История татар. Том IV. Татарские государства XV-XVIII вв.

О вылазке из города Казаньскых людей. И как пошли к городу, и Казанцы вылезли многые люди конные и пешие, и обоим, христианом и Татаром, биющеся крепце на много время, и из пушек по граду и по воротам безпрестани биюще и стрелцы из пищалей, такоже и з города ис пушек и из пищалей стреляху, и бысть сеча велиа и приужастна, от пушечного бою и от пищалного грому и от гласов и вопу и кричаниа от обоих людей и от трескоты оружий и не бысть слышати друг друга глаголаннаго, бысть яко гром велий и блистание от множества огня пушечнаго и пищалнаго стреляниа и дымного курениа. И Богу помогающу православным, одолеваху безбожных и множество побиша Татар и в град вбиша их, и мосты градцкые наполнилися мертвых. И сташа головы стрелетцкие, стрелцы и головы з боярьскими людми и казаки по рву града и стреляхуся из пищалей и ис луков; а князь Михаило Ивановичь утвердиша туры и землею насыпаша за 50 сажен от города, от рекы от Булака и по ворота, против всего города с приступных мест, и велит головам всех людей отвести к турам и перед турами веляше стрелцом и казаком против города закопатися во рвы. А из города же вылазя, биющеся, и до полунощи приходяши х турам и биющеся и за рукы имаяся, и Божиим поспешеством побиваху поганых православнии и во град вбивааху их; тако и чрез всю нощь биющеся безпрестани приходящи х турам и биющеся и за рукы имающеся, ни мало сна приемлющи, и Божиею помощию побиваху поганых. Государь же благочестивый безпрестани велит в церквах молебная съврешати, и посылает государь по часом бояр своих, да утверждаются и не ослабевают биющеся. И на том бою Божиею помощью множество побита Казанцов, убили князя Ислама Нарыкова, Башканду Бранцова и Сюнчелеябагатыря, и многых князей и мурз побили. Православнии же по Божией благодати немногие падоша, от выборных голов з боярьскыми людьми сын боярьской Левонтей Борисов сын Шюшерин, а многие быша ранены да Божиею благодатию вставающе; и о сем государь благодарение Богу въздает и впред делом пространяет.

Наряд болшей к городу прикачен. И в суботу, 27 Августа повеле государь боярину своему Михаилу Яковлевичю Морозову наряд болшей прикатити [206] к турам; и посылает государь околничего своего Петра Василиевича Морозова, а велит у тех же тур быти, которые князь Михайло ставит. И боярин Михайло Яковличь прикатиша наряд и устроиша, как ему быти по местом; и начаша безпрестани по граду бити стенобитньм боем и верхными пушками огнеными, побиваху многих людей из наряду; такоже и стрелцы пред турами в закопех не даваше на стенах людем быти и из ворот вылазити… многих побиваша. Того же дни послал государь околиичего своего Ивана Михайловича Воронцова мест смотрити, где стояти болшему полку. А в то время вылазил из Крымскых ворот Карамышь-улан, Кудайгу-уланов сын, те же бе ему ворота приказаны, хотяше добыти языка близ княже Иванова полку Мстиславьского, полку же не собрану; и поскорившу князю Ивану Феодоровичю приити на них, и побиша их, Карамыша-улана жива изымавше; самово же князя Ивана уязвиша двемя стрелами, прочии же все здравы бысть христиане. И князь Иван Феодоровичь Карамышь-улана послал к государю царю великому князю, царь же веляше его крепко пытати. И сказывал Карамышь, что люди в городе в пятницу многие побиты, а царь Казаньской Едигер-Магмет и вся земля Казаньская на смерть в городе затворилися и не хотя государю бити челом, Бог бо ожесточи сердца их, якоже и фараонови, да прославитця имя Его святое в нас.