Избранные сочинения

Государю наш, челом бием тебѣ
за хлѣб и за соль, а слуг ищи себѣ;
Мы прочь отходим, пьяницу лишаем,
за свои труды сами мзду воздаем.

Он же глаголет ко клезретом

345 Чего, братия, у него нам ждати?
Что по том за труд возможем прияти?
Емлим останки, сам да погибает,
како в пред жити, юноша да знает.

Здѣ вси крикнут: „Емлим, емлим, емлим!“ и расхитят останки. Един же от них, сирѣчь Слуга 10, глаголет

Еще тебѣ милость сию сотворяем,
350 яко тя, безумна, в живых оставляем.
Моли бога за нас, не являй никому,
возвратися скоро к отцу до дому.

И отходят вси.

Блудный

Увы мнѣ! Увы мнѣ! Что се сотвориша?
Вся вземше, едва мя жива оставиша.
355 Что сотворю? Пойду, велю их имати,
еда что сокровищ возмогу сыскати.

И отходит, плачя. Пѣние, ему же послѣдует intermedium.

Часть IV

Изыдет Блудный гладен, продает послѣднюю одежду облекается в рубище, службы ищет, пристает к господину, посылается свиния пасти, пасет, яст со свиниами, свинию погубил, биен; ищет и, плача, глаголет: „Коль много хлѣба у отца моего“ и проч.

Блудный

Горе мнѣ, бѣдну! Горе окаянну,
сущу безкровну, безпомощну, странну!
Людие злыи вси ми расхитиша,
360 ниже на пищу мало оставиша.
Глад стражду велий. Кто мя напитает?
Во странѣ чюждей никто мя не знает.
Едина токмо оста ми одежда,
на ту о хлѣбѣ послѣдня надежда.

Изыде Купчин, имѣя свиту и хлѣб, и глаголет

365 Что ти, юноше? Кая печаль тебѣ?
Не сумнив буди, а мужайся себѣ.

Блудный

Добрый человѣче! Кая ми отрада!
Вчера богат бѣх, днесь гибну от глада.

Купчин

Глад мощно хлѣбом скоро утолити,
370 аз продам хлѣба, изволи купити;
За ту одежду хлѣб ти продаваю
и мою ризу свыше прилагаю.

Блудный

Бог тя даде ми, человѣче благий!
Гладну ми сущу, хлѣб зѣло не драгий.
375 На моя риза, изволь свою дати,
нужда ми зѣлна урок чреву дати.

Ту замѣнят ризы и, хлѣб отдая, Купчин глаголет

Яждь во здравие, хлѣбом насытися,
а чрева ради трудом приложися.
Аще хощеши вѣрно послужити,
380 имам тя добрым людем предъявити.
Вѣм человѣка богатаго зѣло,
тому на службу предадися смѣло.

Блудный

Аггел ми еси, свято твое слово:
се мое сердце служити готово.

Ту изыдет Человѣк богатый и глаголет к купчину и Блудному

385 Откуду людие и что дѣло ваше,
яко в стрѣтение случистеся наше?

Купчин

Аз куплю дѣю и тѣм ся питаю,
аще в товарѣх прибыль обрѣтаю.
Сей же клеврет мой хощет работати,
390 аще изволит кто его наяти.

Господин

Аще есть вѣрен, не должен никому,
приму служити до моего дому.

И обращся к Блудному и речет:

Слыш, человѣче! Хощеш ли служити
и во всем вѣрен господину быти?

Блудный

396 Рад, государю, тебѣ работати
и во всем вѣрность мою сохраняти.

Господин

Даждь же ми руку на праведном словѣ
да будеш крѣпок нам по сей умовѣ.

Блудный