Том 11 (XVI век, сочинения Ивана Грозного и Андрея Курбского)

Но аще мы умолчим о пременении частых законов ваших, но вещь возопиет и трубы явленнейши гласъ испущает. Ово убо от Карула и от фолософеи его развратишася, и опресноце вместо хлеба на священной литургии полагаху, подобяся злочестивому Полинарию Ладикийскому, мертвым телом совершенному животу служити повелевая. Ово же к Фармосу от апостольскаго благочестия сложишася, и во Образной богословии два испущателя Духу глаголати. А иногда от папъ ваших порготорья проповедана; а иногда бороды и усы побриша;[1007] а ныне вослед неосвященого Лютора поидоша. А днесь, слышал есми, от немец ваших, и иныя новыя проповедники за морем законы полагают.

О, воистинну, трость, колеблема ветром от сопротивных духов! О, храмина ваша, создана на песце от всех зрится! И по волям вашим попущенным быша лжиучители! Смятошася и поколебашася, яко пиянии, надеяшася на хитрость и на философию тщетную, о нейже претя, Павел х Каласаем пишет.[1008] И вся мудрость священная у вас поглощенна бысть сего ради. Не токмо Образныя богословии догматы растленны и правила и уставы церковныя изпроверженны у вас, но и священныя книги Моисейския и пророческия от жидовских книг разтленны сущи и в преводех изпрепорчены.[1009] И где прилучится в них быти о Христе реченному явне или гадательне, во множайших местех горняя долу поставленно, и никакоже согласующе древним седмидесяти проповедником.[1010] Такоже и седмотысущного века[1011] от Моисея и от пророков во писанных по вашим новым преводом больши полуторы тысящи летъ украдено, на роздор и уничижение хрестьянскому роду, а на пособление и на радость христоборным жидом, вместо Христа ждуще богопротивника Антихриста. И супротив фсех апостолов и святых же глаголати[1012] хотяще и изветы лукавыя себе полагати умышляюще, яко не у[1013] еще прииде последняя лета, ни Христу веруют, в плоть пришедшу, от всех пророк возвещенному, но паче хулят и наругаются, окаяннии, якоже древле и отцы их, неотреченно веруют и уповают пришествию богоборному прелестнику, сыну погибельну. И несть пользы християнскому роду от растленных их книг Священным Писанием преводится, но паче соблазны и сметение. Якоже и словеса глаголют: «От враг сведительство не бывает приемлемо».[1014]

Добре рече некто от святых супротив преводов ваших, иже был и во премудрости, и во священной философеи мног, яко сего ради благоволи Богъ преложитися Священным Писанием всем от еврейского языка на еллинской, преже трехсот лет пришествия Сына своего, самеми пророческими сыны, многия премудрости изполненными седмидесять мужими, не токмо еврейской мудрости наказанных, но египетцкую и еллинскую вконец извыкши: и ведая, рече, безначальный Отецъ ко присносущному и единородному Сыну своему непримирительную брань жидовскую, не токмо в самой страсти, и по вознесении во апостольском, но и днесь, и яко хотят портити во всех пророческих словесех лежащая о Христе проречения. И сего ради попусти Богъ преже многих лет пришествия Христова сему быти. И аще бы сего не было, они бы возмогли противу нас извет поставити, изпрепортя словеса, в книгах о Христе реченная, и глаголали бы: «Вам, рече, апостоли инако проповедали, а у нас не так написано». И благодатию Божиею заградиша уста их, того ради, яко сами отцы их преложиша Писания их Птоломею книголюбцу во Египте. Ихже превода хитрость и Героним ваш премудрый,[1015] дивяся, похваляет, яко в различных имъ, глаголетъ, храминах седити и писати, семьдесят сущим мужем, а не в малейших где в чинех превода супротивлению явитися у них, но по всему равности и согласию им быти. И невозможно, рече, так человеком, но Духа Святаго действия исполнение. И сему древнему преводу, и от вашего Геронима похваленному, нынешние ваши книги во множайших противны являются. Также из священных источников Нового Завета разтленны у вас книги от расколотворных учителей ваших. И не дивно есть имъ Писания разтлевати, не токмо бо превратили[1016] предания древних своих апостолоподобных папъ, но и межю собя сопротивление и несогласие много имуще.