Триодь Постная (на цсл., гражданский шрифт)

Слава, и ныне, Богородичен: Милосердия двери отверзи нам, благословенная Богородице, надеющиися на Тя да не погибнем, но да избавимся Тобою от бед: Ты бо еси спасение рода христианскаго.

По 6-й песни мученичен:

Страдальческий подвиг претерпевше святии, и почести победы от Тебе приимше, упраздниша коварства беззаконных, прияша венцы нетления. Теми, Боже, даруй нам велию милость.

В СРЕДУ НА УТРЕНИ, по 1-м стихословии седальны крестны:

Днесь пророческое исполнися слово, се бо покланяемся на место, идеже стоясте нозе Твои, Господи: и древо спасения вкусивше, греховных страстей свободу улучихом, молитвами Богородицы, едине Человеколюбче.

Стих: Возносите Господа Бога нашего, и покланяйтеся подножию ногу Его, яко свято есть.

Крест Твой, Господи, освятися, в нем бо бывают исцеления болящим во гресех: Имже Тебе припадаем, помилуй нас.

Слава, и ныне, Крестобогородичен: Тя рождшая, Христе, Приснодева Отроковица, на Кресте Тя нас ради вознесена зрящи, уязвляше печали оружием душу, и плакашеся рыдающи матерски. Той молитвами помилуй нас, Господи милости.

По 6-й песни мученичен:

Страдальческая сопротивления в подвизе, мучительския раны на мученицех, и стояху лицы безплотных, почести держаще победы: удивиша мучители и цари, премудрии: низложиша велиара исповеданием Христовым. Укрепивый их, Господи, слава Тебе.

В ЧЕТВЕРГ НА УТРЕНИ, по 1-м стихословии седальны апостольстии:

Яко посреде ученик Твоих пришел еси, Спасе, мир даяй им, прииди и к нам, и спаси нас.

Стих:Во всю землю изыде вещание их, и в концы вселенныя глаголы их.

Ученицы Твои, Иисусе, в концы земли посылаеми, языки благочестно, яко рыбы, уловивше, приведоша к Твоей благости, Господи. И теми вопием Ти, Человеколюбче: людем Твоим подаждь велию милость.

Слава, и ныне, Богородичен: Святая Владычице, чистая Бога нашего Мати, всех Творца неизреченно рождшая, моли со апостолы священными всегда благость Его страстей нас избавити и оставление нам дати грехов.

По 6-й песни мученичен:

Страстотерпец Твоих память, Господи, показася яко рай, иже во Едеме: о ней бо радуется всяка тварь; и подаждь нам, Христе, молитвами их мир и велию милость.

В ПЯТНИЦУ НА УТРЕНИ, по 1-м стихословии седальны крестны:

Токмо водрузися Древо, Христе, Креста Твоего, основания поколебашася смерти, Господи; Егоже бо поглоти желанием ад, отпусти трепетом. Явил еси нам спасение Твое, Святый, и славословим Тя, Сыне Божий, помилуй нас.

Стих: Возносите Господа Бога нашего, и покланяйтеся подножию ногу Его, яко свято есть.

Господи, осудиша Тя иудее на смерть, Жизнь всех; иже Чермное море жезлом прошедшии, на Кресте Тя пригвоздиша, и иже от камене мед ссавшии, желчь Тебе принесоша. Но волею претерпел еси, да нас свободиши от работы вражия; Христе Боже, слава Тебе.

Слава, и ныне, Крестобогородичен: Богородице Дево, моли Сына Твоего, волею пригвоздившагося на Кресте и мир от прелести свобождшаго, Христа Бога нашего, помиловати души наша.

По 6-й песни мученичен:

Иже на судищи Христа проповедавшия и беззаконных прещений не боявшияся, удиви Господь: низложиша бо страдальческим терпением дерзости беззаконных, прияша от Христа достойно благодать исцелений, непрестанно моляще спастися душам нашим.

ГЛАС 7

В ПОНЕДЕЛЬНИК НА УТРЕНИ, по 1-м стихословии седальны умилительны:

Имущи, душе моя, врачевство покаяния, приступи слезящи, воздыханием вопиющи: Врачу душ и телес, свободи мя, Человеколюбче, от моих согрешений, сопричти мя блуднице, и разбойнику, и мытарю; и даруй ми, Боже, беззаконий моих прощение и спаси мя.

Стих: Господи, да не яростию Твоею обличиши мене, ниже гневом Твоим накажеши мене.

Мытареву покаянию не поревновах, и блудницы слез не стяжах: недоумеюся бо от ослепления о таковом исправлении: но Твоим благоутробием спаси мя, Христе Боже, яко Человеколюбец.

Слава, и ныне, Богородичен: Честнейшая славных Херувимов еси, Пречистая Дево: они бо Божественнаго не терпяще сияния, крилами покрытым лицем службу совершают: Ты же воплощенна Слова самовидно зрящи носиши, Егоже непрестанно моли о душах наших.

По 6-й песни мученичен:

Святии Твои, Господи, на земли подвигшеся, врага попраша, и идольскую лесть упраздниша: темже и венцы от Тебе прияша, Человеколюбца Владыки и милостиваго Бога, подающаго нам велию милость.

ВО ВТОРНИК НА УТРЕНИ, по 1-м стихословии седальны умилительны:

Блудницы слезы и Петровы приемый, Господи, и мытаря оправдавый, из глубины воздохнувши, и мене во умилении припадающа, ущедри, Спасе, и помилуй мя.