История татар. Том IV. Татарские государства XV-XVIII вв.

Приход Казаньскых людей на передовой полк. И в неделю, 28 Августа, приидоша с лесу многие люди Казанцы на Арьское поле и нападоша внезапу на передовой полк и поставленаго голову на сторожех от лесу Третиака Лошакова убиша. Воевода же князь Дмитрий Ивановичь Хилков поскориша приити на них, на станы бо его приидоша, и храбрствовавшу мужествене на них, крепце биющеся с ними, такоже приспевшу боярину князю Ивану Ивановичю Проньскому, помале из большево полку приспевшу боярину князю Ивану Феодоровичю Мстиславьскому и княже Володимерову боярину Андреевича князю Юрью Оболеньскому. Государю вестно воеводы учиниша, и государь вскоре повелел дворовым воеводам головы послати, и сам государь хотяше поспешити к своему делу. А онем же бившемся, и потопташа воеводы Татар по лес и разыдошася, живых от них изымаша Мырзу Шаболотова сына княжево с товарищи; и на том бою от обоих же падоша и многым язвленым быша. Языкы же государю сказывали, что проходили Япанча-князь да Евушь-князь из острогу от Арска, и мысль их в все места приходити х полком царьскым, да где пакость сътворят. И в понеделъник, 29 Августа, повеле государь правой руке, боярину князю Петру Михайловичю Щенятеву да воеводе князю Андрею Михайловичю Курбьскому, да ертоулом, князю Юрью Ивановичю Проньскому да князю Феодору Ивановичю Троекурову, за Казанию по берегу Казани-реки против города туры ставити. И [207] урядиша воеводы по государеву наказу по предиреченному, стрелетцкого голову Ивана Ершова с стрелцы и многых атаманов напред послаша, и стали стрелцы и казакы по брегу и закопалися во рвы; из города же стреляюще ис пушек и из пищалей и из луков, а стрелцы на них стреляше из пищалей и казаки из луков Воеводы же туры поставили мужествено и землю укрепили и сами под турами стали, под цареву повелению, правая рука, а ертоул поиде на Арьское поле. Татарове же с леса выехав на поле Арьское конные многые и пешие и сташа близко лесу, а иным в лесу; государь же повеле своим полком брежно стояти, а с ними не битися, и заповедаша ни единому человеку не ехати травитца. Полцы же болшей полк и передовой полк, болшие воеводы и княже Володимиров Андреевича боярин князь Юрьи Оболеньской, и головы с людми царьского полку стояше через весь день. А государь велел в той день туры ставити с Арскаго поля против города, а послал от себя боярина князя Дмитриа Феодоровича Палецкого да Алексиа Адашева, да другим воеводам передовово полку и ертоулу, да со князем Дмитрием послал своего полку головы многие з боярьскыми людми, стрелецкого голову Якова Бундова. И поставиша туры от болших туров, что князь Михайло ставил, по Казань по реку против Кабатьцкых ворот да Збойливых ворот да и Крымскых ворот и Елбугиных ворот без бою: Казанцы не вылазили, толко стрельба была з города из пушек и из пищалей, из луков, а стрелцы и боярьскые люди на них стреляше. И где нелзе турам быти, и государь, пересмотря место, повеле диаку своему Ивану Выродкову промежь тур тын ставити. И утвердиша государь град Казаньской своими крепостьми: ни в город, ни из города весть не проидет; и приказал государь боярину своему Михаилу Ияковличю Морозову круг всего города наряд поставити и бити безпрестани по граду.