Книга для чтения на Лидепла

- Ob yu jan koy lingwa krome aramaya?

- Ya. Elin.

Un puhlifen palak idyen liftifi, oko tumanisen bay sufra fixifi on plenjen. Otre oko resti klosen.

Pilat shwo pa elin:

- Also yu hi yao-te destrukti mandir-ney bildura e voki-te jenta zwo to?

Nau plenjen animifi snova, suy okos stopi diki foba, e ta en-shwo pa elin:

- Me, hao... – e dashat ek-ye in suy okos, bikos ta hampi shwo galtem. – Me, hegemon, neva hi in jiva yao-te destrukti mandir-ney bildura e neva hi me voki-te koywan zwo sey sinsensu-ney akta.

Astona fa-diki on fas de sekretar, gorbi-ney sobre nise tabla e skribi-she gavaha. Ta lifti kapa, bat tuy snova inklini it a pergamen.

- Mucho diverse jenta jami-flui a sey urba fo festa. Miden li ye magier, astrologier, kisma-preshwoer e kiler, - prokurator zai shwo monotonem, - e koyves yoshi luger. Yu, pa exampla, es luger. Es skriben klarem: “agiti-te destrukti mandir.” Jenta gavahi tak hi.

- Sey hao jenta, - plenjen shwo, hastem adi “hegemon” e fai for: - li bu gwo lerni koysa e he konfusi olo ke me shwo-te. Me generalem begin fobi ke sey konfusa ve duri ga longtaim. E olo bikos ta skribi bupravem to ke me shwo.

En-ye silensa. Nau yo ambi morbe oko mushkilem zai kan plenjen.

- Me repeti a yu, bat pa laste ves: stopi simuli pagala, yu dusnik, - Pilat shwo mulem e monotonem. – Om to ke yu shwo es skriben bu mucho, bat sufi-she fo pendi yu.

- Non, non, hegemon, - aresten jen fa-tensi gro al yao konvinsi, - sekwi, sekwi me da jen kun bakra-pergamen, ta skribi koysa oltaim. Bat unves me fai kansa an sey pergamen e fa-dashati. Me bu gwo shwo verem nixa fon to ke es skriben dar. Me gro-pregi ta: pa boh, jal ba yur pergamen! Bat ta wektori it fon may handas e lopi wek.

- Hu es ta? – Pilat kwesti kun nafra e tachi swa-ney visok bay handa.

- Levi Matfei, - plenjen expliki yao-shem, - ta gwo bi naloga-jamer, e me miti ta pa un-ney ves pa kamina in Betfagia, dar wo figa-garden fai angula, e nu toki-toki. Pa beginsa ta trati me nopri-shem e iven insulti me, to es, ta dumi ke ta insulti me al nami me doga, - nau plenjen ek-smaili, - me selfa bu vidi koysa buhao in sey animal, also bu ofensi por sey worda...

Sekretar stopi skribi e ahfem fai surprisen kansa, bu an aresten bat an prokurator.

- ...Yedoh afte audi me ta mulifi, - Yeshua kontinu, - pa fin ta shwai mani on kamina e shwo ke ta ve go safari kun me...

Pilat ek-smaili bay un wanga al diki hwan denta e shwo al turni ol korpa versu sekretar:

- Oo urba Yerushalaim! Kwo oni bu audi in it. Naloga-jamer, yu audi ku, ta muka shwai mani on kamina!

Sekretar bu jan komo jawabi a se e desidi repeti Pilat-ney smaila.

- Ta shwo ke ta en-heni mani, - Yeshua expliki strane akta de Levi Matfei e adi: - E depos dan ta es may kompanion.

Al haishi dussmaili, prokurator kan an aresten jen, poy an surya kel stay uuparifi sobre kaval-ney statuas de hipodrom lagi-she dalem nichen desnen, e turan, al sta pa koy duhaful tormenta, dumi ke zuy simple kosa wud bi tu mah sey strane krimenjen wek fon balkon al pronunsi sol dwa worda: “Pendi ta”.

Tu mah-wek eskorta toshi, tu go fon kolonada inu palas, tu mah shamba tumisi-ney, tu lwo on kama, tu demandi lenge akwa, bay grive vos tu voki doga Banga, tu shakwi a ta om hemikrania. E duma om toxin temti-shem ek-ye in morbe kapa de prokurator.

Ta zai kan bay gadle okos an aresten jen e zai silensi al peni-trai remembi, way hi sey plenjen kun fas deformen bay bating zai stan bifoo ta al sinpite Yerushalaim-ney surya-shaisa, e kwel hi buniden kwesta yoshi treba kwesti ta.

- Levi Matfei? – raukem kwesti morbi-sha e klosi okos.

- Ya, Levi Matfei, - gao vos, tormenti-she ta, suoni.

- E kwo hi yu shwo-te om mandir a jenmenga pa basar?

Vos de jawabi-sha semblem piki Pilat-ney visok, es gro-tungaful, e sey vos shwo:

- Me shwo-te, hegemon, ke mandir de lao kreda ve ruini e nove mandir de veritaa ve fa-kreati. Me shwo-te tak dabe oni samaji pyu fasilem.

- E way yu, vagabonder, dusagiti jenta pa basar al rakonti om veritaa om kel yu bu hev nul idea? Kwo hi es veritaa?

E dan prokurator dumi: “Oo bohes may! Me kwesti ta om koysa nobyen al hakma... May menta bu pyu servi a me…” E snova kopa kun tume likwa fa-imajini a ta. “Den toxin, bringi toxin a me...”

E snova ta audi vos:

- Veritaa primem es ke yur kapa tungi, tungi tanto gro ke yu nokurajem dumi om morta. Yu apena mog shwo kun me, iven tu kan an me es mushkile fo yu. E me es yur sinvole tormenter lo kel tristisi me. Yu bu mog iven dumi om koysa, e yu drimi sol om ke yur doga lai, shayad sole jivika a kel yu lyan. Bat yur tormenta sun fini, tunga fa-wek.

Sekretar fai gro-okos an plenjen e bu finskribi worda.

Pilat uuparisi tormenten okos an plenjen e vidi ke surya es yo aika gao sobre hipodrom, ke un ray he penetri kolonada e zai kripi versu mucho-yusen sandalas de Yeshua, ke ta zai atarafi fon surya.

Nau prokurator en-stan fon brachastula, ek-presi kapa bay ambi handa, e suy hwanish razen fas expresi dashat. Bat ta tuy represi it bay swa-ney vola e snova sinki on brachastula.