Избранные сочинения

Вѣрнии раби, боляре, дворяне
и вси царств наших славнии земляне!
Видите крѣпость десницы моея:
40 вся побѣжденни суть страны от нея;
Никто противу возможе ми стати,
весь мир един аз имам одержати,
Всяких стран бози с нами не дерзают.
Нас бога богов от днесь вси да знают!
45 Тѣмже умыслих образ сотворити
лица нашего и всѣм представити
На полѣ Дейрѣ, да вси почитают
образ наш и нас бога нарицают.
Слыши, казночей! Се велим мы тебѣ:
50 даждь чиста злата, елико есть требѣ,
Абие вели образ наш творити,
на превысоцѣ столпѣ поставити.

Казначѣй

Что бог вѣщает, страшно есть то слово,
по твоей воли все будет готово.

Отъидет Казначей дѣлати образ, а Навходоносор глаголет

55 Егда наш образ златый созерцаем,
тогда всѣх вѣрность, яже к нам, познаем.
Любяй нас вѣрно будет препочтенны,
не любяй паки будет осужденны.
Слыши, Зардане! Вели готовати
60 пещ, смолу, нафу и огнь розжизати
Близу образа, да всяк вовержется,
им же наш образ честный не почтется.

Зардан

Веселым сердцем твое веление
приведу вскорѣ во исполнение.

И отходит Зардан, и начнет глаголати болярин

Навусар

65 Свѣтлый наш царю и пресилный боже!
Никто ти в бранех силен быти може.
Нынѣ ли убо может кто дерзати,
еже противу воли твоей стати?
И слово твое огню подобится,
70 того и пещи кто не убоится!
Добрѣ велиши огнем сожигати
образу чести не хотящих дати.

Навходоносор

Добро все, еже бог повелѣвает,
аще и весь мир в конец погибает.
75 Мы тако хощем: кто дерзнет судити,
в един час велим живота лишити.
Вы днесь печалей нам не поминайте,
о мусикии сладцей промышляйте.

Приидут мусикии, и речет к ним Навусар

Елика вѣсть утѣшная быти,
80 та потщитеся пред царем творити.

Здѣ будут ликовствования.

Приходит Казночей и глаголет

Царю пресвѣтлый, живи ты во вѣки,
вся превозшедый мира человѣки!
Се уже слово твое совершися,
образ твой честный лѣпо поставися.

И отложше завѣсу, покажется образ стояй

Навходоносор глаголет

85 Вѣрныи мои раби! Блажим труды ваша,
отселѣ будет милость на вас наша.

Приходит Зардан и глаголет

Царю над цари! Царствуй многи лѣта
над всѣми страны до кончины свѣта!
Се твоя воля мною исполненна,
90 велиим зѣло пещ огнем разжженна.

И покажется пещ.

Навходоносор

Добрѣ трудился, но не угашайте,
изгребий, смолы, нафы прилагайте,
Да, то видяще, вси ся поклоняют
образу злату, нас с ним почитают.

Зардан

95 Рад то творити, еже ты велиши,
Сам свѣтлым оком работу узриши!

Навходоносор ко Амирѣ болярину