Doktoro Jivago (Libro 1)

Che krucumo kuris puerulo kun jurnali sub la brakio e vokis „Lasta informi!"

„Esas en ordino", dicis la mediko. La puerulo transdonis la jurnalo ad JIVAGO e desparis en nivo-tempesto. La mediko iris sub lanterno por tralektar ja hike la jurnalo.

Ek Peterburg venis la informo pri la konstituceso dil Konsilistaro dil Popul-Komisarii, pri la erekto dil soviet-povo en Rusia e la erekto dil diktatoreso dil proletariaro. On raportis pri la unesma dekreti, qui venis per la telegrafilo e la telefonili. La nivo kovris la okuli di JIVAGO e la literi en la jurnalo.

201

Ma to ne esis obstaklo por JIVAGO. La grando di ica evento shanceligis e konfuzigis lu. Por lektar pluse la informo, JIVAGO serchis a nivo- libera loko. Ma il perceptis, ke il ja itere trovesis inter la Serebryany-strado e la Moltshanovskaya, koram la pordo-voyo di granda edifico kun vitro-pordo ed elektrala lumo en koridoro.

La mediko eniris la edifico e lektis en lumo dil elektrala ampulo la telegrami.

Super lu resonis pazi. Irgu iris adinfre e restis kelkfoye heziteme stacar. Lore la persono iris la eskalero adsupre. Irg-ube on apertis pordo e resonis du voci, ma nulu povis dicar ka da muliero o viro. Pordo klapis, e la persono iris itere adinfre, ma nun plu rapide. JIVAGO lektis ankore sempre. Il ne volis vidar la stranjero. Icu atingis nun la koridoro e restis stacar. JIVAGO levis la kapo e regardis lu. Koram lu stacis yuna viro en rentiro-mantelo di siberiana maniero e shapko. Il havis obskura vizajo kun streta aziana okuli. Ica vizajo posedis aristokratala aspekto, certena nobleso, kam che homi ek diversa sango.

La yuna viro taxis JIVAGO kom altra persono. Il regardis JIVAGO, ma evidente il ne volis parolar kun lu. JIVAGO respondis la situeso per kolda regardo, tale ke la altra viro kapitulacis.

La yuna viro iris al pordo, senvorte. Il iris sur la strado. Pos dek minuti JIVAGO sequis. Il ne pensis pri la yuna viro o la kolego, ma nur pri la politikala eventi. Survoye altra evento ecitis sua atenco.

Kande il esis ja en la proximeso de sua domo, il vidis sur la trotuaro monto ek planki e trabi.

202

Hike en la strado trovesis irga instanco, qua obtenus evidenta la brul-ligno. La trabi baris nun parto dil strado. Soldato kun fusilo gardis la ligno en korto ed inspektis kelkfoye la strado.

JIVAGO vartis a favora okaziono. La soldato esis denove en korto, e la nivo divenis nun plu densa. Lore il iris en la ombro al monto ek ligno, tiris ek la staplo poka bloko, pozis ol sur la shultro ed iris alonge la obskura muri a sua domo.

En domo esis nula la brul-ligno, e la ideo da JIVAGO trovis acepto. On dissegis la bloko. JIVAGO sidis koram la furnelo e varmigis. Il dicis nula vorto. Lua bopatro tiris la stulego al furnelo por varmar su. JIVAGO transdonis la jurnalo a sua bopatro e dicis: „Hike! Vu devas lektar to. Multe plezuro!" JIVAGO pikis per la hoko en furnelo e dicis en su ipsa: „Grandioza kirurgio! On forigas koncize la fetida, olda tumori! Simpla decido pri la oldega neyusteso! On ne adoras pluse sur la sulo ica sistemo. La fakto, ke on exekutis ica procedo til la fino, esas olda rusa moro. Esas kam la absoluta lumo di Pushkin, esas kam la neflexebla realeso di Tolstoi." „Ka tu dicis Pushkin? Momento, me esas senfriste pronta. Me ne povas samtempe lektar ed askoltar", interruptis Gromeko JIVAGO. Gromeko kredis, ke JIVAGO parolabis kun lu.

„Avan omno, quo esas geniala pri ica afero? Se on imperus, ke irgu devas krear nova mondo e nova tempo, ica persono postulus, ke on aranjas libera loko por lu. Il vartus til la fino dil olda tempo venus, ed il bezonus nova dato, reda lineo e vakua papero.

203

E nun? La nova, la miraklo dil historio, ica revelo existas nun en nia normala vivo. On ne komencis kun la komenco, ma en la mezo, sen dato, dum la tramvoyo vehis tra la urbo. To esas geniala. Nur vere granda eventi povas venar en tante desfavoroza tempo kam hodie"

9

La vintro venis segun la predico. Ol esis ne tante teroriva kam la du sequanta, ma tenebra, hungranta e kolda, en signo dal superhomala peni konservar la ekglitanta vivo. Tri teroriva vintri aparis, e ne omno eventis 1917-18 segun la nuna memoro, ma forsan unesme plu tarde. La tri vintri formacis uneso, e nulu povis distingar oli. La olda vivo e la nova ordino montris ankore diversa formi. Existis ankore nula furianta enemikeso kam dum la civila milito, ma anke nula interligo. Esis du diversa partisi sen konsento. Omnaloke eventis nova elekti: en la privata domi, en la instanci, en la fabrikerii ed en la publika edifici. On kambiis la personi. Regnis nun komisarii kun absoluta povo, homi kun fera volo en nigra ledra-vestii kun revolveri, viri, qui razis su rare, e qui dormis ankore plu rara. Li konocis la borgezo, la spekulanti, la filistri, e li indulgis nulu, li traktis ili per demonala moko kam poka furtisto.