Избранные сочинения

Вѣрныи слузи истиннаго бога!
Да не смущает вас печаль премнога!
Не оставит вас господь всемогущий,
не повредит вы пламень все ядущый.
165 Яко росою тѣм ся охлаждайте,
богу вашему честь и славу дайте!

Тогда Азария, или Мисах начнет глаголати умиленно: „Благословен еси, господи боже отец наших, и хвално и прославленно имя твое во вѣки, яко праведен еси о всяческих, яже сотворил еси нам“ и проч., яко же есть у Даниила в главѣ 3. Здѣ огнь из пещи халдеи опалит и един от них возопиет:

Увы нам! Лютѣ огнь нас пожигает,
иже из пещи чюднѣ избѣгает.

И падут они. Царь, увидѣв, возопиет сице

Кое то чюдо? Пламень утекает
170 из пещи и раб моих опаляет.
Возмите трупы, земли предадите,
сами ся огня лютаго блюдите.

Таже вси трие отроци умиленными гласы да поют: „Благословен еси, господи боже отец наших, и хвален и превозносим во вѣки“ и проч., яко таможде у Даниила

Амир глаголет

Оле чюдесе! Врази не сгоряют,
нѣкия пѣсни сладцѣ воспѣвают.

Царь глаголет

175 Видѣние паче слуха увѣряет,
хощу, да око мое соглядает.

И, востав, воззрит в пещ и, яко узрѣти ему четырѣх в ней сущих, речет к боляром:

Что есть, вельможи? Не три ли ввержени
отроцы во огнь, да будут сожжени?

Амир глаголет

Ей, трие, царю, казнь сию прияша,
180 яко образу поклона не даша.

Царь

Что убо вижду, в пламени огненни
четыре мужи ходят разрѣшенни!
Вси суть без вреда, четвертый блистает,
яко сын божий. О, чюдо бывает.
185 Увы мнѣ, увы! Аз грѣшный прельстихся,
на рабы бога живаго ярихся.
Они суть святи, аз же грѣшен зѣло;
невинных и огнь сохранил есть цѣло.
Что убо имам аз, бѣдный, творити?
190 О прощение хощу их молити.

И приступль Царь к пещи глаголет

Седрах и Мисах, Авденаго честный!
О, раби бога, иже есть не лестный!
Тощно из пещи сея изидите,
к нам согрѣшившым в ползу приидите.
195 Прощение ми изволте дарити,
богу вашему аз хощу служити.

Ту изыдут отроцы неврежденны, их же зряще, велможи воскликнут:

1

Оле чудесе! Како не сгорѣша

отроци сии и огнь одолѣша?

2

И то есть дивно, что власы суть цѣлы,

200 аще великим пламенем горѣлы.

3

Зрите одежды, како не растлѣнны,

бывше великим пламенем паленны.

4

Ей, чюдо есть се, но кто оно дѣет,

ум неискусный мой недоумѣет.

Царь