Сказание о странствии и путешествии по России, Молдавии, Турции и Святой Земле. Том первый.

«Сицева явственна свидетельства от Божественнаго Писания о Святей Церкви приведох, утешение велико православным Церкве Сионстей чадом преподав, имиже обогащены суть возрастает. Но сие ведати потреба, яко титла сыновства не во именовании тщетном, но в деле исполнения церковных заповедей пребывает. Яко да к матери своей любовь покажут первее прилежно, но Псалмопевцу (Пс. 26:4), еже бы часто посещати церковь святую, и жити и делати в ней плоды благоприятны Господеви, и наипаче со усердием ко красному пристанищу церковному приходяще с Давидом молящеся глаголати: вниду в дом Твой, поклонюся к Церкви святей Твоей во страсе Твоем (Пс. 5:8). И сия не туне воспомянухом: яко неции собрания церковная уничижают, иже от всех святых похвалена суть, и заповедано во Святом Писании под запрещением еже к Церкви не приходити (Евр. 10:25). Возможно бо и в дому помолитися, но не тако, якоже в церкви; идеже бо собор общий ангел и человек, и Самого Господа, ради пречистых словес Его: идеже бо, рече, два или три собраны во имя Мое, my есмь посреде их (Мф. 18:20). А наипаче же при Божественней Литургии теплейше молитвы на небо возносятся. И аще Петра святаго Апостола церковная молитва из темницы изведе (Деян. зач. 29), и иных святых, кольми паче нам потреба. Ничтоже ино тако утешения духовнаго не сотворит, якоже прилежание к церкви. Тамо печальным утешение, труждающимся упокоение, в церкви насилуемым отдохновение. Церковь брани разруши, рати утоли, бури утиши, бесы прогна, болезни уврачева, напасти отрази, грады колеблемыя устави, небесныя двери отверзе, узы смертныя пресече, и иже свыше наносимыя язвы, и иже от человек наветы вся отъят, и покой дарова, по словеси Господню: приидите ко Мне вси труждающиеся и обременении, и Аз покою вы (Мф. 11:28). Церковь бо паче небесе вкоренилася есть. И удобнейши есть солнцу от течения своего престати, нежели Церкви безчестне остати. Ведати же правоверному и се потреба, яко Святыя православныя Церкви зде воспомяновени суть точию, а не отступников, ихже с пророком Давидом и возненавидети подобает; ибо тако рече: возненавидех Церкви лукавнующих (Пс. 25:5). И правило святых Апостол (10-е) повелевает, яко моляйся со отлученными, аще и не в церкви, но в дому, да будет и той такожде отлучен. Кая бо часть верному с неверными? Иже в Лаодикии Собор возбраняет с ними молитися, или ясти, или приимати что́ от общения их (Пр. 33). Сицева хранения описав, молю церковных сынов, спасительнаго наказания сего не уничижите. А за тем к 3-й части приступаю».

Часть третья, яко врата адова не одолеша Церкве, ниже турецкая неволя. Читай о сем выше 34.

37. ж) О епископах

Из той же Книги о вере о архиерейском достоинстве и чести: Глава седьмая.

«Не восхоте (Господь) достояние Свое оставити на земли неустроено отходя на небеса, но взем два сребреника, даде гостинником. Се есть старый и новый завет. Кому же дал? Кто гостиници? Апостоли, и по них восприемници их, Пастырие и учителие, архиепископи и епископи, иже служителие суть величеству смотрения Его, имже и спребывати даже до скончания века обетование сотвори, и по Своему неложному обетованию благодатно избирает Себе людей достойных, и поставляет и освящает рукоположением чина духовнаго чрез патриархи, архиепископи и епископи. И яко епископи суть всем чином и степенем, духовенству или священству належащим, первыми и начальными, и для того суть почтени титлами различными, иже суть описани явственнее в деяниях седьми Вселенских Соборов; к сему же архиереами и Пастырьми наречени суть епископи, яко начальными над иереами, ихже рукополагают. А над всеми сими Глава и Пастырь – Христос. Иже сие приобеща глаголя: идеже еста два или три собрани во имя Мое, тамо есмь посреде их. A по свидетельству убо святаго Афанасия: тьмами тем суть Святых телеса, и едина плоть есть Сына Божия. едино стадо и един пастырь. Емуже да будет и от нас честь и слава, во веки веком. Аминь».

Глав. 8. «На сем камени, не рече, на Петре, ибо не на человеце, но на вере Христос созда Церковь Свою. Что же вера бе? Ты еси Христос; сын Бога Живаго. Каменем нарекл Церковь, иже волнование приемлет и не потопляется. Ибо Церковь все подъемлет, но не побеждается. Чесоже ради не побеждается? Христос бо пострада по ней, того ради врата адова не одолевают ей. Небес бо и ангелов, и всея твари дражайши есть Церковь. Сего ради небо и земля прейдут, словеса же Моя не прейдут, рече Господь. He небесе ради распяхся, но Церкве ради. Аще и борима бывает, но побеждена вовеки не имать быти».

38. Обретение истинной Церкви и радость наша