Английская поэзия XIV–XX веков в современных русских переводах (билингва)

Farewele, Advent; Cristemas is cum;
Farewele fro us both alle and sume.

With paciens thou hast us fedde

And made us go hungrie to bedde;
For lak of mete we were nighe dedde;
Farewele fro us both alle and sume.

While thou haste be within oure house,

We ete no puddinges ne no souce,
But stinking fisshe not worthe a louce;
Farewele fro us both alle and sume.

There was no fresshe fisshe ferre ne nere;

Salt fisshe and samon was too dere,
And thus we have had hevy chere;
Farewele fro us both alle and sume.

Thou hast us fedde with plaices thinne,

Nothing on them but bone and skinne;
Therfore oure love thou shalt not winne;
Farewele fro us both alle and sume.

With muskilles gaping afture the mone

Thou hast us fedde at night and none,
But ones a wyke, and that too sone;
Farewele fro us both alle and sume.

Oure brede was browne, oure ale was thinne,

Oure brede was musty in the binne,
Oure ale soure or we did beginne;
Farewele fro us both alle and sume.

Thou art of grete ingratitude

Good mete fro us for to exclude;
Thou art not kinde but verey rude;
Farewele fro us both alle and sume.

Thou dwellest with us agenst oure wille,

And yet thou gevest us not oure fille;
For lak of mete thou woldest us spille;
Farewele fro us both alle and sume.

Above alle thinge thou art a meane

To make oure chekes bothe bare and leane;
I wolde thou were at Boughton Bleane!
Farewele fro us both alle and sume.

Come thou no more here nor in Kent,

For, if thou do, thou shalt be shent;
It is enough to faste in Lent;
Farewele fro us bothe alle and sume.

Thou maist not dwelle with none eastate;

Therfore with us thou playest chekmate.
Go hens, or we will breke thy pate!
Farewele fro us both alle and sume.

Thou maist not dwell with knight nor squier;

For them thou maiste lie in the mire;
They love not thee nor Lent, thy sire;
Farewele fro us both alle and sume.

Thou maist not dwell with labouring man,

For on thy fare no skille he can,
For he must ete bothe now and than;
Farewele fro us both alle and sume.

Though thou shalt dwell with monke and frere,

Chanon and nonne ones every yere,
Yet thou shuldest make us better chere;
Farewele fro us both alle and sume.

This time of Cristes feest natall

We will be mery, grete and small,
And thou shalt go oute of this halle;
Farewele fro us both alle and sume.

Advent is gone; Cristemas is cume;

Be we mery now, alle and sume;
He is not wise that wille be dume
In ortu Regis omnium.

Джеймс Райман (ок. 1450 — после 1492)

Прощай, Адвент [7] !