Том 10 (XVI век, литература «государственного устроения»)

И снидошася воеводы многие на Коломну, а с ними люди многие, дворяня великого князя и дети боярские;[16] а безбожьнии татарове приидоша на Рязань месяца августа в 15 день, в пяток, на Оспожинъ день, и посады на Резани пожгоша, и ко граду приступаху, но града не взяша. У Рязани тогда бысть воевода князь Ондрей Дмитреевич Ростовский, и с нимъ дети боярские, рязанцы. А безбожьнии татарове жгуще и в плен ведуще, и волости воююще.

Князь же великий Василей Иванович розосла грамоты и гонцы по всемъ градомъ, и повеле людямъ ити къ собе, а иным людям на Берег к воеводамъ, а самъ князь велики з братиею своею со княземъ Юрьем и со княземъ Андреемъ Ивановичемъ, и с воеводами поиде с Москвы противу безбожьныхъ татар, в пяток, на Оспожин день, и пришедше ста во своемъ селе Коломенскомъ.[17]

Воеводы же великого князя з Берегу послаша за реку по люди воеводу князя Дмитрия Федоровича Палецкого, а с нимъ дворяне великого князя и дети боярские. И пришед князь Дмитрей Палецкой к Николе къ Зараскому на Осетръ,[18] и приде к нему весть, что люди крымские оттуды верстъ з десять, в Безубове селе. И ту на них приде князь Дмитрей, и потопташа их, и многи же избиша, а иных живых изымаша и к великому князю отослаша.

И тогда же бысть после Оспожина дни, въ 24 день августа, в среду, бысть на небеси в солнце знамение,[19] яко восходящу солнцу на[20]1-мъ часу дни, и бысть вверху солнца аки срезано по-малу, и нача в солнце гибели прибывати от перваго часа и до третьяго часа дни, и бысть на солнци яко до трети изгибе, аки ускуи́[21] и исполнися солнце на пятомъ часу дни яко первое бысть; на небеси же бысть светлость, не бысть ни облака. Людие же поразсудив, и глаголаху в себе, яко быти во царстве пременению некоему. Лето бысть тогда сухо, и курение, дымы хожаху.

Тогда же воеводы великого князя з Берегу послаша за реку князя Ивана Федоровича Телепнева-Овчину воеводу, а с нимъ дворян великого князя и детей боярских; князь же Иоанъ доеде сторожей татарских, и потопташе ихъ, и поби. Татарове же побегоша и намчаша наших людей на многие люди; и ту князя Ивана с нашими людьми розгромили. И татарове же поидоша вонъ из земли вскоре, чаяху за собою многих людей. Воеводы же великого князя за ними ходили, но не дошли их и возвратишася.

Князь же великий Василей Иванович всея Руси поиде к Москве ис Коломенского, и бысть на Москве, а братию свою, князя Юрья и князя Ондрея, отпустил по их отчинамъ, по уделомъ. А самъ князь велики нача мыслити ехати къ живоначалней Троици и преподобному чюдотворцу Сергию игумену.

Поиде князь велики Василей Иванович всеа Руси с великою княгинею и с своими детьми,[22] со княземъ Иваномъ Васильевичемъ и со княземъ Юрьемъ Васильевичемъ, къ живоначальней Троице и ко преподобному чюдотворцу Сергию[23] помолитися на память чюдотворца Сергия; и туто князь велики молился, и празновал чюдотворцову память, и молебная свершив.

И от Троицы князь велики поеде с великою княгинею и з детми во свою вотчину, на Волок на Ламский, тешитися. Поеде же князь велики к Волоку на свое село на Озерецкое[24] и ту начатъ не мощи. И явися у него мала болячка на левой стране, на стегне, на згибе, близъ нужного места, з булавочную голову; верху же у нея несть, ни гною в ней несть, а сама багрова. И оттоле приде князь великий въ Нохабное[25] село; из Нахабного же поиде нужно, обдержимъ болезнию, в Покровское, в Фуниково, и ту празнова Покрову святей Богородици; и оттуду поеде во свое село Покровское, пребысть туто два дни, во третий жо день приде на Волок нужно, в неделю после Покрова.[26] И того же дни бысть пиръ на великого князя у Иоанна у Юрьевича у Шигоны, у дворецкаго тверскаго и волоцкого.[27]

Наутрия же в понеделникъ князь велики с великою нужею доиде до мыльни, за столомъ седе въ постельных хоромех великою нужею.

Наутрия же того во вторникъ бысть погодие велико тешитися государю, и послаша по ловчихъ своих, по Федора по Михайлова сына Нагово, да по Бориса по Васильева сына Дятлова, да по Бобрища по Пушкина, и не унявся, хотя тешитися. И поеде во свое село в Колпь, болезнию яко обдержимъ скорбяще; до села же того едучи, мало бысть потехи. В Колпь же приеха и седяще за столомъ нужею, посла по брата своего, по князя Ондрея Ивановича, на потеху къ собе; князь же Андрей приеха к нему вскоре. Тогда же князь великою нужею выеха со князем Андреемъ Ивановичемъ на поле съ собаками, и поездиша мало, токмо 2 версты от села, и возвратишася в Колпь. И седящу ему за столомъ з братомъ своимъ, со княземъ Андреемъ Ивановичемъ, изнемогающи, и оттоле стола у него не бысть, но вкушаше мало на постели.