Книга для чтения на Лидепла

Pyu kem enisa in munda prokurator heni fauha de rosa-ney olea, e nau olo suli buhao dey, bikos sey fauha persekwi prokurator depos suryachu.

Sembli a prokurator ke rosa-ney fauha chu fon kiparis e palma in garden, ke fauha de eskorta-ney piga e sudor mixifi kun damnen rose strom.

Fon domkin pa baka de palas, wo disposi ti lai kun prokurator a Yerushalaim na Un-ney kohorta de Shi-dwa-ney Bliza-ney legion, idyen fum lai kun feng tra uupare terasa de garden, e sey karwish fum, gavahi-she ke kenturia-ney kukeres en-kuki deyfan, it toshi mixifi kun same dense rose fauha. Oo bohes, bohes, por kwo yu puni me?

“Ya, duba yok! Es it hi, es snova it, nojitibile, dahsat-ney morba hemikrania, wen haf de kapa tungi. Kontra it lekimedia yok, salva yok. Me sal probi bu muvi kapa”.

On mosaike poda bli fontan un brachastula es yo tayaren, e prokurator, sin kan an nulwan, en-sidi on it e extendi handa a taraf. Sekretar respektem inupon un pes de pergamen inu sey handa. Al bu he pai represi tunga-ney grimasa, prokurator oblikuem ek-tralekti lo skriben, returni pergamen a sekretar e shwo mushkilem:

- Hakmiwan es fon Galil? Ob oni gwo sendi dela a tetrarka?

- Ya, prokurator, - sekretar jawabi.

- E ta?

- Ta he refusi fai desida om dela e sendi Sanhedrin-ney morta-kondamna a yu fo konfirma, - expliki sekretar.

Prokurator ek-tiki wanga e shwo bulautem:

- Mah akusen ahir.

E tuy dwa legionyuan dukti un man do sirke dwashi-sem yar fon garden-terasa a balkon sub kolonas e mah ta stan bifoo brachastula de prokurator. Toy jen es klaiden in lao e tori-ney klarblu hiton.

Ta-ney kapa es kovren bay blan tuh kun tasma sirkum frenta, e ta-ney handas es ligen baken bey. Sub lefte oko ye un gran ushiba, pa angula de muh ye un wunda-ki kun krostifen hema. Adukten jen kan an prokurator kun alarmen jigyas.

Toy-la silensi idyen, poy kwesti kyetem pa aramaya lingwa:

- Also yu hi agiti-te jenta tu destrukti Yerushalaim-ney mandir?

Prokurator zai sidi kwasi ston-ney, e sol ta-ney labas idyen muvi al ke ta shwo. Prokurator es ston-ney-si bikos ta fobi ek-muvi swa-ney kapa flami-she pa inferne tunga.

Jen kun ligen handas muvi idyen avan e en-shwo:

- Hao jen, kredi me…

Bat prokurator, samem sinmuve e sin lautisi vos, tuy interrupti ta:

- Den me ku yu nami hao jen? Yu galti. Oli in Yerushalaim hamsi om me ke me es ferose monsta, e es ga ver. - E sam monotonem adi: - Den kenturion Ratakiler a me.

Sembli a oli ke fa-tume pa balkon wen kenturion to komander de osobe kenturia, Mark, kromenami-ney Ratakiler, apari bifoo prokurator.

Ratakiler es pa kapa pyu gao kem zuy gao soldata de legion e tanto chaurplecha-ney ke ta shirmi den haishi nise surya.

Prokurator adresi kenturion pa latina:

- Krimenjen nami me hao jen. Dukti ta aus fo minuta-ki, expliki ba a ta, komo gai shwo kun me. Bat bye mutili.

E oli, exepte sinmuve prokurator, oko-sekwi Mark Ratakiler kel ek-mavi handa a aresten, indiki-yen ke ta mus kungo.

Den Ratakiler oni sempre oko-sekwi, wo unkwe ta apari, por suy gaotaa. E toy jen kel vidi ta pa un-ney ves – yoshi por to ke fas de kenturion es deformen: koytaim suy nos bin krushen bay darba de germanike gro-stik.

Grave gaobutas de Mark tuki tra mosaika, ligen jen sekwi ta sinshum-nem, fule silensa en-ye in kolonada. Fa-audi kurkuring de palomas on garden-terasa bli balkon, e akwa gani jatile priate gana in fontan.

Prokurator yao en-stan, pon swa-ney visok sub akwa-strom e resti tak sin muva. Bat ta jan ke i se bu ve helpi ta.

Al he dukti aresten jen inu garden, Ratakiler pren swipa fon handas de legionyuan kel stan bli pedestal de bronse statua, ek-swingi it bufortem e darbi aresten pa plechas.

Kenturion-ney muva bin leve e sineforte, bat ligen jen tuy krushi-lwo on arda, kwasi al haken gambas. Ta misspiri gro, suy fas dekolori e okos fa sinsensu-ney.

Bay un hi lefte handa Mark lifti lwo-ney jen uupar sam fasilem kom den vakue sak, stavi ta on pedas e shwo nos-nem, pronunsi-yen aramaya worda buhao:

- Den Roma-ney prokurator gai nami hegemon. Den otre worda bu shwo. Stan kyetem. Yu samaji me o me darbi yu?

Aresten jen ek-hili bat domini swa, suy fas-kolor returni, ta rifai spira e jawabi raukem:

- Me samaji yu. Bye darbi me.

Afte un minuta ta snova stan bifoo prokurator.

Gluhe morbe vos suoni:

- Nam?

- Me-ney ku? – aresten shwo hastem, expresi-yen bay ol suy aspekta ke ta es tayar fo jawabi rasum-nem, bu irisi pyu.

Prokurator shwo bulautem:

- Den me-ney me jan. Bye semblisi bi pyu stupide kem yu es. Yu-ney.

- Yeshua, - plenjen jawabi kway.

- Kromenam ye ku?

- Ha-Nozri.

- Janmalok?

- Urba Gamala, - plenjen jawabi al indiki bay kapa ke koylok dalem, pa desna fon ta, pa norda ye urba Gamala.

- Hu es yu pa hema?

- Me bu jan exaktem, - aresten jawabi ajilem, - me bu remembi may mata-patra. Oni shwo-te ke may patra bin Siria-jen.

- Wo yu habiti stay?

- Me bu hev stay habita, - plenjen jawabi timidem, - me safari fon urba a urba.

- Den se oni mog expresi pyu brevem, pa un worda – vagabonder, - shwo prokurator e kwesti: - Rishtejenta ye ku?

- Yok. Me es sole in munda.

- Ob yu janmog lekti-skribi?

- Ya.