Книга для чтения на Лидепла

- Me bu opini, - jawabi Pilat, - ke yu’d joisi legion-shefa si yu'd shwo-shwo kun ta-ney ofser o soldata. Enikas, to bu sal eventi, pa sarwe fortuna, e me hi ve kuydi om se.

Al sey momenta un yanza fliti-flai inu kolonada, fai un ronda sub golde tavan, hampi tachi bay agude ala den fas de bronse statua in nisha e desapari baken kapitel de kolona. Mogbi ta yao fai nesta dar.

Duran ta-ney flaisa in prokurator-ney kapa, kel nau es klare e leve, en-ye formula. It es tal: hegemon he examini dela de vagabondi-she filosofier Yeshua kromenamen Ha-Nozri e bu he findi reson fo akusa. Partikularem, ta bu he findi ni tanike konekta inter Yeshua-ney aktas e nodave disturba in Yerushalaim. Vagabondi-she filosofier fa-reveli mentalem morbe.

Por se prokurator bu konfirmi den morta-kondamna ke Syao Sanhedrin he fai an Ha-Nozri. Bat kaulu-yen to ke Ha-Nozri-ney pagale utopike shwosa mog kausi disturba in Yerushalaim, prokurator udali Yeshua fon Yerushalaim e limitisi ta in Kesaria Straton-ney pa Mediteran mar, to es yus dar wo residilok de prokurator es.

Resti sol dikti se a sekretar.

Yanza-ney alas ek-susu rek sobre kapa de hegemon, faula fliti versu fontan-ney kopa e flai aus. Prokurator uuparisi okos an plenjen e vidi ke bli ta brilifi un polva-stolba.

- Ob es olo om ta? – Pilat kwesti sekretar.

- Non, pa afsos, - noexpektem jawabi sekretar e handi a Pilat yoshi un pes de pergamen.

- Kwo yoshi? – kwesti Pilat e fruni.

Al he lekti lo handen, ta fa-shanji gro pa fas. Ob tume hema aflui a galsa e fas oda koysa otre eventi, bat suy derma dehwanifi, burifi, e suy okos semblem sinki.

Shayad toshi por hema kel aflui a visokes e en-tuki in li, koysa eventi om prokurator-ney viding. Fa-imajini a ta ke kapa de plenjen floti wek, e inlpas it otre-la apari. On sey kalve kapa ye golde krona do shao denta. Den derma de frenta glodi ronde ulsa, smiren bay marham. Sinki-ney sindenta-ney muh kun pendi-she kaprise niche laba.

Sembli a Pilat ke i rose kolonas de balkon i rufes de Yerushalaim dalem nichen traen garden desapari, inplasen bay gro-dense grintaa de Kapri-ney gardenes. E koysa ajibe eventi i om ta-ney auding: kwasi koylok dalem trumpetas baji bulautem e saktem, e ga klarem fa-audi koy nos-ney vos kel gamandem stiri worda: “Kanun om insulting de mahantaa”...

En-flai-lopi dumas – kurte, nohaohunten, nopinchan: “Me tabahi!”, poy “Nu tabahi!..” E inter li ye koy ga absurde duma om koy sinmortitaa (hu-ney?!) kel zaruu mus bi, e por koy kausa sinmortitaa eksiti gro-duha.

Pilat fa-tensi, mah vidiwat wek, suy kansa returni a balkon, e snova plenjen-ney okos es bifoo ta.

- Audi ba, Ha-Nozri, - prokurator shwo al kan Yeshua koykomo stranem: prokurator-ney fas es sakte bat okos alarmen, - ob yu gwo shwo koysa om mahan kesar? Jawabi! Ob yu gwo shwo?.. Oda... bu... gwo shwo? – Pilat stiri worda “bu” koykomo pyu kem gai pa hakma, e in swa-ney kansa ta sendi a Yeshua den koy duma ke ta yao sugesti-si a plenjen.

- Tu shwo veritaa es fasile e priate, - remarki plenjen.

- Me bu treba jan, - Pilat jawabi bay tufi-ney dushte vos, - ob es priate o nopriate fo yu tu shwo veritaa. Yu ve majbur shwo it. Bat shwo-yen kaulu ba kada worda, si yu bu yao morta i noevitibile i tormenta-ney.

Nulwan jan kwo he eventi a prokurator de Iudeya, bat ta lasi swa lifti handa, kwasi fa-shirmi-yen fon surya-ray, e fon baken sey handa, kom fon baken shilda, ta sendi a plenjen koy kansa kun ansha.

- Also jawabi, - ta shwo, - ob yu koni sertene Yahuda fon Kiriot, e kwo hi yu shwo-te a ta om kesar, si yu shwo-te?

- Eventi tak, - yao-shem en-rakonti plenjen, - preyeri pa aksham me fai en-kona kun un yunge man kel nami swa Yahuda fon urba Kiriot. Ta inviti me a she swa pa Niche Urba e ugosti…

- Hao jen? – Pilat kwesti, e diabla-ney brila ek-ye in suy okos.

- Muy hao e jigyas-ney jen, - konfirmi plenjen, - ta diki gro-interes om may ideas, resivi me ga kordialem...

- Lumisi lampas... – Pilat shwo tra denta, pa same ton kom plenjen, e suy okos glimi.

- Ya, - al idyen surprisi por ke prokurator jan se, Yeshua kontinu: - ta pregi me tu shwo may opina om stata-ney mahta. Sey kwesta interesi ta gro.

- Also kwo yu shwo? – Pilat kwesti, - oda yu sal jawabi ke yu bu remembi? – bat in vos de Pilat ye yo sinnaditaa.

- Miden otre kosa me shwo, - rakonti plenjen, - ke eni mahta es violensa sobre jenta e ke taim ve lai wen bu ye ni mahta de kesares ni koy otre mahta. Jen ve zin regilanda de veritaa e justitaa, wo nul mahta treba.

- Shwo for!

- Me bu shwo-te for, bikos jenta lopi-zin, ligi me e dukti a prison.

Sekretar, al trai fai nul suon, zai skribi on pergamen kway.

- In munda bu gwo ye, bu zai ye e bu ve ye mahta pyu mahan e pyu hao fo jenta kem mahta de imperator Tiberius! – kreki-ney e morbe vos de Pilat fa-laute.

Por koy kausa prokurator kan heni-shem an sekretar e eskorta.

- E bu es yur dela, pagale krimennik, tu resoni om it! – Nau Pilat krai: - Mah eskorta wek fon balkon! – e al turni versu sekretar adi: - Lyu me sole kun krimenjen, es stata-ney dela.