Книга об Антихристе и о прочих действах иже при нем быти хотящих

Что же зде разумети достоит? О каких временах и седминах сие у пророка Даниила речено? Глаголет убо времене, и времену, и полвремене: и седмицы, и седмицу, и полседмицы. Велико ли есть время? И велика ли седмица? И что есть полвремене? И что полседмицы? Мы же, последующе святопросвещенных и богомудрых мужей толкованию, сице разумеваем: яко времена зде у пророка за явныя и определенныя лета полагаются, такожде и седмицы по седми лет вей равно числятся. Рече убо (царствовати антихристу токмо) до времене и времену, и полвремене, сиречь три лета с половиною. И паки рек: во время и во времена и в полвремене. И зде тоже три лета и шесть месяц показует: такожде и полседмицы те же полчетверта лета являют.

Или некто речет нам укоризненно, глаголя: о сих временах и седмицах, яже зде у Даниила пророка речены, никтоже может опасне и добре протолковати, разве аще кто имея, по апостолу, дух дарования и разум учения, Ветхаго же и Новаго писания в конец ведение. Вы же яко безблагодатни, темже и грубостию неведения содержими, всех сих непричастни: како можете о сих истинно разумети и толкование наводити, еже вам не возможно? Темже и толкование ваше о сих не приятно.

Отвещаем. И что убо, ныне ли настоит кая невозможность, еже бы имети кому дух благодатный? Аще ли же мы и не достойни есмы, якоже мнят, таковаго дарования, и не имеем философских и риторских учений происшествия, ниже божественнаго писания в конец ведения: но кто же таков ныне обрящется? Сего ради убо и нам или и прочим таковым, аще и не возможно добре и опасне протолковати пророческая предсказания, обаче готовому богопросвещенных святых отец толкованию возможно есть добре и не сумненне последовати, со всяцем известием и надеждою, еже не наше есть, но тех таковое сказание: темже и верно и всякаго приятия достойно, егоже и ведети нужно, емуже и последовати долженствует неотрочно: «Аще бо тех не вемы, ихже ведети не возможно, без вины будем: аще ли ко уведению удобных не вемы, последнюю казнь постраждем» (Апостол толковый, зач. 245, л. 830).

Посмотрим же и на оных разумение. Истинствует ли таковое тех мудрование, иже в вышереченных временах и седмицах мнят быти многая некая лета безвестная и числом необявленная, и всячески неопределенная.

Таковии считают сии седмицы от времене пророка Даниила до скончания мира, и полагают седмиц 69 до Христова воплощения: вси же сии 69 седмиц по седми лет разумеют, а седмьдесятую седмицу помышляют быти под некаким неопределенным временем, или неуставным лет числом, сиречь, акибы тая седмица идет от воплощения Христова и даже до Его втораго пришествия. А инии паки инако о сих седмицах мудрствуют, и изчисляют в них лета многообразным счетом: ов убо сице, ов же инако, един другаго предваряюще и аки сокровенную мудрость и тайну открывающе, о чем и кичливством надымающеся, чрезмерно прочих уничижают, аки не достизающих зде сокровенной мудрости. Обаче они с таковым мудрованием не точию святопросвещенных мужей толкованию, но и сами к себе дышут несогласием. Вси же они того ради лета сия тако исчисляют, яко да покажут, акибы давно уже самый той антихрист царствует свое ему время, реченную седмицу или полседмицы.