Хожение за три моря Афанасия Никитина 1466-1472 гг.

И тут есть пристанище Гурмызское, тут бо есть море Индейское, а парсейским языком и Гоньдустанская дория. Оттуду же итти морем до Гурмыза 4 мили. А Гурмыз есть на острове, а ежедней поимает его море по дважды на день; и тут есми взял един Велик день, а пришел в Гурмыз за 4 недели до Велика дни[327]. А городы не все писал. Много городов великих. А в Гурмызе есть варное солнце, человека сожжет[328]. И был яз тут месяц, а оттуду пошел в Фомину неделю за Индейское море в таву с конми.

И шли есмя морем до Мошката 10 днии; а потом /л. 302 об./ до Дегу 4 дни; а потом Кузряту; а оттуду к Онбату, а тут ся родит краска да лец[329], и оттуду к Чивилю; и в седмую неделю по Велице дни от Чивиля в таву с[330] конми, и шли 6 недель морем до Чивиля.

То есть страна Индейская, и люди ходят наги все, а голова не покрыта, а груди голы, а волосы в одну косу плетены, а все ходят брюхаты, детей у них много, понеже на всякой год родят, и черны мужи и жены все; яз бо куды хожду, ино за мною людей много, дивятся белому человеку.

А князь их фата на голове, а другая на бедрах; а бояре у них ходят фота на плеще, а другая на бедрах; а княгини ходят фата по плечам обогнута, а другая на бедрах; а слуги княжие и боярские фата на бедрах обогнута, да щит да меч в руках, а иные с сулицами, а иные с ножи, а иные с саблями,[331] а иные с луками[332] и с стрелами, а все наги да боси; а жонки ходят голо/л. 303/ва не покрыта, а груди голы, а паробки да девочки ходят наги до 7 лет, срам не покрыт.

А ис Чювиля пошли есмя сухом до Пали 8 днии до индейские горы; а оттоле до Умрии 10 днии, то есть город индейскии; оттоле же до Чюнейря 6 днии, и тут есть Асатхан Чюнерские Индийские, а холоп Меликтучаров[333], а держат, сказывают, 7 тем от Меликтучара. А Меликтучар седит на 20 тмах; а бьется с кафары 20 лет, то его побьет, то он побьет. Хан же ездит на людех, а слонов у него и коней добрых много, а людей у него хоразанцев много: а привозят их из Хорозанские земли, а иные из Орабанские земли, а иные ис Тукмерские земли, а иные ис Чеготанские земли, а привозят все морем в тавах, Индейские земли корабли.

Аз же грешный привез жеребца в Ындейскую землю, дошел «есми до Чюнера, а стал ми жеребец 100 рублев. /л. 303 об./ Зима же у них стала с Троицына дни; а зимовали есмя в Чюнейре и жили 2 месяца. А вино чинят в великих оресех. Кони же у них во Индейской земле не родятся, токмо волы да буйволы, на тех ездят и товары возят.

Чюнер же град есть на острову на каменом,[334] не делан[335] ничим, богом сотворен; а ходят на гору день по единому человеку, дорога тесна, поити нелзя. Во Индииской земли гости ся ставят по подворьем, а ести варят на гости господарыни, и постелю стелют, и спят з гостьми, любят бо белых людей.

В том же граде Чюнере хан взял у меня жеребца, понеже бо сведал, что яз русин, и он мне говорил: «И жеребца дам да 1000 золотых к тому дам, аще станеши в нашу веру бесерменскую; аще ли ни, и жеребца у тебя возму да 1000 золотых на главе твоей возму». А срок учинил на 4 дни. И в день /л. 304/ празника Преображения спасова господь бог смиловался надо мною, на свой праздник не отстави милости своея от мене грешного, не дал мне в Чюнере граде с нечестивыми погибнути. Хозяйочи Махметь хоросанец отпечаловал меня у хана, и в веру свою не поневолили, и жеребца отдал моево мне. Таково на мне содеяся спасово чюдо. Господня моя и братия, рустии християня, аще хто похочет поити в Ындейскую землю, и ты остави веру свою на Руси, да вскликни Бахмета да попди в Густанскую землю.

Мене залгали псы бесермена, а сказывали всево много нашего тавару: ажно нет ничево на нашу землю, токмо перец да краска, то и[336] дешево, бесермени возят морем, и они пошлин не дают, а нам пошлины великии, и разбойников много, кафары бо разбивают, а верою /л. 304 об./ они погани, молятся каменым болваном и Христа не знают.

А ис Чюнеря есмы вышли на Успениев день к Бодерю, к болшему их граду, а шли месяц. А оттоле до Кулонкеря 5 днии, оттуду же до Келбергу 5 диии. Да и промежу тех градов много и иных градов, на всяк день шли по три и по четыре грады; сколко ковов, столко и градов. От Чювиля бо и[337] до Чюнеиря 20 ковов, а оттоле до Бедеря 40 ковов, оттоле же до Колунгеря 9 ковов, паки от Бедеря до Колобергу 9 ковов.

В Бедери же торг на кони, и на шолк, да на овощ; а на Рускую землю товару никаково нет; да в нем же купити люди черные, все бо там черны, а все злодеи и тати и лживци, а жонки тоже[338] все бляди, да ведь, да тать, и государей своих зельи морят.