Хожение за три моря Афанасия Никитина 1466-1472 гг.

Во Индейской же земли княжата и бояре все /л. 305/ хоросанцы; а гундостанцы все пеши ходят, и наги и боси, токмо в руке щит, а в другой мечь, а ходят борзо, а у иных луки прямые и стрелы. А бой их все слоны, а около слонов идут пеши напреди на конех, а кони и сами в доспесех; а к слоном вяжут к рылу да к зубом великие мечи по кендарю кованы, да облачат ихь в доспехь булатный, да на них учинены городки, а в городке по 12 человек в доспесех, да пушки и стрелы.

Да тамо же есть у них место шихбь алудин пир атыр бозар алядинанд, на год един бозар, съезжается вся страна индейская торговати, да торгуют 10 днии. А от Бедеря 12 ковов, приводят коней до 20 000 и всякии товар; в Гондустанстей земли тои торг лучшии, на память шиха Аладина, а на рускии празник Покров святые богородицы. В том /л. 305 об./ Алянде есть птица, именуема гукук, летает ночи, а кличет гукук; и на коей хоромине посидит, и тут человек умрет; а кто ее хощет убити, ино у нее изо рта огнь выидет. А мамоны тамо ходят ночи и ловят куры, а живут в горе или в каменье. А обезьяны живут по лесу, и есть у них князь обезьянскии; и кто их заимает, и они жалуются князю своему, он же посылает на того рать свою; и они пришедше на град, и дворы розваляют, и людей побьют; а рати их, сказывают, велми много, и язык ихь есть свой, а детей родят много: и который родится ни[339] в отца ни в матерь, и они тех мечют по дорогам, и гондустанцы[340] техь емлют да учат их всякому рукоделию, а иных продают ночью, чтоб взад не знали бежати.

Весна же у них стала с Покрова святей богородицы; а по Покрове две недели празнуют шиху Аладину /л. 306/ 8 днии; а весну, и лето, и осень, и зиму держат тоже по три месяца.

В Бедери же ихь стол Гондустану бесерменскому; а град велик и людей много велми. А салтан великии 20 лет, а то содержат бояре. И с салтаном рати его выходит 300 000, а з бояры его выходит: с Меликтучаром 200 000, а с Меликханом 100 000, а с ыными со многими по 20 000 и по 10 000; и земля велми людна; а бояре силны и пышны[341]. А носят их на кроватех сребреных, а кони пред ними водят в снастех золотых. А селские люди голы добре. А выезд их добре чюден на потеху: егда султан выезжает с матерью и з женою, ино с ним конных 10 000, да пеших 50 000 человек, а слонов водят нарядных 200 в доспесех[342] золоченых, да 100 человек трубников, да плясцев 100 человек, да простых коней 300 в снастех золотых, да обезьян 100, да блядей 100, а все гаурки. /л. 306 об./

Во двор же султанов седмеры ворота, а в воротех по 100 человек сторожей, да по 100 писцев кафаров: кто взыдет и изыдет, и они записывают, а гарипов не пускают; а двор зело чюден, все на рези и золотом описано.

А стрегут град Бедер в нощи 1000 человек кутоваловых, а ездят в доспесех на конех, а у всех по светычю. И ту аз в Бедери продал жеребца своего, и наложил много, а кормил год. В Бедери же змии ходят по улицам, длиною в две сажени. А пришел есми в Бедер о Филипове заговейне ис Колунгеря, а жеребца продал о рожестве, а был тут до великого заговейна. И познахся тут со многими индеяны, и познали мя, что яз не бесерменин, но християнин, имя мне Афонасей, а по-бесерменски имя мне хозя Ифус Хоросани; и они не почали ни в чем скрыватися, ни жен своих не хо/л. 307/ронили[343], и я их испытал о вере их, и они сказывают, что веруют в Адама, а Бута, сказывают, то есть Адам. А всех вер в Индеи 84 веры, а все веруют в Бута; а вера с верою ни пьет, ни ест, ни женятся межи себе, а ядят бораны, куры, яйца, а волов все веры их не ядят.

И[344] от Бедери поидох к Первоти, то их Иеросалим, а по-бесерменски Мяхкат, где[345] их бутханы, и шел месяц. Бутхана же велми велик, камен, с пол-Твери, и резано на стенах деяние Бутово, как Бут чюдеса творил и как ся им являл многими образы человеческими; а ино человек, а нос слонов; а ино человек, а лице обезьянино; ино же подобие человек, образ[346] лютого зверя, а являлся им всем[347] с хвостом; а хвост через него с сажень, резаны на камени. И в той град съезжается вся страна Индейская на чюдо Бутово; да у бутханы бреются старые /л. 307 об./ жонки и девки на себе волосы и бороды, да потом идут к бутхану; да со всякие головы емлют по две шекшени пошлин на Бута, а с коней по 4 футы, а съезжается к бутхану всех людей бесчисленно множество. Да туто же в бухане вырезан Бут из камени, велми велик, хвост через него, да руку правую поднял высоко, а в левой руке копие, гол, толко гузно ширинкою обязано, а видение лица его обезьянино; а иные Буты наги, нет ничево, кот ачюк; а жонки Бутовы наги вырезаны и с соромом и з детми. Да перет Бутом же стоит вол велми велик, вырезан ис камени ис черного и позолочен весь, а целуют его в копыто, а сыплют на него цветы, а на Бута тоже цветы[348].