Виршевая поэзия (первая половина XVII века)

Нам же всякоя трубы велегласнейше
И всякоя цевницы благознаменнейше,
Иудейский убо поста нрав отринувшу,
Истинный же нам пост показавшу,
Да причастник будеши Христу.
И тако приступи к посту.
Притворенни образом — внешнее помрачается,
Яко же под завесой, лжею покрываемо, погубляется —
Телеса, частостию убо сытостию отягчаваема,
Удоб в болезнех бывают погружаема.
Пост пророки раждает,
Сильныя укрепляет,
Законоположники упремудряет.
Той и искушения отражает.
Той трезвению сожитель,
Целомудрию содетель.
Назорея освящает,
Священника совершает.
Како же ли и той пророки учреждаше,
Зелия дивия и муки мало гощения наполняше,
Дыма и сквара и иже горе и долу обтичющих,
Яко же неотречене владыце — чреву служащих,
Никогда же престающи
И заутро забывающи.
Жажда сладко питие уготовляет,
Глад, предварив, сладостну трапезу устрояет;
Плоть, юже о нас восприят,
Сице с тем дияволи прилоги подъят,
Естество телесе воскресшаго уверяя,
Ты же, — претучневая убо себе и плотевая.
Сице иже к плоти прилагаяйся дух побеждает
И иже духу счинивыйся плоть порабощает.
Елико внешний наш человек растлеваетъся,
Толико внутрений обновляется.
Духовнаго прият некое приобщение,
Моисей, второе приемля законоположение,
Египтяны побеждаху
И сквозе море прохождаху;
Брачных дел умерение познавает,
Согласно упражнение в них сотворяет.
Вина ли не пиеши, но досады не удержаваеши,
З вечера восприятия пищи ожидавши? —
Подвизаяйся предобучаетъся,
Постяйся предвоздержаетъся.
Аще ли же вне предел будеши,
Заутро главою тяжек будеши.
Ныне убо — спасеныя страсти воспоминания,
В будущем же веце — воздаяния.
Очесными проходы мокроти тяготу содевают —
От нечаемых печалных слышаний пребывают.

18. Анастасия прозвитера [360] , о отшедших отцех

Лик составльше
И трапезу нам представльше,
К нетленному отечеству идоша
И к солнцу праведному притекоша,
На горная — к небесному взирающе
И благая тамо промышляюще.
В час, вонь же не чает, внегда питается,
Внегда собирает, внегда величается,
Да на небеса взыдет,
Да не во страну живых внидет.
Мы же, мертвое тело погребше,
Чюжде от своего дому изнесше,
Невежде и вся пепелом бывша,
Яже многижда согнивша и истекша.
Их же нощ и ден без сытости целовасте;
Та плоть есть, ея же, сплетающеся, согрешаете.

19. Григория прозвитера [361] , в суботу сырную