Две Библии – два пути [Авторская редакция]

И рече Господь к Моисею: отягчися сердце фараона, еже не отпустити людий: иди к фараону заутра: се, той исходит на воды, и буди сретая его на брезе речнем: и жезл обращейся в змия возми в руку твою, и речеши к нему: Господь Бог еврейский посла мя к тебе, глаголя: отпусти люди моя, да ми послужат в пустыни: и се не послушал еси доселе: сия глаголет Господь: се аз ударю жезлом, иже в руце моей, по воде речней, и приложится в кровь: и рыбы, яже в реце, изомрут, и возсмердится река, и не возмогут египтяне пити воды от реки. Рече же Господь к Моисею: рцы Адрону брату твоему: возми жезл твой в руку твою …и взем Аарон жезл свой, удари воду речную пред фараоном и пред рабы его, и преложи всю воду речную в кровь (Исх. 7:14–20). Рече же Господь к Моисею: рцы Аарону брату твоему: простри рукою твоею жезл твой на реки и на кладязи и на езера, и изведи жабы на землю египетскую (Исх. 8:5). И воздвиже Моисей жезл на небо, Господь же наведе ветр южный на землю во весь той день и во всю нощь: утро бысть, и ветр южный взя пруги, и наведе на всю землю египетскую (Исх. 10:13). И рече Господь к Моисею: что вопиеши ко мне? Рцы сыном Израилевым, и да путешествуют, ты же возми жезл твой и простри руку твою на море, и расторгни е: и да внидут сынове Израилевы посреде моря по суху …Простре же Моисей руку на море, и возгна Господь море ветром южным сильным всю нощь, и сотвори море сушу, и разступися вода. И внидоша сынове Израилевы посреде моря по суху, и вода им стена бысть одесную и стена ошуюю. Погнаша же египтяне и внидоша вслед их… И рече Господь к Моисею простри руку твою на море, и да совокупится вода и да покрыет египтяне, колесницы же и всадники… Простре же Моисей руку на море, и устроися вода ко дню на место… и обратившееся вода покры колесницы и всадники и всю силу фараонову (Исх. 14:15–16, 21–23, 26–28). И рече Господь к Моисею: поиди пред людьми сими и поими с собою от старец людских, и жезл, им же пресекл еси море, возми в руку твою, и поиди: Аз же стану тамо прежде пришествия твоего у камене в Хориве: и удариши в камень, и изыдет вода, и да пиют людие. Сотвори же Моисей тако пред сыны Израилевыми (Исх. 17:5–6). Прииде же Амалик и воева на Израиля в Рафидине. Рече же Моисей ко Иисусу: избери себе мужи сильны и изшед ополчися на Амалика заутра: и се, аз стану на верху горы, и жезл Божий в руце моей… И бысть егда воздвизаше Моисей руце, одолеваше Израиль …и преодоле Иисус Амалика (Исх. 17:8–9, 11, 13).