Требник гражданским шрифтом

Ничто́же е́сть ма́тере сострада́тельншее ничто́же е́сть отца́ умиле́ншее: утро́бы бо и́х смуща́ются, егда́ младе́нцы отсю́ду предсыла́ют: ве́лия жа́лость ю́же и́мут сердца́ и́х, отроча́т ра́ди, наи́паче егда́ су́ть благоглаго́ливая, помина́юще словеса́ и́х с пе́снию: аллилу́иа.

Мно́гажды бо пред гро́бом сосцы́ бию́т и глаго́лют: о сы́не мо́й и ча́до сладча́йшее, не слы́шиши ли ма́тере твоея́, что́ веща́ет? се́ и чре́во носи́вшее тя́: чесо́ ра́ди не глаго́леши, я́ко глаго́лал еси́ на́м? но та́ко молчи́ши глаго́лати с на́ми: аллилу́иа.

Бо́же Бо́же, призва́вый мя́, утеше́ние ны́не бу́ди до́му моему́, пла́чь бо ве́лий случи́ся и́м: на мя́ бо взира́ху вси́, единоро́дна мя́ си́и иму́ще. но ты́ рожде́йся от ма́тере Де́вы, ма́тере моея́ утро́бы прохлади́, и ороси́ се́рдце отца́, и́мже: аллилу́иа.

Та́же конда́к, гла́с 8: Со святы́ми упоко́й:

Пе́снь 7.

Ирмо́с: О́троцы евре́йстии в пещи́, попра́ша пла́мень дерзнове́нно, и на ро́су о́гнь преложи́ша, вопию́ще: благослове́н еси́ Го́споди Бо́же во ве́ки.

Припе́в: Го́споди, упоко́й младе́нца.

Напиши́ в кни́зе спаса́емых, я́ко человеколю́бец ще́дрый, твоего́ младе́нца, да ра́дуяся вопие́т держа́ве твоея́ сла́вы: благослове́н еси́.

Све́том твоего́ сло́ве лица́ просвети́ младе́нца твоего́, ве́рою преста́вльшагося ны́не к тебе́ незре́лым во́зрастом, и воспе́вшаго тебе́: Го́споди Бо́же, благослове́н еси́.

Сла́ва: Ско́рби вино́вно показа́ся лю́бящым тя́ ны́не разлуче́ние твое́, но тебе́ вои́стинну ра́дости и весе́лия хода́тайственно: насле́диши бо младе́нче живо́т во ве́ки,

И ны́не, богоро́дичен: Ви́ждь ско́рбь мою́ Де́во, ю́же ми́ наведе́ мно́жество зо́л мои́х, и пре́жде исхо́да охла́ду ми́ пода́ждь ма́терними моли́твами, во е́же ми́лостиву ми́ бы́ти Бо́гу.

Пе́снь 8.

Ирмо́с: Седмери́цею пе́щь. халде́йский мучи́тель богочести́вым неи́стовно разжже́, си́лою же лу́чшею, спасе́ны сия́ ви́дев, творцу́ и изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся́ ве́ки.

Припе́в: Го́споди, упоко́й младе́нца.

В не́дрех Аавраа́млих тя́, в селе́ниих поко́я, иде́же ра́дость пра́зднующих всегда́, в ме́стех осла́бы, иде́же е́сть вода́ живу́щая, счини́т тя́ Христо́с на́с ра́ди младе́нствовавый, пою́щих ему́ непреста́нно: свяще́нницы воспо́йте, лю́дие превозноси́те его́ во ве́ки.

Печа́ли на́м всевино́вное, и слеза́м приснопа́мятное твое́ разлуче́ние вои́стинну бы́сть: пре́жде бо вкуше́ния в житии́ се́м красо́тных, оста́вил еси́ зе́млю, и роди́телей не́дра: но у́бо Аавраа́мле тя́ прия́т не́дро я́ко младе́нца, и вся́кия неприча́стна скве́рны.

Сла́ва: Что́ мя пла́чете младе́нца преста́вльшагося? лежа́й вопие́т неви́димо, не́смь бо плаче́вный: младе́нцем бо определи́ся пра́ведных все́х ра́дость, досто́йная слеза́м не соде́лавшым дела́. Христу́ бо воспева́ют: свяще́ннии по́йте, лю́дие превозноси́те его́ во ве́ки.

И ны́не, богоро́дичен: В по́мощь мою́ Богоро́дице воста́ни, вонми́ моли́тве мое́й, и изба́ви мя́ лю́таго осужде́ния, тя́жкаго испыта́ния, тьмы́ и огня́, и скре́жета зу́бнаго, бесо́вскаго же нало́га, и вся́кия ну́жды, наде́ждо ненаде́жных, животе́ отча́янных.

Пе́снь 9.

Ирмо́с: Ужасе́ся о се́м не́бо, и земли́ удиви́шася концы́: я́ко Бо́г яви́ся челове́ком пло́тски, и чре́во твое́ бы́сть простра́ннейшее небе́с. те́м тя́ Богоро́дицу а́нгелов и челове́к чинонача́лия велича́ют.

Припе́в: Го́споди, упоко́й младе́нца.

Христе́ младе́нствовавый кроме́ премене́ния, и кресту́ приобщи́выйся во́лею, и на ма́терния боле́зни ро́ждшия тя́ воззре́вый, печа́ль облегчи́, и боле́знь лю́тую, младе́нца уме́ршаго ве́рных роди́телей: да сла́вим держа́ву твою́.

Посла́вый с высоты́ всецарю́, и приимы́й блаже́ннаго младе́нца, я́ко чи́стую Влады́ко пти́цу в гне́зда небе́сная, спа́сл еси́ сего́ ду́х от се́тей многови́дных, и с пра́ведными ду́хи совокупи́, услажда́я Ца́рствия Твоего́.

Сла́ва: Ничто́же сотво́ршым сло́ве Бо́жий, младе́нцем по́дал еси́ селе́ние небе́сное: си́це бо благоволи́л еси́ бла́же, с те́ми чи́слити созда́ние твое́. младе́нцу приити́ ны́не к тебе́, боле́знь роди́телей са́м облегчи́, я́ко всеще́дрый и человеколюби́вый.

И ны́не, богоро́дичен: О́ком серде́чным вы́ну взира́ю к тебе́, ма́тернюю иму́щей моли́тву, ко из тебе́ ро́ждшемуся: тя́ бо пою́ всечи́стая, успи́ стра́сти моея́ души́, ко у́тру покая́ния воздви́гни мя́ отрокови́це, и све́том твои́м просвети́.

Та́же, ектениа́ ма́лая.

И ексапостила́рий:

Ны́не, упоко́ихся, и обрето́х осла́бу мно́гу, я́ко преста́вихся от истле́ния, и преложи́хся к животу́: Го́споди, сла́ва Тебе́.

И лю́дие то́йжде.

Сти́х: Челове́к я́ко трава́, дни́е его́ я́ко цве́т се́льный:

Сти́х: Я́ко ду́х про́йде в не́м, и не бу́дет:

Сти́х: И и́стина Госпо́дня пребыва́ет во ве́к.

И на ки́йждо сти́х ексапостила́рий.

Та́же, Сла́ва, и ны́не: Ны́не избра́х богома́терь отрокови́цу, я́ко роди́ся из нея́ Христо́с, все́х изба́витель: Го́споди, сла́ва тебе́.

А́бие же свяще́нник возглаша́ет:

Я́ко свя́т еси́ Бо́же на́ш, и на святы́х почива́еши, и тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно и во ве́ки веко́в.

Ли́к: Ами́нь.