История татар. Том IV. Татарские государства XV-XVIII вв.

Речь царьская ко князю Владимиру. Царю же благочестивому взирающу на знамя, на нем же образ Създателев и животворящий крест, непрестанно слезы лиющие и молитвы Богу непрестанно възъсылающу, по скончании же молебнов призва государь к собе князя Владимира Андреевича и боляр своих и воевод, всех своих въинов, кои с ним в полку, и учал говорить умилно: „Приспе, князь Володимер Андреевичь и все бояре и воеводы, время нашему подвигу еже за благочестие побарати подщитеся, пожалуйте, единодушно пострадати за благочестие, за святые церкви и за нашу православную христианьскую веру, призывающе милосердаго Бога на помощь, не сумняяся ничтоже, за единородную нашу братию православныа христиане, еже напрасно от многых лет плененых и зле страждущих от безбожных сих Казанцов. Въспомянем Христово слово: ничтоже сего болши еже душа полагати за други своя; припадем чистыми сердци к Създателю нашему Христу, попросим у него избаву бедным христианом, да нас не предаст в рукы врагом нашим и не порадуются врази наши погибели нашей. Да и нам послужите, сколко вам Бог поможет, не пощадите голов своих за благочестие, несть бо си смерть, но животе; аще не ныне умрем… всяко умрем, и от сих безбожных как впред будем? Аз же сам с вами на се приидох, лутче собе избрах зде умрети, неже жити и видети имам за грехи свои Христа хулима и порученныа [203] мне от Бога христиане зле мучимых от безбожных Казанцов. А нечто нам милосердый Бог милость свою пошлет, видев вашу неотложную веру, поборающе по благодати, подаст помощь, якоже Его воля и яз вас рад жаловати великим жалованием, своею любовию, и всех вас недостаточная наполнити и всяко пожаловать, сколко милосердый Бог поможет: а кому от нас лучится пострадати, и аз рад жены их и дети до века жаловати“.

Ответ к царю. Князь же Владимир Андреевичь и вси бояре и воеводы единомысленно государю отвещаша со слезами и многым плачем: „видим тобя, государя, тверда во истиннем законе и за православие не щадя собя и нас на то утвержающа, должни есмя вси единодушно помрети з безбожными сими Агаряны; дръзай, царю, на неже еси пришел, да збудется на тебе, государе нашем, Христово слово: всяк просяй приемлет, толкущему отверзается“. Слышит же благочестивый государь, еже не инако отвещают, но единомысленно с ним побарают за благочестие пострадати, и въспоминает, иже единомысленныя Господь вселяет в дом свой, и възрев на Создателев образ, еже всем слышати: „о Владыко! о твоем имени движемся и есмы; ты, Владыко, пособствуй нам силою крестною и укрепи нас силою честнаго креста и благодатию Святаго Духа!“ На мног же час прослевишася вси полцы, видяще образ Христов и помощи просяще. И приходит к отцу своему духовному Андрею протопопу, и благословляет его протопоп крестом животворящим и глаголет ему: „дерзай, слуго Божий, ибо Той победит врагы, яко человеколюбец, человеколюбив бо владыка наш Христос!“ Крестом его ограждает, и царь же крестом благословляется, а на враги ополчается. Повеле же государь всем полком крестом огражатися, въсходит на аргумак, и радуются зело государем духовною радостию вси его воини, избрав лутше смерть, неже живот тленной, хотяще венчатися за Христа, и охрабрившеся вси благодатию Святаго Духа. И урядя полки поеде прямо к городу, я приидоша яртоулы государевы х Казани вверх Булака у Кабана-oзepa, и вылезли Казанцы из города и пришли встречю государевым полком; государева же заповедь, без веления да нихто не дерзнет на бой. Казанцы же, приехав, начаша стреляти на полк, а стрелцы государя нашего из пищалей на них стръляют; и Казанцы конные на пешие стрелцы приехаша, и князю Юрью Ивановичю Шемякину и князю Феодору велел ис полку из своего детем боярьскым пособити стрелцом. И сразившемся обоим, Руси и Татаром, и Богу помагающи православным, погнаша Казанцов и к самым вратам градцкым и Татар побиша, а иных уязвиша; и воеводы съехаша к городу и отслаша всех детей боярьскых в полк. Государевы же все съхранены Богом быша, немногые ранены от них; из ыных же полков ни един человек не поехал: не повелено; и вси зряще и дивляхуся царьскому урядству и повелению. Царь же Шигалей и воеводы прешедше Булаку и став на Арьском поле, аможе повеле государь.