Сказание о странствии и путешествии по России, Молдавии, Турции и Святой Земле. Том первый.

36. е) О славе церковной

Часть вторая, о славе церковной.

«Премудрость созда себе храм, и утверди столп седмь (Притч. 9:1). Предвечная Премудрость Божия созда себе храм, еже есть Церковь. Святии тако сказуют: и знамение велие явися на небеси, жена облечена в солнце, и луна под ногами ея (Откр. 12:1). Жена облечена в солнце Церковь есть, Солнцем правды Христом одеяна. Луна же знаменует крещение. Святый Мефодий, и ини тако разумевают. Предста Царица одесную Тебе, в ризах позлащенных одеяна и преукрашена (Пс. 44:10). Святитель Василий Великий о святей избранной и обрученной от Христа Церкви глаголет: „ризы же позлащены добродетели являет“. Тебе подобает песнь, Боже, в Сионе, и Тебе воздастся молитва во Иерусалиме (Пс. 64:2). Святитель Афанасий, в Церкви, еже есть Сион. Сион же сказуется позорище: в той бо чествует Господь Телом и Кровию Своею, и ту приемлет всех пение. Иеросалим видение мира знаменует, и Церковь. В Церкви же Христове есть мир всем. „Свята Церкви Твоя, дивна в правду“ (Пс. 64:6). Святыни бо исполнь Церкви Твоя, и правде Твоими словесы учит приходящих. Феодорит в толковании. Вкратце обыче дом свидетельства о знаменитости Церкви ради ведения положивши, не еже бы елико в Божественном Писании обретается множество. И не возможно всего приводити, якоже и море преливати. Обаче же еже потребнейшее разумения ради, и святых свидетельства положити достоит». Святитель Иоанн Златоустый пишет о Церкви: «Церковь есть место ангельское; место Архангельское; Царство Божие; самое то Небо» (1 Кор. Прав. 36). Той же, во втором послании: «Темже и в правду всячески ту наречет, кто и судилище, и врачебницу, и любомудрия училище, и души наказательницу, и обучение течений на небеса ведущих» (Прав. 15). Той-же к Евреом: «Небесная бо есть Церковь. И ни чтоже ино есть, разве небо» (Бесед. 14). И инде: «В Церкви вси с небесе от Бога вещаются. Входим с подобающею честию в Церковь, и со страхом послушаем в ней глаголемая» (Солун. Пр. 3). Той же святый в слове, предста Царица, глаголет: «Церковь не стены и покров есть, но вера и житие». Ниже: «Церкви ничтоже равно есть, и никогда же стареет. Выше небес взыде: ни варвары, ни бесы преодолеют ей: колицы ратоваша Церковь, и ратовавшия погибоша: борима есть, и не побеждается. И чесо ради попусти брань? Яко да покажет светлейшую победу». Ниже: «He удаляйся Церкве, ничто же бо Церкви крепчайшее: упование твое Церковь, и спасение твое Церковь. Небес вышши есть, камения твердейши есть, земли ширши есть. Никогдаже стареет, но присно юнеется. Сего ради твердое ея являя Писание, гору ея наричет; непревратное, камень ея наричет; нетленное, деву ея наричет; многоценное, царицу ея наричет; сродное, еже к Богу, дщерь; многоплодное, тьмами имены ея наричет, яко да представит тоя благородие». Той же святитель Иоанн Златоустый в слове на Пятидесятницу: «Вельми бо Церковь Богу возлюблена есть; не сия, иже стенами огражена, но сия; иже верою огражена. Церкви бо ради процято есть небо, пролияно море, простерт есть воздух, основана земля, рай насажден, чудеса велия быша, море разделяшеся, и паки сступашеся, камение разпадашеся. Церкви ради пророкове, Церкви ради апостолове: и что́ больше реку? Церкве ради Единородный Сын Божий человек бысть, якоже Павел рече, Иже Сына Своего Бог не пощаде, яко да Церковь исцеляет и кровь Сына Своего излия Церкве деля. Кровь сия окропляет Церковь. Сего ради розги ея и листвия ея не увядает. Древеса ея листвия не отметают, не подлежит времени тления, зане благодать Святаго Духа сия действует. Аз создах ю, глаголет Христос, поставивый небо, но небесе ради не излиях крови; небеси ради не распняхся; ниже небесе деля небесное тело восприях. И что́ глаголю небесное? Ангельскаго тела не восприях, да познаеши, яко паче небеси, паче ангел, и всея твари дражайши есть Церковь. Сего ради небо и земля прейдет, a словеса Господня не прейдут». Дозде святитель Иоанн.