Хожение за три моря Афанасия Никитина 1466-1472 гг.

Не ядят же индеяня ни мяса, ни рыбы; а ядят днем дважды: брынец, да кучири[349] с маслом, да травы /л. 308/ розные; и ножа не держат, и лжицы не знают. А з бесермены ни пьют, ни ядят; а в дороге у всякова по горнцу, и всяк себе кашу сварит, и ядят - покрываются платом, чтоб его никто не видел, а посмотрит бесермен на еству, и он не яст; а как ести, и они преж омывают руки и ноги, и рот полощут.

А поклоны их на восток, руки подымают высоко, да изляжет ниц на землю, и протягнется весь по земли. А бутханы их без дверей, ставлены на восток же, а буты стоят на восток же. А кто у них умрет, и они тех жгут да пепел сыплют на воду. А у жены дитя родится, ино бабит муж, а имя сыну дает отец, а дочери мати; а[350] добрых трав[351] у них нет, и сорома не знают. А иные кланяются по-чернечески, обе руки дотычют до земли, а не говорит[352] ничево.

К Первоте же ездят о великом заговейне, к своему Буту[353], по-бе/л. 308 об./серменски Мякка, а по-руски Иерусалим, а по-индейскии Парват; а съезжаются все наги, мужи и жонки, толико на гузне плат или фата, а на шеях у жонок жемчюг и яхонтов много, а на руках обручи да перстни златы. А внутрь к бутхану ездят на волех а у вола рога окованы медью, да на шее колоколцов 300, и копыта подкованы; а те волы ачьче зовут. Индеяне же вола зовут отцем, а корову матерью; а калом их пекут хлебы и варят еству, и тем попелом[354] мажут по челу, и по всему лицу, и по телу. А в неделю и в понеделник ядят единожды днем.

От Первати же приехал яз в Бедер, за 15[355] днии до бесерменского улубагря. А Великого дни воскресеиия Христова не ведаю, а по приметам гадаю: Велик день християнскии бывает первее бесерменского багрима за 9 днии или за 10, потому что /л. 309/ кои были книги со мною взяты с Русии, и то и[356] пограблено, и яз позабыл веру християнскую и празников никоторых не помню. А промежу есми поганых розных вер токмо молился есмь богу вседержителю, творцу небу[357] и земли, и[358] иного никоего не призывал. А как месяц март прошел, и я заговел в неделю з бесермены, и ел по дважды днем хлеб да воду, а скорому не ел.

А от Гурмыза итти морем до Голат 10 ден[359], а оттуду до Дегу 6 ден; а от Дегу до Мошката, до Кучзрята, до Комбата 4 дни, а от Комбата до Чивиля 12 дней; а оттуду до Дабыля[360] 6 днии, Дабыль же есть пристанище в Гондустании[361] последнее бесерменству. А от Дабыля до Колекота 25 днии, оттоле же до Силяна 15 днии, а оттуду до Шибаита[362] месяц итти, оттоле же до Певгу[363] 20 днии; а оттоле до Чини да до Мачина месяц итти морем, /л. 309 об./ а от Чини до Китая итти сухом 6 месяц, а морем 4 итти, аростохода чотом.

Гурмыз же есть пристанище великое, всего света люди в нем бывают, и всякии товар в нем есть; что на всем свете родится, то в Гурмызе есть все; тамга же велика, со всего десятое. А Камблят пристанище Индейскому морю всему, а товар в немь делают алачи, да пестреди, да канъдаки, да чинят краску нил, да родится в нем лек, да ахик, да лон. Было есть пристанище велми велико, и привозят из Мисюрска кони, из Рабаста, и из Хоросани, и из Туркусани, из Негостани; да ходят сухом месяц до Бедери да до Келбергу.

Келекот[364] есть пристанище Индейского моря всего, а проити его не да бог никакову кестяку, кто его ни увидит, тот здорова не проидет морем; а родится в нем всякого пряного зелия много, и дешево. /л. 310/

Силян[365] же есть пристанище Индейского моря немало, а в нем баба Адам на горе высоце; а около его родится каменье драгое, да червцы, да фатисы, да бабогури, да бинчаи, да хрусталь, да сумбада; а продают в локоть, а довякуши продают в вес; да родятся слоны.

Шаибатское[366] пристанище Индейского моря велми велико, а хоросанцем дают алафу по тенке на день, и великому и малому; а кто в нем хоросанец женитца, и князь шаибатцкии дает по 1000 тенек на жертву, на алафу, да есть на всякии месяц по 10 тенек; а родится в Шанбате[367] шелк да сандал, жемчюг, и все дешево.

В[368] Негу же есть пристанище немало, а живут в нем все дербыши индейские; да родится в нем камение драгое маник, яхут, кирпук, а продают камение не дербыши. Чинское[369] же да Мачинское пристанище /л. 310 об./ велми велико, да делают в нем чини; а продают чини в весь, а дешево.

А жены их с мужьями своими спят в день, а к ночи их ходят к гарипом да спят с ними, и дают гарипом[370] алафу, и приносят с собою яству сахарную и вино, да поят их и кормят, чтоб ее любили, а любят людей белых, понеже ихь люди черны велми; и которое от гостя зачнется бело, и муж дает гостю алафу, пошлин 18 тенек; а родится черно, ино нет ничево, токмо пил да ел, то ему халял.

А от Бедеря Шанбат[371] итти 3 месяца; а от Дабыля до Шаибата 2 месяца морем итти; Мачим да Чим от Бедеря 4 месяца морем итти. Да[372] в Шаибате же родится шелк, да инчи, да жемчюг, да сандал; слоны продают в лекоть[373].