ВОЗРАЖЕНИЕ, или РАЗОРЕНИЕ СМИРЕНАГО НИКОНА,Божиею милостию патриарха, противо вопросов боярина Симеона Стрешнева, еже написа газскому митрополиту Паи

И [692] инде пишется о нем. Со лвы играше яко с козлищи и с медведи яко со агнцы овчими. В юности своей не убил ли исполина и отъят поношение людей, и призва Господа Вышняго и даде в десницу его крепость, низложи человека силна на брани, и воздвиже рог людей своих и прославися во тмах. И сладко бряцанием гусленым отгони демона от Саула. (л. 183) [693] Но колико от того пострада, искаще убити его Саул. Он же бегая и крыяся от лица Саулова, якоже свидетельствует писание Царств первых во 18 главе. Взем Саул копие и рече: Поражу Давида к стене. И уклонися Давид от лица его дважды. И Давидови, бежав, спасеся, и иде к Самоилу в Сармафему. Прочее [694] о бегании Давидове свидетельствуют Царств книги. И не смиловася Саул на Давида, дондеже Господь тому суд сотвори, еже без правды гневаяся на Давида, уби архиерея Господня Авимелеха и с ним 85 муж, носящих ефуд.

И книга псалмов Давидовых, егда бегая, молился, глаголя: Изми мя, Господи, от человека лукава (л. 183 об.) [695] и от мужа неправедна избави мя.

Помилуй [696] мя, Боже, помилуй мя, яко попра мя человек. И на сень крилу Твоею надеюся, дондеже прейдет беззаконие. Овогда пишет: Что хвалишися во злобе силне, беззаконие весь день, неправду умысли язык твой, яко бритву изощрену сотворил еси лесть. Возлюбил еси злобу паче благостыни, неправду неже глаголати правду. Возлюбил еси вся глаголы потопныя, язык льстив. И прочее псалма того иногда же.

Суди, Господи, обидящая мя, побори борющая мя, приими оружие и щит и востани в помощь мою. Изсуни меч и заключи сопротив гоня(л. 184)щия [697] мя. Рцы души моей: Спасение Твое есмь аз, да постыдятся и посрамятся ищущии душю мою, да возвратятся вспять и постыдятся мыслящии ми злая. Да будут яко прах пред лицем ветра, и ангел Господень оскорбляя их, да будет путь их тма и ползок, ангел Господень погоняя их, яко туне скрыша ми пагубу сети своея, всуе поносиша души моей. Да приидет ему сеть, яже не весть, и ловитва, яже скры да обымет и, и в сеть да впадется в ню. Душа же моя возрадуется о Господе, возвеселится о спасении Его. Вся кости моя рекут Господи, Господи, кто подобен Тебе, избавляяй нища из руки крепльших (л. 184 об.) [698] его, и нища и убога от расхищающих его. Воставше на мя свидетели неправеднии, яже не ведях, вопрошаху ми, воздаша ми лукавая во благая. И прочее.

И навыкши искусом, ко всем глаголет, уча: Уклонися от зла и сотвори благо, взыши смирение и пожени и, зане очи Господни на праведныя и уши Его в молитву их. Лице же Господне на творящая злая, еже потребити от земли память их. Тем же и глаголаше присно, яко беззакония моя аз знаю и грех мой предо мною есть выну. И елика изрече ему Нафан пророк о Уриеве, не вопреки возглагола, но рече: Согреших [699] ко Господу моему. И елика злая сотвори ему (л. 185) [700] и хотящим убити возбраняше.

Кто ли праведнее Самуила, яко и зачатие молитвы ради и рождение свято, но и той, убояся Саула [701], веление Божие исполнити глаголанное от Господа. И рече Самоил: Како пойду, услышит Саул и убиет мя.

Кто паче Илии в чюдесех прославися, небо языком заключи 3 лета и месяц 6, и паки отверзе, тем и 9 ложных пророк закла и жертвы трикратной водою полиеной и с водою небесным огнем попали и два пятьдесятника сожже, Иордан милотию раздели и Елисеови сугубу благовесть дарова, и на огненых возилех яко на небесе взыде. Но [702] и тому от лица Ахавля (л. 185 об.) [703] повеле Господь скрытися в Потохорафе прямо лицу Иорданову, и от лица Езавели бежа во Вирсавию, в землю Июдину, и проси души своей смерти.

Кто велегласнее Исаии во пророцех, но и той умолче в царство Иозии, вознесшаго мерзское кадило Господеви и опроказе.

Кто ли премудрее Иеремии присноплачевнаго, еже пророчествова на Иерусалиме и на Иоакима царя Июдина, его же повеле царь книги пророчества сожещи и его яти, но скры его Господь и Варуха книгочия.

И что многословити потреба: выше сего много есть и заповеди Божия и показание бегания самаго Христа и святых Его апостол и святых всех, еже прежде времени не пометатись (л. 186) [704] в напасти.

Глаголет ли царьское величество, яко не изогнан де от нас, сам своею волею пошол? И вси святии сами своею волею отходили от злобы и таясь. А коли бы не утаилися, яти бы были святии и елико годно мучителем сотворили, якоже Моисей, тако и Давид, тако и Исаия, и Иеремия, тако и Христос, тако и Павел, тако и Петр, тако и вси апостоли, тако и вси святии, о них же к повести не достанет лето едино. Но якоже о страстех святых, тако и о мучителех, отчасти мало церкви предано есть в книзе, нарицаемей Пролог, тамо кто восхощет пространно навыкнути о мучении и изгнании и о мучителех (л. 186 об.) [705], якоже глаголет Григорий Богослов.

Что [706] убо быхом крепчайшии гонящии, ничто же пострадаша от нас, но отбегоша не мучени. Тем же и глаголем, который ипарх отщетися от нас, который ли народ воставляющий казнь прияша, что ли кому страшно показахом, могуще устрашити враги наша.