Книга для чтения на Лидепла

Duran to plenjen kontinu shwosa, bat sekretar yo bu skribi, ta sol trai fai nul suon al he extendi galsa kom gansa.

- Walaa, olo he fini, - aresten jen shwo al kan Pilat karimem, - e me gro-joi por to. Me’d konsili a yu, hegemon, tu kwiti palas fo koy taim e promeni koylok in sirkumlok, vaika in gardenes pa Oliva-ney monta. Garja ve begin, - ta turni e kan surya al tangisi okos, - pyu tardem, versu aksham.

Promena wud bi muy hao fo yu, e me wud akompani yu kun joisa. A may kapa he lai da kelke nove duma kel wud mog interesi yu, shayad, e me wud yao-shem parti li kun yu, tem pyu ke yu sembli muy intele jen.

Sekretar fa mortem pale e lasi lwo rolika on poda.

- Beda es, - kontinu ligen jen, bu stopen bay nulwan, - ke yu es tro klosen fon jenta e yu he fin-nem lusi fida a jenta. Oni bu mog ya, konsenti ba, plasi ol swa-ney lyansa inu doga. Yur jiva es magre, hegemon, - e nau shwo-sha lasi swa smaili.

Sekretar nau zai dumi sol om un hi kosa: ob kredi swa-ney aures o bu kredi. Ta majbur kredi. Dan ta trai imajini komo hi furia de irishil prokurator ve manifesti al sey bu-gwo-audi-ke naglitaa de plenjen. E den to sekretar bu pai imajini, obwol ta ya jan prokurator hao.

Dan suoni kreki-ney, raukish vos de prokurator kel shwo pa latina:

- Deligi ta-ney handas.

Un de eskorta-ney legionyuan ek-tuki bay lanza, handi it a otre-la, lai a plenjen e mah-wek korda fon ta. Sekretar pren-lifti rolika, desidi bu skribi koysa al nau e bu surprisi por nixa.

- Konfesi ba, - Pilat kwesti kyetem pa elin, - yu es mahan leker?

- Non, prokurator, me bu es leker, - plenjen jawabi, kun juisa froti-yen den myaten e puhlifen tumrude handa.

Al fruni e inklini kapa Pilat bori plenjen bay okos, e sey okos bu es pyu tumanisen, li brili pa pinchan dao.

- Me bu he kwesti yu, - Pilat shwo, - mogbi yu jan i latina lingwa?

- Ya, me jan, - plenjen jawabi.

Kolor lai a hwanish wangas de Pilat, e ta kwesti pa latina:

- Komo yu en-jan-te ke me yao-te voki doga?

- Es muy simple, - plenjen jawabi pa latina, - yu zai muvi-te handa pa aira, - plenjen repeti Pilat-ney jesta, - kwasi yu yao gladi-gladi, e labas...

- Ya, - shwo Pilat.

Ye silensa. Poy Pilat kwesti pa elin:

- Also yu es leker?

- Non, non, - plenjen jawabi animem, - kredi me, me bu es leker.

- Wel, hao. Si yu yao kipi se kom sekret, kipi ba. Se bu gwansi dela direktem. Also yu aserti ke yu bu agiti-te destrukti... o agnisi, o bay koy otre dao nihilisi mandir?

- Me, hegemon, bu agiti-te nulwan fo tal akta, me repeti. Ob me simili pagala?

- Oo ya, yu bu simili pagala, - prokurator jawabi kyetem e fai koy fobisi-she smaila. – Dan kasami ba ke to bu eventi-te.

- Pa kwo yu yao ke me kasami? – deligen jen kwesti, ga animi-ney.

- Wel, vaika pa jiva yu-ney, - prokurator jawabi. – Es yus taim fo kasami pa it, bikos it zai pendi pa harinka, jan ba!

- Ob yu dumi ke yu hi he pendisi it, hegemon? – plenjen kwesti. – Si ya, yu galti gro.

Pilat ek-tremi e shwo tra denta:

- Me mog kati sey harinka.

- Om se toshi yu galti, - plenjen objeti kun karim smaila, al shirmi swa fon surya bay handa. – Konsenti ba, tu kati harinka mog sol wan kel he pendisi it.

- Wel, hao, - Pilat shwo al smaili, - nau me bu dubi ke menga de bumange okovatnik in Yerushalaim gwo sekwi yu stay, pendi-si on yu. Apropoo, shwo ba, ob yu zin-te Yerushalaim tra Shush-geit al raidi asla, akompanen bay menga de povre jenta kel krai-saluti yu kom koy profeta? – e prokurator indiki pergamen-ney rolika.

Plenjen kan prokurator perplexem.

- Me bu hev nul asla, hegemon, - ta shwo. – Es ver ke me zin-te Yerushalaim tra Shush-geit, bat al pedi e pa akompana de sole Levi Matfei, e nulwan krai-saluti me bikos nulwan in Yerushalaim jan me dan.

- Ob yu koni sekwe jen, - Pilat kontinu al kan plenjen fixem, - koywan do nam Dismas, otre do nam Gestas, e tri-ney do nam Bar-Rabban?

- Den sey hao jen me bu koni, - plenjen jawabi.

- Ver ku?

- Ver.

- E nau shwo ba a me, way yu oltaim yusi worda “hao jen”? Ob yu nami tak oli jen?

- Ya, oli jen, - plenjen jawabi. – Bade jen yok in munda.

- Pa un-ney ves me audi om to, - Pilat ek-smaili, - bat mogbi me shao jan jiva!.. Yu mog bu skribi lo for-ney, - ta adresi sekretar kel bu skribi yo depos longem, e shwo for a plenjen: - Ob yu he lekti om to in koy elin kitaba?

- Non, me selfa he samaji to.

- E yu prichi to?

- Ya.

- E pa exampla kenturion Mark, nami-ney Ratakiler, ob ta es hao?

- Ya, - plenjen jawabi, - obwol ta es nofelise jen. Depos ke hao jenta mutili ta, ta bikam kruele e karke. Wud bi interes-ney tu jan, hu hi deformi ta.

- Me mog yao-shem informi yu om to, - Pilat jawabi, - bikos me bin gavaher de to. Hao jenta fa-lansi an ta kom dogas an berna. Germanikeres klingi an ta-ney galsa, brachas, gambas. Un peditrupa-ney manipula geti inu sirkuma, e si un kavaleria-ney turma bu wud inuhaki fon flanka, me hi bi-yen suy komander, dan yu, filosofier, bu wud mog shwo kun Ratakiler. To bin pa batala in Idistaviso, in dol de Virgas.

- Si nu’d mog shwo-shwo kun mutu, - turan plenjen shwo drimi-shem, - dan, me es serte, ta wud shanji gro.