ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

Да се ли ты, измождаше, приводиши во свидетельство, древнее беззаконие людей обновляя, еже бы и ныне тожде Господь сотворил? А уже и есть и будет. Аще не обратятся [676] от злоб своих койждо их, якоже и тогда поби Господь, якоже есть писано.

И [677] прогневаша Моисея в стану и Аарона святаго Господня. И отверзеся земля и пожре Дафана и покры на сонмищи Авирона. И разжеся огнь в сонме их, пламень попали грешники. И сотвориша телец в Хориве и поклонишася истуканному, и измениша славу Его в подобие тельца [678], (л. 179 об.) [679] ядущаго траву, и рече: Потребити их, аще не бы Моисей избранный Его стал в сокрушении пред Ним. И возврати ярость Его, да не погубит их.

Да ты же пишешь: Умре Аарон на верху горы, и бысть вместо его Елеазар. Якоже пишется в 4-х книг Моисеовых в 29 главе: И сотвори Моисей, якоже повеле ему Господь, и возведе я на Ор гору пред всем сонмом, и совлече Аарону ризы его, и облече в ня сына его Елеазара, и умре Аарон на версе горы.

Виждь и разсмотри, яко нелепо прежде смерти иному быти архиерею на живаго.

Якоже перваго и втораго собора (л. 180)[680]в церкви святых апостол, правило 16.

Ни по которому же образу да не взыдет кто на епископию, ея же епископ жив есть. Подобает бо вину изыскати, его же хотят изгнати, и по извержении его другаго поставити.

Аще же кто помощию и насилием властельским держит церкви, прочти правило святых апостол 30-е.

Аще [681] кий епископ мирских князь помощию приимет церковь, да извержется и отлучится.

Толкование.

Аще кий епископ мирскими властели избран быв и тех силою приимет Церковь Божию, рекше епископ будет в ней, таковый, яко велие прегрешение согрешив, да будет извержен и да отлучится. Подобает бо хотящему (л. 180 об.) [682] поставитися епископом, от всех епископ сущих во области поставлену быти. Аще ли несть мощно купно всем собратися, поне без всякого извету, от трию епископ да поставлен будет, сложившемся писанием грамот купно и всем не пришедшим епископом.

И святаго Вселенскаго 7-го собора правило 3.

Всяко [683] избрание и поставление, бывающее от мирских властелей, не твердо есть.

Толкование.

Во многих правилех речено есть, еже от всех епископ, сущих во области, аще есть мощно подобает суду и избранию быти, хотящему поставлену быти епископу. Аще ли невозможно всем совокупитися, понеже (л. 181) [684] от триех епископ да поставится, сочетавшемся посланием грамот и не пришедшим епископом. Аще же кто мирскими властели избран будет, и теми церковь некую приимет, рекше по изволению их и по повелению, поставлен будет епископом, не токмо нетвердо есть таковое поставление, но и извержение и отлучение наводит на получившаго тем образом святительство.

Такожде и Лаодикийскаго собора правило 13.

Не избран епископ, иже мирскими человеки избран будет.

Толкование.

Судом и избранием митрополита и сущих во области епископ поставляем бывает епископ. Аще же кто не тако возведен будет (л. 181 об.) [685] на епископство, но мирскими людми избран, не избран есть и не приятен.

А коли б самому мне не было злобы, почто иному призывать, но от гнева царскаго невозможно стало жити.

Писано есть: Царево [686] прещение подобно рыканию лвову. И паки: Ярость царева посол есть смерти. Меч есть язык царев, а не плотян, иже аще предан будет, сокрушится. Аще раздражится ярость его с жилами, человеки губит и кости человеческия поядает и сожигает яко пламень. В [687] долготерпении благоучение царево, язык же мягок сокрушает кости.

Мнози [688] угождают пред лицем царевым, всяк же зол бывает (л. 182) [689] в поношении мужеви. Царю [690] послушающу словесе неправедна, вси под ним законопреступницы.

Видел ли еси, совопросниче, яже суть о царех. Богу свидетельствующу, яко не бысть прежде Соломона в мудрости велика и по нем не будут. И все, елико в царской души бываемо, изообличи и показа, якоже и деяния тех свидетельствуют.

Кто правдивее Моисея, егда изыде к братиям своим, сыновом Израилевым, разумев же болезнь их, виде человека египтянина, биюща некоего евреянина, и озревся тако и сам уби египтянина. Слышав же фараон царь, искаше его убити. Он же отъиде и вселися (л. 182 об.) [691] в земли Мадиамстей. И по возвращении коликими чюдесы и казньми наказа Бог фараона и не умягчися, дондеже погуби его Господь.

Кто праведнее Давида, якоже свидетельствова Бог о нем. Обретох, рече, мужа по сердцу Моему, иже сотворит вся хотения Моя.