Хожение за три моря Афанасия Никитина 1466-1472 гг.

Во Индейской земли княжать все хоросанци, и бояре все хоросанци{95}; а гу/л. 375/ндустанци все пешиходы[20], а ходят борзо, а все нагыда босы, да щит в руце, а в другой мечь, а иные слугы с великими с прямимы лукы да стрелами. А бой их все слоны, да пеших пускают наперед, хоросанци на конехь да в доспесех, и кони и сами; а к слоном вяжуть к рылу{96} да к зубом великие мечи по кендарю кованы, да оболочат их в доспех булатный, да на них учинены городъкы, да и в горотъке по 12 человек в доспесех, да все с пушками{97} да стрелами.

Есть у них одно место, шихб Алудин пир{98} атыр бозар алядинанд{99}, на год един бозар, съеждается вся страна Индейская торговати, да торгуют 10 дний; от Бедеря 12 ковов, приводят коней до 20 тысящь продают, всякый товар свозят; во Гондустаньской земли той торг лучший, всякый товар продают, купят, /л. 375 об./ на память шиха Аладина, на руськый праздник на Покров святые богородица. Есть в том Алянде и птица гукук{100}, летает ночи, а кличет «гукук». А на которой хоромине седить, то тут человек умреть; а къто ее хочет убити, ино у нее изо рта огнь выйдет. А мамонь{101} ходят ночи да имають куры, а живуть в горе или в каменье. А обезьяны то те живуть по лесу, да у них есть князь обезьяньскый, да ходить ратию своею{102}, да кто их заимаеть, и они ся жалують князю своему, и он посылает на того свою рать, и они, пришед на град, и дворы разволяють и людей побьют. А рати их, сказывають, велми много, и языкы их есть свои, а детей родять много; да которой родится не в отца, не в матерь, ини тех мечють по дорогам; ины гондустанци тех имают да учать их всякому рукоделью, а иных прод/л. 376/ають ночи, чтоб взад не знали побежати, а иных учат базы миканет{103}.

Весна же у них стала с Покрова святые богородица{104}; а празднують шиху Аладину{105} и весне две недели по Покрове, а празднуют 8 дни; а весну держать 3 месяца, а лето 3 месяца, а зиму 3 месяца, а осень 3 месяца. В Бедери же их стол Гундустану бесерменьскому{106}. А град есть велик, а людей много велмии; а салтан велик[21] 20 лет{107}, а держать бояре, а княжат[22] фарасанци{108}, а воюють[23] все хоросанци.

Есть хоросанець Меликтучар[24] боярин{109}, ино у него рати[25] двесте тысячь, а у Мелик-хана 100 тысячь, а у Харат-хана{110} 20 тысячь; а много тех ханов по 10 тысячь рати. А с салтаном выходят 300 тысяч рати своей. А земля людна велми, а сельскые люди голы велми, а бояре силны добре и пышны велми{111}; а все их носять на кровати своеих на сребряных, да пред ними[26] водят кони в снастех /л. 376 об./ золотых до 20; а на конех за ними[27] 300 человек, а пеших 500 человек, да трубников 10, да нагарников{112} 10 человек, да свирелников 10 человек. Султан же выещаеть на потеху с матерью да с женою, ино с ним человеков на конех 10 тысящь, а пеших 50 тысящь, а слонов водят 200 наряженых в доспесех золочоных{113}, да пред ним 100 человек трубников, да плясцев 100 человек, да коней простых 300 в снастех золотых, да обезьян за ним 100, да блядей 100, а все гаурыкы{114}.

В султанов же двор 7-ры ворота, а в воротех седят по 100 сторожев да по 100 писцев кофаров; кто поидеть, ини записывають, а кто выйдет, ини записывають; а гарипов{115} не пускають в град. А двор же его чюден велми, все на вырезе да на золоте, и последний камень вырезан да золотом описан велми чюдно; да во дворе у него /л. 377/ суды розные.

Город же Бедерь стерегут в нощи тысяча человек кутоваловых{116}, а ездять на конех да в доспесех, да у всех по светычю. А яз жорепца своего продал в Бедери, да наложил есми у него[28] 60 да и 8 футунов{117}, а кормил есми его год. В Бедери же змии ходят по улицам, а длина ее две сажени. Приидох же в Бедерь о заговейне о Филипове{118} ис Кулонгеря и продах жеребца своего о Рожестве, и тут бых до великого заговейна в Бедери и познася со многыми индеяны и сказах им веру свою, что есми не бесерменин исаядениени{119} есмь християнин, а имя ми Офонасей, а бесерменьское имя хозя Исуф Хоросани{120}. И они же не учали ся от меня крыти ни о чем, ни о естве, ни о торговле, ни о маназу{121}, ни о иных вещех, ни жон своих не учали крыти.

Да о вере же о их распытах все, и оны сказывают: веруем в Адама{122}, /л. 377 об./ а Буты, кажуть, то есть Адам и род его весь.[29] А вер[30] в Индеи всех 80 и 4 веры{123}[31], а все веруют в Бута{124}; а вера с верою ни[32] пиеть, ни ясть, ни женится[33], а иные же боранину, да[34] куры, да[35] рыбу, да[36] яйца ядять, а воловины не ядять[37] никакаа вера.[38]