Избранные сочинения

Печаль ми, чадо, велику твориши,
егда у мене отпуста молиши.
Вижду тя не у добрѣ изученна,
юности воля сия нѣсть спасенна.
165 Но да увѣси, коль добро слушати,
шествуй со богом, не хощу держати.
Часть ти достойну всѣх добр отлагаю,
храни опасно, тощно увѣщаю.

Отец же к рабом

Раби вѣрнии! Злато несите,
170 многоцѣнныя одежды дадите,
Много колесниц сребром наполняйте,
турския кони уборно сѣдлайте.

Слуга к отцу

Государю наш! Се на твоя слова
злато, одежды и вся суть готова.

Отец к сыну блудному

175 Приемли, чадо, то благословение,
точию твори доброе строение.

Сын блудный к отцу

Цѣлую руцѣ твоѣ, родителю!
Любо приемлю вся, благодѣтелю!

Отец к рабом

Возы и кони на дворѣ ставляйте,
180 вся потребная в путь уготовляйте.

Раб к отцу

Вся совершенна, ни мало медлихом,
по твоей воли дѣло совершихом.

Отец к сыну блудному

Се, чадо мое, тя обогащаю,
по твоей воли тебе отпущаю
185 И подаю ти благословение:
имѣй о себѣ сам попечение.

Сын блудный к отцу

Отче любезны! Се ти челом бию,
под твоѣ нозѣ преклоняю выю,
Благодаря тя за вся благодати,
190 яже ми еси изволил подати.
Любо цѣлую благословение,
с ним рад приемлю путетворение.

Сын блудный ко брату

И тебе, брате любезный, лобзаю,
милости вашей сам ся поручаю.
195 В молитвах ваших мене поминайте,
крове своея не пренебрегайте.
Аз уже иду, вы мя проводите,
с благословенством в путь мя отпустите.

Сын старѣй ко брату

Щасливый путь ти от господа буди!
200 Вездѣ мя, молю, брате, не забуди.
Аз хощу выну любовь сохранити,
се иду со отцем тебе проводити.

И пойдут вси за завѣсу. Пѣвцы поют, и будет intermedium.

Часть II

Изыдет Блудный сын с немноги слугами и глаголет

Хвалю имя господне, свѣтло прославляю,
яко свободна себе нынѣ созерцаю.
205 Бѣх у отца моего, яко раб плѣненный,
во предѣлѣх домовых, як в турмѣ замкненный.
Ничто бяше свободно по воли творити:
ждах обѣда, вечери, хотяй ясти, пити;
Не свободно играти, в гости не пущано,
210 а на красная лица зрѣти запрещано.
Во всяком дѣлѣ указ, без того ничто же.
Ах! Колика неволя, о мой святый боже!
Отец, яко мучитель, сына си томляше,
ничесо же творити по воли даяше.
215 Нынѣ, слава богови, от уз свободихся,
егда в чуждую страну едва отмолихся.
Яко птенец из клетки на свѣт изпущенный,
желаю погуляти, тѣм быти блаженный.
Богатство имам много и доволно хлѣба,
220 нѣсть кому его ясти, слуг болши потреба.
Аще ся кто обрящет охотник служити,
имам сладцѣ питати и цѣнно платити.

Слуга блуднаго

Милостивый государю, аз хощу искати
таковых, иже тебѣ будут работати.

Блудный

225 Друг ми будеши, не раб, егда со слугами
многими немедленно станеши пред нами.
Возми на путь сто рублев, за труды другое;
егда возвратишися, дам ти еще втрое.

Слуга