Хожение за три моря Афанасия Никитина 1466-1472 гг.

Божиею милостию приидох до третьего моря Чермного[298], а парсийским языком дория Стимбольскаа[299]. Идох же по морю ветром 10 дни, доидох до Вонады; и ту нас сретили великый ветр[300] полунощный, възврати[301] нас к Трапизону[302]; и стояли есмя в Платане 15 дний, ветру велику и[303] злу бывшу[304]. Ис Платаны есмя пошли на море, ветр нас стречает злый, не даст нам по морю ходити; олло акь олло худо перводигерь, развие бо того иного бога не знаю[305]. И море же пройдох сыск[306] Баликаее, а оттудова Токорзову, и ту стояли есмя 5 дни.

Божиею милостию приидох к Кафу за 9 дни до Филипова зоговениа, олло перводигер. Милостию божиею преидох же три моря; дигерь худо доно, олло перво/л. 458 об./дигерь дано, аминь; милна рахмам рагим, олло акьбирь, акши худо илелло акшь ходо, иса рухоало ааликъсолом; олло акьбер аилягаиля илелло, олло перводигерь ахамду лилло шукур худо афатад; бисмилна гирахмам ррагим: хувомогулези ляиляса[307] ильлягуя алимуль гяиби вашагадити; хуярахману рагиму хубомогулязи ля иляга имину альазизу алчебару альмутакан биру алхалику альбариюу альмумусавирю алькафару алькалъхару[308] аньвазаху[309] альрязаку альфатагу[310] альалиму алькабизу альбасуту альхафизу алльрравию[311] алмавизу алмузилю альсемилю альбасирю альакаму альадюлю алятуфу.

СПИСОК УНДОЛЬСКОГО XVII В.

/л. 300/ Вта же лета[312] некто именем Офонасей Микитин[313] сын Тверитин ходил с послы от великого князя Московского Ивана и от великого князя Михаила Борисовича Тверского и от владыки Тверского Генадия за море, и той тверитин Афонасей писал путь хожения своего сице.

Се списах грешное свое схожение[314] за три моря: первое море Дербенское, дория Хвалитская, второе море Индейское, /л. 300 об./[315] дория Гондустанская[316], третие море Чермное, дория Стемболская.

Поидох[317] от святого Спаса златоверхого сь его милостью, от великого князя Михаила Борисовича и от владыки Генадия Тверских[318]; поидох на низ Волгою и приидох[319] в монастырь к святей и[320] живоначалней Троицы и святым мучеником Борису и Глебу, и у игумена ся благословив у Макария и у братьи; и с Колязина же поидох на Углечь, с Углеча на Кострому ко князю Александру, с ыною грамотою, и князь великии всея Росии отпустил мя доброволно. И на Плесо, и в Новгород Нижнии к Михаилу Киселеву к наместнику, и к пошлиннику Ивану Сараеву, и они пропустили доброволно.

А Василей Папин проехал в город; а яз ждал в Новегороде две недели посла татарского Ширвашина Асамбега, а ехал с кречеты от великого князя Ивана, а кречатов у него 90. И поехали на низ Волгою, и Казань, и Орду, и Услан, и Сарай, и Берекезаны проехали есмя доброволно.

И въехали есмя в Бузань реку. И дали вожем подарки, чтоб провезли мимо Асто/л. 301/рохань, и те вожи провожаючи и весть дали царю в Асторохань. И царь послал за нами[321] всю свою орду, и постигли на Бугуне, и пограбя отпустили голыми головами, а вверх для вести нас не пропустили.

И пошли есмя к Дербентии двема суды; в одном судне посол Асамбег, да тезики, да русаков нас 10 человек, а в другом судне 6 москвич да 6 тверич. И востала фурстовина на море, да судно меншее розбило о берег, и пришли каитаки, да людей поимали всех.

И пришли есмя в Дербент, и ту Василей поздорову пришел, а мы пограблены. И Осанбег, ширвашинов посол, печаловался, и ездил на гору к Булатбегу, и Булатбег послал скоро к ширваншебегу[322]: что судно руское розбило под Тархи; каитаки пришед людей поимали, а товар их розграбили. И ширваишабег послал к шурину своему Алилбегу, каитаческому князю, глаголя: что судно ся мое розбило под Тархи[323], и твои люди пришед /л. 301 об./ людей поимали, а товар их пограбили; и тебе бы их ко мне прислати мене ради, понеже те люди посланы на мое имя. И Алилбег тотчас отослал людей всех в Дербент, а из Дербенту послали их к ширванши во орду его коитуль.

И мы, приехав к ширванше в коитуль, били челом, чтоб дал чем до Руси доити. И он нам не дал ничего, потому что нас много. И мы, заплакав, разошлися кои куды: у кого что есть на Руси, и тот пошел на Русь, а кой должен, и те пошли куды очи несут; а иные пошли работать к Баке.

А яз пошел к Дербента, а оттоле к Баке, где огнь горит неугасимый. А из Баки пошел есми за море к Чебокару, и тут есми жил в Чебокаре 7 месяц. Да в Саре жил месяц в Маздранской земли; а оттуду к Амили, и тут жил месяц; а потом к Димованту; а оттуду ко Рею, а ту убили Шаусеня Алеевых детей и внучат Махметевых, и он де их проклял, и за то де будто /л. 302/ 70 градов ся розвалило, якоже безвернии бают в прелести своей. А из Дрея к Кашени, и тут есми был месяц, а оттуду к Наину[324], и потом ко Езде, и тут жил есми месяц; а из Диес к Сырчану, а оттуду к Тарому, туто же фуники кормят животину, батман по 4 алтына. А из[325] Торома к Лару, а оттуда к Бендерю[326].