Триодь Постная (на цсл., гражданский шрифт)

Страстотерпец Твоих память, Господи, преуяснил еси яко Всесилен, яко укрепил еси их страсти Твоя подражати: победиша бо мужески велиара силу, темже и прияша исцелений дарования. Тех молитвами, Человеколюбие, мир подаждь душам нашим.

В ЧЕТВЕРГ НА УТРЕНИ, по 1-м стихословии седальны апостольстии:

Божественнии проповедницы истины, и учителие церкви, показастеся самовидцы апостоли: идолов бо прелесть поправше, и Троицу ясно проповедасте, юже молите блаженнии, даровати нам велию милость.

Стих:Во всю землю изыде вещание их, и в концы вселенныя глаголы их.

Приидите вси апостолы воспоим, яко правители: идолов бо лесть отгнаша, и к свету жизни возведоша, и Троицу славити научиша. Темже вси их честную память совершающе вернии, Спаса прославим.

Слава, и ныне, Богородичен: Яко невозделанная, Дево, лоза, красне́йший Гроздь прозябла еси, источающий нам Вино спасения, всех веселящее ду́ши же и телеса. Темже яко вину Тя добрых блажа́ще присно, со Ангелом вопием Ти: радуйся, Обра́дованная.

По 6-й песни мученичен:

Вооружившеся во всеоружие Христово и облекшеся во оружие веры, ополчения вражия страдальчески низложисте; усердно бо, надеждею жизни, претерпесте вся мучительская древле прещения же и раны. Темже и венцы приясте, мученицы Христовы терпеливодушнии.

В ПЯТНИЦУ НА УТРЕНИ, по 1-м стихословии седальны крестны:

Крест и смерть пострадати изволивый, посреде твари сего водрузил еси; еда благоволил еси, Спасе, Телу Твоему пригвоздитися, тогда и солнце лучи сокры. Сия и разбойник зря, Бога Тя исповеда, вопия Тебе: помяни мя, Господи, и прият веровав рай.

Стих: Возносите Господа Бога нашего, и покланяйтеся подножию ногу Его, яко свято есть.

На кипарисе, и певке, и кедре вознеслся еси, Агнче Божий, да спасеши верою покланяющияся вольному Твоему распятию; Христе Боже, слава Тебе.

Слава, и ныне, Крестобогородичен: Поносную, Щедре, смерть распятием волею претерпел еси; егоже родившая Тя, Христе, зрящи, уязвляшеся. Еяже мольбами за благоутробие милости Твоея, Едине Преблагий Человеколюбче Господи, ущедри и спаси мир, вземляй мира грех.

По 6-й песни мученичен:

Сияете верою, пресветлая светила святии, благочестия врачеве, страстотерпцы прехвальнии; мучителей бо ран не убоявшеся, идольское злочестие низложисте, победу имуще непобедиму, Крест истинный.

ГЛАС 4

В ПОНЕДЕЛЬНИК НА УТРЕНИ, по 1-м стихословии седальны умилительны:

Смиренную мою душу посети, Господи, во гресех все житие иждившую: Имже образом блудницу, приими и мене, и спаси мя.

Стих: Господи, да не яростию Твоею обличиши мене, ниже гневом Твоим накажеши мене.

Преплавая пучину настоящаго жития, помышляю бездну многих моих зол, и не имеяй окормителя помышлений, Петров провещаваю Ти глас: спаси мя, Христе, спаси мя, Боже, яко Человеколюбец.

Слава, и ныне, Богородичен: Воспитавшейся во храме во святая святых, одеянней верою и премудростию, и безмерным девством, Архистратиг Гавриил принесе с небесе целование, и еже радуйся, радуйся, Благословенная, радуйся, Препрославленная, Господь с Тобою.

По 6-й песни мученичен:

Днесь ангельская воинства, в память страстотерпцев приидоша, верных мысли просветити, и вселенную благодатию уяснити. Теми, Боже, умолен бываяй, даруй нам велию милость.

ВО ВТОРНИК НА УТРЕНИ, по 1-м стихословии седальны умилительны:

Скоро совнидем в невестник Христов, да вси услышим блаженный глас Христа Бога нашего: приидите, любящии небесную славу, сопричастницы бывше мудрых дев, уяснивше свещи наша верою.

Стих: Господи, да не яростию Твоею обличиши мене, ниже гневом Твоим накажеши мене.

Помяни, душе, како предстанем Судии в час страшный? поставляются престоли страшнии, и коегождо деяния обличаются, тогда Судия неумолимь. Тамо огнь люте тебе уготовася, якоже дивие море, волнуемое аки покрыти всяческая. Со всеми сими виждь, душе моя, стени прежде конца.

Слава, и ныне, Богородичен: Господственно и истинно Богородице, молящися яко Мати со дерзновением Сыну Твоему, и Богу нашему; сохрани град изрядно, к покрову Твоему притекающий, в Тебе державу имущий, к Тебе прибегающий, пристанищу, стене, Единому предстательству рода человеческаго.

По 6-й песни мученичен:

Иже во всем мире мученик Твоих, яко багряницею и виссом кровьми, Церковь Твоя украсившися, теми вопиет Ти, Христе Боже: людем Твоим щедроты Твоя низпосли, мир жительству Твоему даруй, и душам нашим велию милость.

В СРЕДУ НА УТРЕНИ, по 1-м стихословии седальны крестны:

Искупил ны еси от клятвы законныя, честною Твоею Кровию, на Кресте пригвоздився, и копием прободься, безсмертие источил еси человеком, Спасе наш, слава Тебе.