ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Зри, не на мертвых молятся, но от живущих на земли. Аще бы на мимошедшия роды, не бы именовали от живущих на земли. Но что к ним Божественый ответ: Да почиют еще время мало, дондеже скончаются и клеврети их и братия их, хотящии избиени быти, якоже и тии, обаче не избежат и тии подобнаго тем воздаяния. Якоже инде пишет [3920]: И третий ангел излия фиял (л. 1016) [3921] свой на реки и на источники водныя и быша кровь. И слышах ангела воднаго, глаголюща: Преподобне еси Господи сый и бе, и преподобен, яко сия судил еси, зане кровь святых и пророк излияша. И кровь им дал еси пити, достойни бо суть. И слышах другаго, от олтаря глаголюща: Ей, Господи Вседержителю, истини и прави суди Твои. Четвертый ангел излия фиял свой на солнце и дано бысть ему опаляти человеки огнем. И опалишася человецы зноем великим и хулиша имя Божие, иже имать область на язвах их. И не покаяшася дати Ему славы. И сия быша вся, яко от солнца в моровое поветрие, опалишася человецы зноем (л. 1016 об.) [3922] лютым, извну горяше, и никто же можаше тех уврачевати, и изомроша. А оставшии не даша славу Богу, но хулят имя Божие, да приложатся таковым и прочия последующия язвы.

А [3923] иже душа растесаных за свидетельство Иисусово и за слово Божие, воцарятся со Христом, на них же смерть вторая не имать области, но будут иереи Богу и Христу, им же сподоби Христе Боже подражателем и нам быти.

А еже о неправдех царьских кому любо и всякому обличати греха нет. Писано есть: И глаголах о свидении Твоих пред цари и не стыдяхся. И Господь проповедает, глаголя: (л. 1017) [3924] Предадят [3925] бо ты в сонмища и на соборищах биени будете, и пред воеводы и цари ведени будете имени Моего ради. Егда [3926] же поведут вы предающе, не прежде пецетеся, что рецете или что возглаголете, ни поучайтеся, чтоб отвещевати. Аз бо вам дам уста и премудрость, ей же не возмогут противитися или отвещати вси противляющиися вам. Инде рече: Не [3927] пецетеся, како или что отвещаете или что речете. Святый бо Дух научит вы в той час, яже подобает рещи. И [3928] всяк, иже исповесть Мя пред человеки, и Сын человеческий исповесть его пред ангелы Божиими. А отвергийся Мене пред человеки, (л. 1017 об.) [3929] отвержен будет пред ангелы Божиими. И которая досада царем, аще кто правду ему извествует, а царь, возгордевся, не послушает, но и муки нанесет дерзостию на свидетеля. Не онаго укорит или отмещется царь, но самаго Бога отмещется. Слушаяй бо вас, рече, Мене слушает, и отметаяйся вас, Мене отметается. И не свидетеля слова обесчестит или убиет, но онаго заповедавшаго не стыдетися, обесчестит или уязвит. Тии же по своему труду мзду сторичною приимут от Господа Бога и будут архиереи Богу и Христу, якоже выше есть писано. Ино убо дерзновение, ино дерзость (л. 1018) [3930] или гордость, дерзновение убо, еже аще кто сам волю творит и не творящим засвидетелствует творити. Аще ли кто не послушает единаго, тогда пред двема или трима обличати со дерзновением, якоже и Христос повелевает: Дерзайте, Аз победих мир и не убойтеся бо их. И паки: Не убойтеся от убивающих тело. И прочее. И паки инде речеся: Проповедая Царьствие Божие и уча, яже о Господе нашем Иисусе Христе, со всяким дерзновением невозбранно. Се есть дерзновение.

Дерзость же, еже кому разгордевся, не точию что заповеди Божия послушает, но и на создавшаго Бога (л. 1018 об.) [3931] возгордевся и проповедника слова Божия, дерзость приемше, или досадит или убиет.

Дерзостию [3932] разгордевся, денница спаде с небесе, сокрушися на земли. Рече бо во уме своем: На небо взыду и выше звезд небесных поставлю престол свой. Взыду выше облак и буду равен Вышнему. Ныне же снидеши во ад. О нем же и Христос свидетелствова: Видех, рече, сатану, яко молнию с небесе спадоша [3933]. Дерзновение же восприим архангел Михаил, иже ко Владыце благоразумие, яко слуга верный, видев отступника падшася. Собрав архангельския лики, рече, вонмем и станем добре (л. 1019) [3934] пред Сотворшим ны и не помыслим сопротивных на Сотворшаго ны. Видяще сатану, что подъя, и сущии с ним, доселе убо свет суще, ныне же быша тма. И сверже с небесе Михаил архангел с прочими небесными силами сатану и все бесовское множество. Якоже и Иоанн Богословец виде: И [3935] бысть брань на небеси. Михаил и ангели его брань сотвориша на змия. И змий брася и ангели его, и не возмогоша, ниже место их обретеся к тому на небеси.

Толкование.