ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Дерзновением [3955] Авраам от Бога обетование прият, отец многим языком наречеся. Дерзновением [3956] Авраам с 318 домочадцы победи 5 царей 300 000. Дерзновением [3957] верова Авраам Богу и вменися ему в правду и друг Божий наречеся. Дерзновением [3958] Авраам Богу в дому своем прият, аки любимаго гостя учреди. Дерзновением [3959] приступив Авраам Господу, рече: Погубиши ли праведнаго с нечестивыми и будет праведный яко нечестивый. Аще есть и праведных во граде, погубиши я, не оставиши ли всякому граду и (л. 1023 об.) [3960] праведных ради, аще суть в нем. Никако же сотвориши по словеси сему, еже убити праведнаго с нечестивыми и будут праведнии яко нечестивии. Никако же ты судия земли не сотворити суд. И рече Господь: Аще обрящется в Содомех 50 праведных, оставлю весь предел тех ради. И отвеща Авраам: Ныне начах глаголати ко Господу моему, аз есмь земля и пепел. Да аще будет от 50 праведных 45 погубиши ли 45 ради праведных весь град? И рече: Не погублю, аще обрящу ту 45. И приложи еще глаголати к нему и рече: Аще обрящутся ту 40. И рече: Не погублю, аще обрящутся 40. (л. 1024) [3961] И рече: Елма же Господи имам глаголати, аще обрящутся их 30. И рече: Не погублю 30 ради. И рече: Да что есть глаголю, Господи, аще обрящется их 20. И рече: Не погублю 20 ради. И рече: Еда, Господи, что аще глаголю единою еще, аще обрящутся их ту 10. И рече: Не погублю 10 ради. Отъиде же Господь, яко сконча глаголя ко Аврааму. Се есть дерзновение.

Дерзновением [3962] вознесе Авраам Исаака, сына своего, на жертву Господеви Богу. Дерзновением [3963] Лот, сидя при вратех града, срете два ангела и поклонися лицем до земли и учреди я в своем дому.

Дерзостию мужие града Содомска обыдоша дом его, от юнот (л. 1024 об.) [3964] даже и до старец, весь народ вкупе. И иззываху Лота и глаголаху к нему: Где еста мужа, яже приидоста к тебе нощию? Изведи я к нам, да будем с ними.

Дерзновением ангели ослепиша я, и Лота и жену и две дщери, емше за руки их, изведоша в Сигор и Содом погубиша.

Дерзостию озреся Лотова жена вспять, бысть столп солан. Дерзостию зяти Лотовы погибоша с содомляны, яко не вероваша Лоту, тестю своему, мняше играет. Дерзостию дщери Лотовы упоивше отца своего, посягше зань.

Дерзновением [3965] Исаак по словеси Божию вниде в Герары. Дерзостию (л. 1025) [3966] герарстии людие хотяше онасиловати Ревеку. Дерзостию филистимове отъяша у Исаака кладези и засыпаша и. Дерзновением Исаак отъиде от них и иныя ископа кладези. Дерзостию [3967] Исаав за ядь первородство свое продаде Иякову. Дерзновением Ияков купи его. Дерзновением [3968] Ияков украде благословение отчее. Дерзостию Исав сопротивляшеся Иякову о благословении, иже благослови отец его. Дерзновением Ияков вселися к Лавану и поят две дщери жене себе, и воста, отъиде. Дерзостию Лаван гоняше его. Дерзновением [3969] Ияков боряшеся з Богом и укрепися, наречеся от Бога Израиль. (л. 1025 об.) [3970] Дерзостию Сихем, сын Емморов Хорреос, оскверни Дину, дщерь Ияковлю. Дерзновением взяста сына два Ияковля. Симеон и Левий, братия Дины, койждо свой меч и вшедша во град без соблазна изсекоста весь мужеский пол. Еммора же и Сихема и сына его усекнуста острием оружия, и пояста Дину от дому Сихемля и изыдоста, сынове же Ияковли разграбиша все, еже бе во граде и еже бе в домех.

Дерзостию [3971] Иосифа братия посадиша в ров и паки продаша за 12 сребреников во Египет. И угоди Иосиф Господеви, и бе Господь с ним, и бе в дому Пентефрееве, служа. (л. 1026) [3972] Ведяше бо господин его, яко Господь с ним есть, и обрете Иосиф благодать пред господином своим. И дерзостию возложи жена господина его очи свои на Иосифа и рече: Буди со мною. И добрым дерзновением не восхоте Иосиф быти с нею. И оболга его непреподобная мужу своему, и разгневася яростию господин его, и всадиша Иосифа в темницу.

Дерзновением [3973] предста Иосиф фараону, рече: Без Бога не отвещаются фараонови спасеныя вещи. И прочее. Дерзновением Ияков вниде во Египет. Дерзостию [3974] возгнушася египтяне сынов Израилевых нуждею и болезнену жизнь творяху им в делех жестоких брением (л. 1026 об.) [3975] и плинфами и всеми делы, еже в полех во всех, иже порабощаху с нуждею.

Дерзостию фараон повеле бабам и людем убивати весь мужеский пол, иже ся родит евреом. Якоже [3976] озлобиша отца наша умориша младенца, их не оживити, вне же время родися Моисей и бе угоден Богови. И дерзновением отца и матере воспитан бысть три месяцы в дому отца своего. Отвержену [3977] же ему, дерзновением взят его дщи фараонова и воспита его себе в сына. И наказан бысть Моисей всей премудрости египетстей. Дерзновением [3978] Моисей, видев, некоего обидима, посо(л. 1027)бствова [3979] и сотвори отмщение.

Дерзостию фараон искаше убити его, и бежа Моисей о словеси сем, и бысть пришлец в земли Мадиамстей. Дерзновением [3980] Моисей к купине разумети, бысть глас к нему Господень: Аз Бог отец твоих, Бог Авраамов, Бог Исааков, Бог Ияковль. Трепетен же быв Моисей, не смеяше смотрети.