́це заше́л еси́ от о́чию ско́ро: прииди́те дру́зи мои́, сро́дницы и бли́жнии, вку́пе со мно́ю сего́ целу́ем, ко гро́бу посыла́юще.

Сме́рть младе́нцем осла́ба: жите́йских бо зо́л неприча́стни яви́шася, и к поко́ю приспе́ша, и ра́достию небе́сною во Аавраа́млих не́дрех ра́дуются, и Младе́нец святы́х Боже́ственным лико́м ны́не свеселя́тся, и ве́рно лику́ют, я́ко от тле́ния грехолю́бнаго чи́сты отидо́ша.

Сла́ва, гла́с 6:

Боле́знь Ада́му бы́сть дре́ва вкуше́нием дре́вле во еде́ме, егда́ зми́й я́д изблева́. те́м бо вни́де сме́рть всеро́дная, снеда́ющая челове́ка. но прише́д Влады́ка, низложи́ зми́я, и упокое́ние на́м дарова́. к нему́ у́бо возопии́м: пощади́ спа́се, и я́же прия́л еси́, со избра́нными твои́ми упоко́й.

И ны́не, богоро́дичен: Преложе́ние скорбя́щих, свобожде́ние немощству́ющих су́щи Богоро́дице Де́во, спаса́й гра́д и лю́ди, ра́туемых ми́ре, обурева́емых тишино́, еди́но предста́тельство ве́рных.

Та́же, Трисвято́е. Пресвята́я Тро́ице: О́тче на́ш: Я́ко твое́ е́сть Ца́рство:

Та́же тропари́: Со ду́хи пра́ведных:

И помина́ет по обы́чаю, глаго́ля ектению́ вышепи́санную, и моли́тву.

Та́же, диа́кон: Прему́дрость.

Ли́к: Честне́йшую херуви́м:

Сла́ва, и ны́не:

Го́споди поми́луй, три́жды. Благослови́.

Иере́й же твори́т отпу́ст се́й:

Воскресы́й из ме́ртвых, и живы́ми и ме́ртвыми облада́яй, Христе́ и́стинный Бо́же на́ш, моли́твами пресвяты́я твоея́ ма́тере, и все́х святы́х твои́х, ду́шу от на́с преста́вленнаго Младе́нца, и́мярек, в ски́ниях святы́х всели́: и с пра́ведными причти́, я́ко бла́г и человеколю́бец.

Ли́к: Ами́нь.

По отпу́сте же глаго́лет иере́й:

Ве́чная твоя́ па́мять, достоблаже́нне и приснопомина́емый младе́нче, и́мярек.

Ли́к же пое́т, три́жды: Ве́чная па́мять.

Посе́м свяще́нник глаго́лет моли́тву сию́:

Ре́кшу диа́кону: Го́споду помо́лимся.

И певце́м: Го́споди поми́луй.

Храня́й младе́нцы Го́споди, в ны́нешнем житии́, в бу́дущем же ве́це угото́вавый и́м простра́нство, Аавраа́мово ло́но, и по чистоте́ а́нгельская светообра́зная места́, в ни́хже водворя́ются пра́ведных ду́си: ты́ са́м Влады́ко Христе́, ду́шу раба́ твоего́ младе́нца, и́мярек, приими́ с ми́ром. ты́ бо ре́кл еси́: оста́вите де́ти приити́ ко мне́, таковы́х бо е́сть Ца́рство небе́сное. Тебе́ бо подоба́ет вся́кая сла́ва, че́сть и поклоне́ние, со отце́м, и святы́м ду́хом, ны́не и при́сно, и во ве́ки веко́в, ами́нь.

И взе́мше те́ло и́дут ко гро́бу предъиду́щым иере́ом и диа́коном и всему́ кли́ру, пою́щым: Святы́й Бо́же:

Вложи́вше же мо́щи во гро́б, иере́й нача́льствуяй взе́м лопа́ту, сы́плет зе́млю во гро́б глаго́ля:

Госпо́дня е́сть земля́, и исполне́ние ея́, вселе́нная и вси́ живу́щии на не́й.

И отхо́дят благодаря́ще Бо́га.

Коне́ц погребе́нию младе́нческому.

После́дование усо́пших младе́нцев (параста́с)

быва́ет я́коже и мирски́х челове́к, оба́че ектениа́ из чи́на погребе́ния младе́нческаго, с моли́твою:

Го́споди Иису́се Христе́ Бо́же на́ш, породи́вшимся: