Требник гражданским шрифтом

Се́ и стихи́и, не́бо и земля́ изменя́тся, и вся́ тва́рь в нетле́ние облече́тся: разруши́тся тле́ние, и поги́бнет тьма́ в прише́ствии твое́м: и́маши бо па́ки приити́ со сла́вою, я́коже пи́сано е́сть, возда́ти кому́ждо, я́коже соде́ла. Влады́ко Христе́, его́же избра́л еси́, со избра́нными твои́ми упоко́й.

Сла́ва, гла́с 6.

Прииди́те и ви́дите вси́ стра́нное и гро́зное виде́ние все́м познава́емое, о́браз ны́не ви́димый, и не ктому́ му́дрствуйте привре́менная. дне́сь душа́ от те́ла разлуча́ется, к ве́чному преставля́ема ми́ру: в пу́ть бо и́дет, и́мже никогда́же ше́ствова, и к судии́ нелицеприе́мному, иде́же предстоя́т а́нгелов чи́ни. стра́шно бо, бра́тие мои́, суди́ще о́но, иде́же вси́ предста́нем на́зи! о́вии у́бо венчава́еми, о́вии же посрамля́еми. те́мже возопии́м к безсме́ртному Царю́: егда́ и́маши испыта́ти сокрове́нная челове́ческая, пощади́ раба́ твоего́, его́же прия́л еси́, Го́споди человеколю́бче.

И ны́не, богоро́дичен:

Моли́твами Христе́ ро́ждшия тя́, и предте́чи твоего́, апо́столов, проро́ков, иера́рхов, преподо́бных и пра́ведных, и все́х святы́х, усо́пшаго раба́ твоего́ упоко́й.

Та́же: Бла́го е́сть испове́датися Го́сподеви: ве́сь. Трисвято́е. По О́тче на́ш:

Поко́й спа́се на́ш с пра́ведными раба́ твоего́, и сего́ всели́ во дворы́ твоя́, я́коже е́сть пи́сано, презира́я я́ко бла́г прегреше́ния его́, во́льная и нево́льная, и вся́ я́же в ве́дении и не в ве́дении, человеколю́бче.

В поко́ищи твое́м Го́споди, иде́же вси́ святи́и твои́ упокоева́ются, упоко́й и ду́шу раба́ твоего́, я́ко еди́н еси́ человеколю́бец.

Ма́ти свята́я неизрече́ннаго све́та, а́нгельскими тя́ пе́сньми почита́юще, благоче́стно велича́ем.

Диа́кон глаго́лет:

Поми́луй на́с Бо́же, по вели́цей ми́лости твое́й, мо́лим ти ся, услы́ши и поми́луй.

По возгла́се моли́твенном быва́ет целова́ние, ли́ку пою́щу стихи́ры, гла́с 2:

Прииди́те, после́днее целова́ние:

И про́чая, я́коже преднаписа́шася в после́довании мирско́м.

Та́же: Сла́ва, гла́с 6: Зря́ще мя́ безгла́сна:

И ны́не, богоро́дичен:

Отходя́ще же ко гро́бу пою́т свяще́нницы ирмосы́ вели́каго кано́на, си́есть:

Помо́щник и покрови́тель: И про́чая. Трисвято́е. По О́тче на́ш:

В поко́ищи твое́м, Го́споди:

Еди́на чи́стая и непоро́чная Де́во:

Та́же, Поми́луй на́с Бо́же: и про́чее, я́ко обы́чно. Бо́же духо́в:

И погреба́ются мо́щи.

И быва́ет соверше́нный отпу́ст.

Глава 20. Чи́н погребе́ния младе́нческаго

По е́же благослови́ти свяще́ннику, певцы́ пою́т:

Живы́й в по́мощи вы́шняго:

И посе́м, Аллилу́иа, во гла́с 8.

Сти́х: Блаже́н, его́же избра́л:

Сти́х: И па́мять его́ в ро́д и ро́д.

Трисвято́е. И по О́тче на́ш: Я́ко твое́ е́сть Ца́рство:

Та́же, Глубино́ю му́дрости человеколю́бно:

Сла́ва: Творца́ и зижди́теля и Бо́га на́шего:

И ны́не: Тебе́ и сте́ну и приста́нище и́мамы:

Та́же, 50 псало́м.

И посе́м начина́ет кано́н поко́йный над младе́нцем сконча́вшимся. Гла́с 8.

Пе́снь 1.

Ирмо́с: Во́ду проше́д я́ко су́шу, и еги́петскаго зла́ избежа́в, изра́ильтянин вопия́ше: изба́вителю и Бо́гу на́шему пои́м.

Припе́в: Го́споди, упоко́й младе́нца.

Пло́тию обнища́вый сло́ве Бо́жий, и младе́нец бы́ти благоволи́вый кроме́ премене́ния, в не́дрех Аавраа́млих, мо́лим, его́же прия́л еси́, сочета́й младе́нца.

Отроча́ ви́ден бы́л еси́ пре́жде все́х веко́в сы́й, и отроча́том я́ко бла́г твое́ обеща́л еси́ Ца́рство: тому́ настоя́щаго причти́ младе́нца.

Сла́ва: Пре́жде иску́са земны́х сла́достей, прия́л еси́ Христе́ спа́се, непоро́чнаго младе́нца, ве́чных сподобля́яй благи́х, я́ко человеколю́бец.

И ны́не: Прему́дрость и сло́во о́тчее неизрече́нно ро́ждшая, души́ моея́ лю́тую исцели́ я́зву, и серде́чную боле́знь укроти́.

Пе́снь 3.

Ирмо́с: Небе́снаго кру́га верхотво́рче Го́споди, и це́ркве зижди́телю, ты́ мене́ утверди́ в любви́ твое́й, жела́ний кра́ю, ве́рных утвержде́ние, еди́не человеколю́бче.

Припе́в: Го́споди упоко́й младе́нца.

Пресоверше́нный сло́ве, Младе́нц яви́выйся соверше́нный, младе́нца несоверше́нна во́зрастом к себе́ преста́вил еси́: его́же упоко́й с пра́ведными все́ми благоугоди́вшими тебе́, еди́не человеколю́бче.

Мирски́х сла́достей не вкуси́вша восхище́на преми́рных ще́дре благи́х прича́стника покажи́, мо́лимся, нерастле́ннаго Младе́нца, его́же преложи́л еси́ Боже́ственным повеле́нием твои́м.

Сла́ва: Небе́сных черто́гов, и све́тлаго поко́я, и свяще́ннейшаго ли́ка святы́х, Го́споди прича́стника сотвори́ чисте́йшаго младе́нца, его́же я́ко благоволи́л еси́ спа́се, преста́вил еси́.

И ны́не: Лиши́выйся от все́х, к твоему́ пречи́стая Влады́чице и еди́ному прибега́ю покро́ву, помози́ ми: мно́гое бо совокупи́х грехо́вное бога́тство, доброде́телей же нището́ю ве́сь испо́лнихся.

Та́же, ирмо́с: И по ирмосе́ свяще́нник глаго́лет ектению́ сию́:

Па́ки и па́ки ми́ром Го́споду помо́лимся.

Ли́к: Го́споди поми́луй.

Еще́ мо́лимся о упокое́нии блаже́ннаго младе́нца, и́мярек, и о е́же по нело́жному своему́ обеща́нию, небе́сному своему́ Ца́рствию того́ сподо́бити.

Ли́к: Го́споди поми́луй, три́жды.

Я́ко да Госпо́дь Бо́г на́ш учини́т ду́х его́, иде́же вси́ пра́веднии почива́ют.

Ли́к: Го́споди поми́луй, три́жды.