Том 11 (XVI век, сочинения Ивана Грозного и Андрея Курбского)

Духа же Сыновня богословцы глаголютъ, якоже и Павел рече: «Духъ Христов»,[995] но по слову существа, а не по вине исхожения. А собрание в Никеи при Великом Констянтине 318-ти богоносных отецъ всемъ ведомо повсюду православным, яко на христоборца Ария[996] бысть, еже он, умовредный, Господа Исуса Христа от Отча существа отлучает. И сего ради те святители от престол своих двигнулися искоренити сего безбожнаго учения. Еже и бысть. Его же жилами священных словес удавиша и проклятию вечному предаша. И всем и бе тщание о том тогда, да Господа нашего Исуса Христа, похуленного от Ария, соприсносущна Отцу и Святому Духу и равна, прославят и проповедают. А о Дусе Святемъ не бысть тогда спору и сопрения. И святый Символ тогда от них изложен бысть, да иже до сего: «и в Духа Святаго», той конецъ был.

По летех немалых хула на Духъ Святый явися, за неяже и Феодосий Великий, царь, собор собра,[997] видев вселенную возмущенну от нея и православныя церкви многою бедою одержимы суща, понеже и сам патриархъ царствующаго града Макидоний, начальникъ и предстатель ереси тоя быв. И тоя ради беды от конец вселенныя богоглаголивых архиерей от престол их подвиже, имже предстатель быв блаженный Димас, папа римский. Григорей Богослов, Григорей Ниский и иныя великия святители от конец вселенныя снидошася в Костянтинград, и многая от них апостольскими даровании и чюдесы удобренны, и мученическими страдании украшенны. И сего безбожнаго Макидония священными словесы победиша и от престола извергоша, и Духа Святаго равна Отцу и Сыну проповедаша, а не созданна, и силу некую выше ангелъ, якоже Македоний блядословяше. И во святомъ Символе того ради богословия о Дусе Святом прибавивъ: «и в Духа святаго, Господа и животворящаго, от Отца исходящаго». А не от Сына, яко же Фармос[998] и вы, последующе ему, ново глаголите. Тщание тогда все бысть апостоловиднымъ святымъ и спор с Макидонием и со единомысленики его о самой ипостаси Святаго Духа и о присносущном его от Отца исхожении, а не о излиянии и посылании Духа. Калур же ваш, от Галат[999] пришедши с премудрецы своими, и Фармос папя, прельстишася, подобяся Макидонию, и явно новоприложив ко древнему богословию во святомъ Символе, Духа Святаго и от Сына глаголет исходити, и, на послушенство емлючи, развращенне толкуютъ еуагльские словеса, яко Христос, рече, глагола посылати Духа, и апостолъ Петръ, рече, излиятися Христу Духа, приимъ от Отца.[1000] И сего ради глаголют, яко от Сына Духу исходити, не умеюще разсудити, паче же не хотяще, яко во святом символе о совершенной ипостати Духа богословъленно; а се о даровании реченно. И вместо испостаси дарование полагают, хотяще упрямство свое поставити. И, филокизмами[1001] аристотельскими изоостря язык, на древнее богословие вооружаются.

А еже реклъ еси, яко: «Аз, рече, не вемъ, кое истинна. Много о том спор меж вами и нами. Но папа и Лютор так глаголют, якоже мы держими. А научимся на небеси и узрим, что есть истинна». И се ответ, премудрый Иване, не твоего разума, ко отвещанию истинны недоумения полон: несть бо кому мошно обрести на небеси, имеюще догматы богословия разтленны. Самъ бо громогласный Павел рече: «Обручих вы деву чисту Христу, не имеюще скверны и пороку»[1002], сиречь церковь Божию, не токмо имуще благочестие догматы, но и житие право и непорочно, и вере подобно. Такова убо церковь, и таковую благочестия чистотою оболченна обретаетца на небесе. А уклоняющихся в развращенная поведет Господь со творящими безаконие. Рече псалмопевец и царь Давидъ: «И ин возметца нечестивый и да не видит славы Господня».[1003] Не слышил ли еси в Ветхом самого Бога крепце Моисею заповедающе о первомъ законе и о создании скинии? «Сохрани ми, — рече, — речь сию невредну»,[1004] сииречь, не дерзни што приложити к ней или отняти. Такоже и Павел божественный к галатом писал о некоих, прелыцающихся от законных и от соблюдений дний: «Аще, — речем, — мы или аггелъ благовестит вам, паче же благовестихом вам, проклят да есть».[1005] Аще и от малых сице проклинает, кольми паче не тщащихся древняго благочестия догмат соблюдати?

И сему последующе, святыя вкупе сошедшеся во Ефес 200 великих архиерей с вашим римским первонастольником Келестином на третьем соборе на злочестивого Нестория,[1006] еже он, умовредный, странная и неслыханая мудруствующе, и хулу на Христа и на рожешую его Богородицу глаголюще, и его чюжеродная и неподобная мудрования обличив, и от священного лика изринув и, соверша святый Симъвол, крепце заповедаша и страшными клятвами запечетлеша не приложити что или отняти, ни слово на слово преложити. Пригоже и вам, премудрый Иване, устыдитися древних таковых святых и толь великих, не токмо внешнему любомудрию совершенно наказанных и богословию искусных, но и житиемъ ангельским сияющих; а многи от них исповедания ради благочестия от безбожных еллин и от злославных царей страдании и кровьми мученическими украшенных.