Сказание о странствии и путешествии по России, Молдавии, Турции и Святой Земле. Том первый.

«Едина еси, голубице моя, совершеная моя еси (Песн. 6:9). Премудрость Божия рече. В книзе третьей Ездры пророка свидетельство знаменитое: „якоже, Господи Боже, Ты сам един еси, такоже и от всех созиданий градов освятил еси Себе Сион; и от всех сотворений летающих именовал еси Себе голубицу едину; и от всех умноженных людей взыскал еси Себе люди едины“ (3 Ездр. 5:23–27). Кто суть люди сия? Сии суть, иже знают и истинно веруют во единаго истиннаго Бога; о нихже Христос Спаситель наш молился Богу Отцу, глаголя: Отче Святый! соблюди их во имя Твое, ихже дал еси Мне, да будут едино, якоже и Мы (Ин. 17:11). Дает же ведати и святой Апостол Петр о сих: вы же род избран, царское священие, язык свят, людие обновления (1 Пет. 2:9). И святой Апостол Павел вельми яве пишет: вы есте церкви Бога живаго (2 Кор. 6:16). Той же святый инде: едино тело, един дух, якоже и звани бысте во едином уповании звания вашего (Еф. 4:4). Един Господь, едина вера, по свидетельству апостолову (Еф. 4:5); то уже иныя все ереси, а не веры. В Божественном Писании многоименны глаголются церкви, якоже во псалме: в церквах благословите Бога, Господа от источник Израилев (Пс. 67:27). В Апокалипси святой Иоанн Евангелист до седми Церквей пишет (Откр. 1:20). Святитель Иоанн Златоустый о небесной и о земной описует. На первый стих святой Феодорит и Кирилл сице толкуют: „Едина бо бысть жидовская церковь: зде же множество церквей уставляет, в нихже от израильтеских источник пети повелевает всех Бога, сиречь, от Святаго Духа святыми отцы составленными песньми. По отвержении церкве жидовския, другую Христос Спас от язык Святую Церковь созда, о нейже Петрови рече: на сем камени созижду Церковь Мою, и врата адова не одалеют ея“. На вторый стих во Апокалипси святитель Андрей в толковании: Седмь Церквей именует восточных, для знаменитых дел, ихже тамо исчисляет Сын Божий, сим похвалу Церкви Святей Восточней, и веру и терпение ея свидетельствует. И ради седмочисленнаго числа века и дней седмицы, и ради седми ангел, имже чин церковный поручен есть. И яко седмичное число честь во святом Писании Ветхаго и Новаго Завета имать, и иных ради таинств, ихже зде трудно, невмещения ради, описовати. На 3-й стих святитель Иоанн Златоустый о небесной Церкви и о земной на псалом 14: Господи, кто обитает в жилищи Твоем? Описует, сице глаголя: „Увидим таинственнее и разумеем: что́ есть селение? И что́ гора Божия? И како подобно первее обитати в жилищи, и потом в гope Божии? Скиния Моисеова, и Церковь Соломонова, образи бяху двоих Церквей Христовых, сиречь, иже есть на земли, и иже есть на небесех. Церкви иже есть на земли, образование бяше скиния Моисеова. Церкви же паки небесной образ бяше церковь Соломонова, созданная на гope. Две суть Церкви числом, но едина верою. О сей, иже на земли, рекл Господь, на сем камени созижду Церковь Мою. А о небесной апостол рече: Приступисте к Сионове горе, и ко граду Бога жива, Иеросалиму небесному, и к позору тем Ангел, и собору первородных, написанных на небесех (Евр. 12:23). Якоже тогда Моисеова сень в пустыни многажды от места на место преносима бе, и тех, иже в ней пребываху, пришельцы и странными творяше: такоже и Церковь Христова, на земли созданая, селение есть пустынным житием светяся“. И ниже: „Соломонова паки церковь на горе создана бе недвижима, дондеже церковию Божиею пребысть: тако и Христова Церковь на земли имеет в себе пришельцев. Вышняя же церковь первородных имеет жителей вечных, a странных пришельцев тамо несть“. Вкратце о многоименитых Церквах описав, якоже в начале обещахся едину Святую Церковь от Божественнаго Писания показати, и первую часть в сием скончати. В немже и толкование святителя Андрея архиепископа Кесарии Каппадокийския на Апокалипсис главу 5-ю приложу, иже тако описует: „четырми животными и старцы показуется, яко бысть едино стадо и едина Церковь ангелов и человеков Христом Богом, совокупльшим разстоящая, и средостение градежа разоршим“. Той-же, на 7-ю главу: „По сих видех, и се народ мног, егоже исчести никтоже можаше, и вси ангели стояху окрест престола и старцев. Се едина Церковь ангелов и человеков“. И на третием месте на главу 21-ю пишет: „Горний Иеросалим от безплотных свыше, даже до человек нисходящий, зане общая Глава есть обоих Христос Бог наш. Сий же град от Святых составляется, о нихже писано есть: камение свято валяется по земли (Зах. 9:16), краеугольнаго Христа имени“. Святитель Иоанн Златоустый, о соединении с Коринфом, в толковании о Церкви, пишет: „Едина есть Церковь Божия, не точию в Коринфе, но и во всей вселенней. Ибо Церкви имя не разделения, но соединения и согласия имя есть“. Ниже: „еже по вселенней единой достоит быти Церкви, аще и месты многими разделяется“. Паче сего свидетельства явственнейше несть потреба показовати, яко един Господь наш, едина Глава, едино тело, сиречь, Святая Церковь Восточная, едина вера, Христом с небес принесеная, изо уст Его пресвятых и из ребр истекшая, и пролитием крове на кресте Церковь Христу обрученая, и по се время на Востоце благодатию Его непорочно и нерушимо пребывающая, и к нам Росиом, по благодати Божией, святым Апостолом Андреем Первозванным, от истинных наместников его, патриархов Цареградских, преданая, по разсеянии всех ересей, в целости и ныне пребывающая. Благодатию Божиею о Единой Святой истинной возлюбленной Церкви Христовей в сей первой части показав, ко второй предыду».