ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Зриши ли, ответотворче, ругателю Христов и попирателю святыя православныя веры, что в начале священнословие показует. Даждь ему, рече, во всех заповедех Твоих ходити и угодная Тебе сохранити, яко аще сохранит сия человек, жив будет ввек. И сие слово не разнит и от самых святых Евангелских словес. Господу глаголющу ко пришедшим к нему июдеом [3730]: Аминь, аминь, глаголю вам, яко слушаяй словесе Моего и веруяй пославшему Мя, (л. 916 об.) [3731] имать живот вечный и на суд не приидет, но прейдет от смерти в живот. А не веруяй уже осужден есть, якоже на инем месте речеся: Отметаяйся [3732] Мене и не приемляй глагол Моих имать судящаго ему слово, еже глаголах, то судит ему в последний день.

Что же чюдно царьское величество по святему Евангелию сотворил любо, дабы и мы свидетелие были добрых его дел, по писаному: Яко да видят ваша добрая дела и прославят Отца вашего, иже на небесех. Не слышал еси, яко вера без дел мертва есть, и аще кто верует без дел, умерл (л. 917) [3733] есть прежде общая смерти таковый. Господу свидетельствующу: Не [3734] всяк глаголяй Господи, Господи, внидет во Царьство Небесное, но творяй волю Отца Моего, иже есть на небесех. Мнози рекут Мне в онь день Господи, Господи, не во Твое ли имя пророчествовахом и Твоим именем бесы изгонихом и Твоим именем силы многи сотворихом? И тогда исповем им, яко николи же знах вас, отъидете от Мене делающии беззаконие. И аще чюдеса сотворшии о имени Господни отриновени будут, а иже ничто же добро сотворшии, но и противная Евангелию, где будут, прелестниче?

Но паки на молитвословие возвратимся. (л. 917 об.) [3735] Таже глаголет архиерей прочее воследование: Напиши его в книзе жизни Твоея, соедини его стаду наследия Твоего, да прославится имя Твое святое в нем и возлюбленаго Твоего Сына Господа нашего Иисуса Христа и живот творящаго Твоего Духа. Да будут очи Твои, взирающе на него, милостию выну, и уши Твои, еже услышати глас моления его, возвесели его в делех руку его.

Зри же и зде опасство слову, еже услышану быти гласу моления его, а не кроме молитвы. Такожде: И возвеселитися ему в делех руку его. В которых делех? Не во иже дрова делати (л. 918) [3736] и прочая дела, но в милости и щедротах, якоже слову правда скажет: Блажени милостивии, яко тии помиловани будут. И по сих обще всем рече: Радуйтеся и веселитеся, яко мзда ваша многа есть на небеси. Но паки и во инем молитвословии услышим не менее сих.

Молитва 4.

Сый [3737] Владыко Господи, сотворивый человека по образу Твоему и подобию и давый ему власть жизни вечныя. Таже отпадша грехом не презревый, но устроивый вочеловечением Христа Твоего спасение мира. Сам и созданиа Твое сие избавль от работы вражия, приими в Царьство Твое Небесное, отверзи его очи мысленыя, (л. 918 об.) [3738] воеже озаряти в нем просвещению Евангелия Твоего.

Такожде и святаго крещения в первой молитве священник моляся захотяща креститися, глаголет: И во образи Христа твоего в хотящем паки родитися моим окаянством и назидай его на основании апостол и пророк Твоих, и да не низложиши, но насади его насаждение истины во святей Твоей соборней и апостольстей Церкви и да не восторгнеши, яко да преуспевающу ему во благочестии, славится и тем всесвятое имя Твое, Отца и Сына и Святаго Духа ныне и присно и во веки веком. Аминь.

Видиши ли всюду (л. 919) [3739] крещаемый запоручается святым Евангелским заповедем и апостолским и пророческим учением, якоже и в последней молитве молится священник, глаголя: Явися, Господи, на воде сей и даждь претворитися в ней крещаемому, воеже отложити убо ветхаго человека тлеемаго по похотех прелести, облещися в новаго, обновляемаго по образу Создавшаго его. Да быв сраслен по подобию смерти Твоея крещением, общник и воскресения будет и сохранив дар Святаго Твоего Духа и возрастив залог благодати, приимет почесть горняго звания и сопричтется перворожденым (л. 919 об.) [3740] написаным на небеси, в Тебе Бозе и Господе нашем Иисусе Христе вкупе со безначалным Твоим Отцем и со пресвятым и благим и животворящим Твоим Духом.

И сия тако суть о святом крещении всякому любо во Христа, аще и царь, не ино тому, но тойжде. Такоже заповеди и обетование едино и не вем что любо царьское величество делает, от Евангелских заповедей, но своя человеческия предпочел паче Христовых. А еже бо самому ему государю хранити святыя Божия заповеди, не вем [3741].