Хожение за три моря Афанасия Никитина 1466-1472 гг.

В пятый же Велик день възмыслих ся на Русь. Идох из Бедеря града за месець до улубагряма бесерменьского Мамет[244] дени розсулял, а Велика дни кристьанского не ведаю Христова въскресения, а говейно же их говех з бесермены, и розговехся с ними, и Велик день взял в Кельбери от Бедери 10 ковов.

Султан пришол да Меликътучар с ратию[245] своею 15 по улебагряме, а в Келбергу; и война[246] им не удала[247], один город взял /л. 456 об./ индийской, а людей их много изгибло, и казны много истеряли. А индийскый же салтан кадам велми силен, и рати у него много, а сидит в горе в Бичинегере. А град же его велми велик, около его три ровы, да сквозе его река течет; а со одпу[248] страну его[249] женьгель злый, а з другую страну пришол дол, и чюдна места велми угодна все, на ону же страну приитти некуды[250], сквозе градо дрога, а града же взяти некуды, пришла гора велика да дебер зла тикень. Под городом же стаяла рать месяць, и люди померли безводни, да голов велми много изгибло з голоду да з безводицы; а на воду смотрит, а взяти некуды. А град же взял индийской Меликъчан хозя, а взял его силою, день и нощь бился з городом 20 дни, рать ни пила, ни ела, под городом стояла с пушками; а рати его[251] изгибло пять тысяч люду доброго, а город взял, ини высекли 20 тысяч поголовья мужского и женьского, а 20 тысяч полону взял великого и малого, а продавали[252] голову полону[253] по 10 тенек, а робята по две тенкы[254], а казны же не было ничего, а болшего города не взял.

А от Кельбергу поидох до Кулури; а в Кулури же /л. 457/ родится ахикь, и ту его делают на весь свет, оттуду его розвозят; а в Курили же алмазников триста, сулях микунет. И ту же бых пять месяць, а оттуду же поидох Калики, ту же бозар велми велик; а оттуду поидох Конаберга; а от Канаберга поидох к шиху Аладину; а от шиха Аладина поидох ко Аменьдрие; и от Камендрия к Нарясу; и[255] от Кинаряса к Сури; а от Сури поидох к Дабыли, пристанище Индийского моря.

Дабил[256] же есть град велми велик, а к тому же Дабылп, а[257] съезжается вся поморья Индийская и Ефиопская. Ту же окаянный аз, рабище Афонасей бога вышнего, творца небу и земли, възмыслихся по вере по кристьянской, и по крещении Христове, и по говейнех святых отець устроеных, по заповедех апостольских, и устремихся умом поитти на Русь; и внидох и зговорих о палоне[258] корабленем, а от[259] своеа главы[260] два златых до Гурмыза града доити.

Внидох же в корабль из Дабыля града до Велика дни за три месецы, бесерменского говейна; идох же в таве по морю месяць, а не видех ничего; на другий же месяць увидех горы Ефиопскые. Ту же людие вси воскричаша: «Олло перводигер, олло конъкар, бизим баши мудна насинь[261] больмышьти», а по-ру/л. 457 об./скыи[262] языком молвят: «Боже осподарю[263], боже, боже вышний, царю небесный, зде нам судил еси погибнути».

В той же земле Ефиопской бых пять дни, божиею благодатию зло ся не учинило, много раздаша брынцу, да перцу, да хлебы ефиопом, ини судна не пограбили[264].[265] А оттудова же идох 12 дни до Мошката, в Мошкате же шестой[266] Велик день взял, и поидох до Гурмыза 9 дни, и в Гурмызе бых[267] 20 дни. Из Гурмыза поидох к Лари, и в Лари бых три[268] дни[269]. Из Лари поидох к Ширязи 12 дни, а в Ширязе бых 7 дни. И из Ширяза[270] поидох к Вергу 15 дни, а в Велергу[271] бых 10 дни. А из Вергу[272] поидох к Езди 9 дни, а в Езди бых 8 дни. А из Езди поидох к Пагани[273]. И поидох[274] Кашини,[275] а в Кашини[276] бых 5 дни. А ис Кашина[277] поидох к Куму. А ис Кума поидох в Саву. А из Сава[278] поидох к[279] Султанью. А из Султания поидох до Тервизя[280], поидох в-ръду[281] Асанбег[282], в орде[283] же бых 10 дни, ано пути нет никуды. А на Турского послал[284] рати двора своего 40 тысяч, или Севасть взяли, а Тохат взяли да пожгли, Амасию взяли, и много пограбили сел, да пошли на Караманского воюючи. И яз из орды пошол ко Арцыцану[285]; а из Орцыцана[286] пошол есми в Трепизон[287].

В Трепизон[288] же прии/л. 458/дох на Покров святые богородица и приснодевы Мариа, и бых же в Трапизони[289] 5[290] дни, и на корабль приидох и сговорил о налоне[291] дати золотой от своеа главы до Кафы, а золотой есми взял на харчь[292], а дати в Кафе. А в Трапизоне[293] ми же шубашь[294] да паша много зла учиниша, хлам мой весь к себе възнесли в город на гору, да обыскали все - что мелочь[295] добренкая, ини[296] выграбили все; а обыскывают[297] грамот, что есми пришол из орды Асанбега.