Виршевая поэзия (первая половина XVII века)

И нам богатнее се вам подати
И словом ваших душ напитати:
Иоанн власы велбуждыими покрывался[353]

.Петр[354] двема цатома питаяся,
Яко добро, рече, нестяжание
И имением небрежение,
Яко врага отвращаюся
И яко сънаследника срамляюся,
Да не от бога падну, отягчав путы низвлекущими
Или к земли держащими;
Елика от телес, изгнивше, отпадоша,
Ова убо от телес и злосчастие погибоша
Преже даже боритв смиряюся
И преже даже смиритися отлучаюся.
Такову добродетель стяжите,
Будущих онех слез убежите.
Что отца приснейше
И что матери милостивнейше?
И мати убо болезни поминает,
Утробу терзает и умилне зело взывает:
Почто, рече, во чреве матерне не умрох,
От утробы же изшед, абие не погибох?
Прелюбодеи в домы приемлем и трапезе сподобляем,
И священнотатцы общники себе сотворяем.
Еже конечное нощию и тмою покрыватися,
От настоящих и видимых стоящим прилагатися;
Аще имуща видим малу надежу здравия,
Яко осквернения некого от себе отгонения;
Не вселение же им с нами попущающе,
Ниже с трупом их лечбы прилагающе,
Скорби ради недуга утешающе
И сами себе подтвержающе.
И слез достойно видение,
Да малое некое улучат облехчение,
Ин ино что к скорби ко умиленному собирающе
И тучами и мятежми ветров етражуще;
Рыдание умилено воздвижется, что подобает —
Всю тех скорбь предлагает.
Солнцем опаляеми
И прахом посыпаеми.
Разве кто приближитися им гнушаетъся?
Песньми терпение сих возвещается.
Взирающе к богу, сердцем благодаряще
И к человеком же умиление зряще.
Сим на милость привлачаще,
Себе же облехчение, злых кождо их творяще;
Заблуждынее, иже обращающа,
И погибшее ищуща, немощное укрепляюща.
Тем же, толика благодеяния от бога приемше,
Не минем болящих, ничто же им благо не сотворше!
Немалу тщету и преобидение вменяем.
Преддверия наша различными цветы украшаем.
От сего паче разбуеваем,
Иже не неистовни бываем,
Зде от разбойник и татей наветуемся
И времене пременением погубляемся.
Еже животных ова укротишася
И в служение подпрягошася.
Еще паче еже непщевати стоятелно,
Что сим быти и пребывателно.
Не законом описуемы,
Не пределми возбраняемы
Нецыи же от человек, о сем благость божию презревше
И прочия вещи чрез потребы стяжавше,
Яко же болезни и злобы, подобно нападоша,
Тогда вся злая найдоша.
Сими близ приступают,
Струпы осязая, и руками гноения очищают;
Истинно юже несвободни обретаются,
Неподатливии обличаются.
Аще ов за злобу мучится,
Ов же яко похваляем взимается;
Ов убо за лукавство возвышается,
Ов же за добродетель искушается.
От сего <о>бличаются, яко не по истине глаголют,
Ни мнят, еже от бога тем имети, яже имут,
А не своим сластем и страстей в поможение истощавати,
Болным же и нищим от бога еже зло страдати.
Да ниже во обилии благих сущих, иже зде похваляем,
Ниже в нищете и болезни злостраждущих окаяем.
Зде некия вещи от хитрости сотворяемы,
Во един вид составляемы,
Убо некими нелестными соборы уступления,
Елико, тем промышления,
А не бога быти строимом научиша
И к безбожию зрети учиниша.
Сия в различныя славы и наречения разделиша,
Промышления множеству о всех сущу зазреша.
Мы же ниже чюдотворения их приемлем,
Ниже баснословия ложнаго внимаем,
Ниже недуга оплюваем,
Ниже богатству текущу сердца прилагаем.
Да тако имущих о сих уста возражаем
И не словесем суетным попущаем:
Овогда же претяще, укаряюще,
Есть же егда исправляющих восприемлюще;
Шуяя же уничижающе,
Рекше, здравие и богатство хваляще;
Злыми нанесенми добре пострадаша
И противнаго терпением своим победиша.
Яко очима его на убогия призирати
И веждома его сыны человеческия испытовати, —
Он бо глава телу церковному.
Мы же друг другу — удове по единому.
Зле уязви, яко еле живу ти лежати;
Язвы имаши, якоже ниже лечбы приложити.
Паче же и яснейше присияют,
От всякаго недуга душевнаго просияют.
Что еще должен есмь, рече, сотворити? —
Отвеща, аще хощеши совершен быти.
Козлища бесплодия ради именуются
И о левую стати осуждаютъся, —
Украдша и похитиша чюждая имения, прелюбы сотвориша,
Отцу и матери досадиша,
Или ино что зло сотвориша,
Но зане Христу нищих ради не угодиша.